ខ្សែប្រយុទ្ធវ័យក្មេងរបស់ក្រុមខេត្តព្រៃវែង គី រីណា បានសម្រេចបោះបង់ចោលនូវឱកាសដ៏សំខាន់ សម្រាប់ការបង្ហាញខ្លួន ជាមួយក្រុមជម្រើសជាតិក្រោមអាយុ២៣ឆ្នាំ ជាលើកដំបូង ដោយរូបគេ បានវិលត្រឡប់ពីប្រទេសបារ៉ែន មកមាតុប្រទេសវិញ ជាមួយក្រុមធំជម្រើសជាតិកម្ពុជា គឺមិនបានបន្តដំណើរ ទៅចូលរួមការប្រកួតជម្រុះពានរង្វាន់ AFC U23 ASIAN Cup នៅប្រទេសជប៉ុន នោះទេ។
គី រីណា ត្រូវបានកោះហៅឱ្យចូលរួមជាមួយក្រុមជម្រើសជាតិ ជាលើកដំបូង។ បើទោះជា រីណា មិនត្រូវបានដាក់ឱ្យលេងសោះ សម្រាប់ការប្រកួតជម្រុះពានរង្វាន់ AFC Asian Cup 2023 ជាមួយក្រុមជម្រើសជាតិហ្គាម នៅប្រទេសបារ៉ែន ប៉ុន្តែ គី រីណា អាចក្លាយជាបេក្ខភាពដ៏សំខាន់ម្នាក់ ដែលគេរំពឹងថា នឹងត្រូវបានដាក់ឱ្យលេង នៅក្នុងការប្រកួតពាន AFC U23 ASIAN Cup នៅប្រទេសជប៉ុន នាពេលខាងមុខនេះ ដោយកម្ពុជា ត្រូវជួបក្រុមហុងកុង នៅថ្ងៃទី២៣ និងជួបក្រុមម្ចាស់ផ្ទះ ជប៉ុន នៅថ្ងៃទី២៦ ខែតុលា ឆ្នាំ២០២១នេះ។
តែទោះបីជាយ៉ាងណា ខ្សែប្រយុទ្ធដ៏សំខាន់របស់ក្លិបខេត្តព្រៃវែង គី រីណា បានសម្រេចបោះបង់ចោលឱកាសដ៏សំខាន់នេះ ដោយបានវិលត្រឡប់មកផ្ទះវិញ ជាមួយក្រុមធំជម្រើសជាតិ ហើយបញ្ហានេះ ត្រូវបាន គី រីណា ប្រាប់ថា មកពីរូបគេ បានស្នាក់នៅជាមិត្តរួមក្រុម ដែលវជ្ជមានកូវីដ១៩ ហេតុនេះគេខ្លាចថា រូបគេមានផ្ទុកជំងឺនេះដែរ នឹងឆ្លងទៅដល់ក្រុមU23ជម្រើសជាតិកម្ពុជា។
តាមរយៈក្លិបខេត្តព្រៃវែង គី រីណា បាននិយាយថា៖ «មូលហេតុដែលខ្ញុំសម្រេច មិនធ្វើដំណើរទៅប្រទេសជប៉ុន ជាមួយក្រុមជម្រើសជាតិក្រោមអាយុ២៣ឆ្នាំ ដោយសារខ្ញុំស្នាក់នៅបន្ទប់ជាមួយមិត្តរួមក្រុមជម្រើសជាតិ ដែលមានវិជ្ជមានកូវីដ១៩»។
កីឡាករមានមាឌមិនសូវធំរូបនេះ បានបន្ថែមថា៖ «ទោះបីជា ខ្ញុំបានធ្វើតេស្តលទ្ធផលអវិជ្ជមាន ក៏ខ្ញុំនៅតែសម្រេចមិនចូលរួមប្រកួត ដោយខ្លាចមានការឆ្លងទៅកាន់មិត្តរួមក្រុមផ្សេងទៀត ដែលធ្វើឱ្យជម្រើសជាតិក្រោមអាយុ២៣ឆ្នាំ ចាញ់ដោយស្វ័យប្រវត្តិ ព្រោះជំងឺកូវីដ តម្រូវឱ្យធ្វើចត្តាឡីស័ក ចំពោះអ្នកដែលពាក់ព័ន្ធជាមួយអ្នកជំងឺ»។
គួររំឭកថា សម្រាប់ការប្រកួតជម្រុះពានរង្វាន់ AFC Asian Cup 2023 ជាមួយក្រុមជម្រើសជាតិហ្គាម នៅប្រទេសបារ៉ែន កាលពីពេលថ្មីៗនេះ កីឡាករជម្រើសជាតិរបស់កម្ពុជាចំនួន ៦ នាក់ បានឆ្លងកូវីដ១៩ ក្នុងនោះមានកីឡាករ គួច សុកុម្ភៈ, សឿយ វិសាល, ចាន់ វឌ្ឍនាកា, អ៊ាន ពិសី, សារ៉េត គ្រីយ៉ា និង កែវ សុខសិលា ហើយបច្ចុប្បន្នអ្នកទាំង៦នេះ កំពុងសម្រាកព្យាយាលបន្ត នៅប្រទេសបារ៉ែន៕
