ក្រុមកីឡាករជម្រើសជាតិវាយកូនបាល់កម្ពុជា ឡុង សំនៀង, ប៊ុន កេន្នី និង ឃ្លាំង ពន្លក នឹងត្រូវរួមគ្នាប្រកួតជាមួយក្រុមខ្លាំងរបស់អ៊ីរ៉ង់ នៅលើទឹកដីប្រទេសបារ៉ែន នារសៀលម៉ោង១ (ម៉ោងនៅកម្ពុជា) ថ្ងៃព្រហស្បតិ៍នេះ ដើម្បីប្រជែងគ្នាយកលេខ១ ក្នុងពូលC នៃពានរង្វាន់វាយកូនបាល់អន្តរជាតិប្រចាំទ្វីបអាស៊ី និងមហាសមុទ្រប៉ាស៊ីហ្វិក Davis Cup 2021 កម្រិតទី៤ (Asia/Oceania Group IV)។
ការជួបគ្នារវាងក្រុមកម្ពុជា និងអ៊ីរ៉ង់ នាការប្រកួតបញ្ចប់ក្នុងពូល C នៅលើទីលាន Bahrain Tennis Federation Courts ក្នុងទីក្រុង Isa Town ប្រទេសបារ៉ែន ថ្ងៃនេះ វាបានក្លាយជាការប្រកួតដ៏ធំ និងសំខាន់បំផុត ព្រោះក្រុមដែលទទួលបានជ័យជម្នះ នឹងក្លាយជាម្ចាស់ជើងឯក ប្រចាំពូលCនេះ ព្រោះទាំងកម្ពុជា និងអ៊ីរ៉ង់ សុទ្ធតែបានយកឈ្នះលើក្រុមមកពីប្រទេស កៀហ្ស៊ីស៊ីស្ថាន និងយេម៉ែន ដូចគ្នា។
យ៉ាងណាក៏ដោយ តាមរយៈលទ្ធផលនៃការប្រកួតកន្លងមកនេះ កីឡាករទាំង៣នាក់របស់ក្រុមអ៊ីរ៉ង់ ធ្វើបានល្អជាងកីឡាករទាំង៣នាក់របស់កម្ពុជា ព្រោះក្រុមអ៊ីរ៉ុង បានយកឈ្នះលើក្រុមកៀហ្ស៊ីស៊ីស្ថាន និងយេម៉ែន ដោយលទ្ធផលឈ្នះដាច់ ៣-០ ទាំងការប្រកួតវាយទោល១ទល់២ (២វិញ្ញាសា) និងការប្រកួតវាយគូ ចំណែកកម្ពុជា បានយកឈ្នះក្រុមកៀហ្ស៊ីស៊ីស្ថាន ២-១ និងឈ្នះក្រុមយេម៉ែន ៣-០។
ជាមួយគ្នានេះ លោក ជា ពៅ ដែលជាគ្រូបង្វឹកក្រុមជម្រើសជាតិកម្ពុជា បានចាត់ទុកក្រុមជម្រើសជាតិអ៊ីរ៉ង់ ថាជាឧបសគ្គធំ សម្រាប់កម្ពុជា ដោយលោកបាននិយាយថា៖ «កម្ពុជាយើង នៅមានបច្ចេកទេស ក្រោមប្រទេសអ៊ីរ៉ង់ នៅឡើយទេ»។
យ៉ាងណាក៏ដោយ ប្រធានប្រតិភូកីឡាកម្ពុជា លោក ទេព រិទ្ធីវិទ្ធ និងគ្រូបង្វឹកបរទេស លោក Braen Aneiros ហាក់មានទំនុកចិត្តខ្ពស់ថា កម្ពុជា មានភាគរយខ្ពស់ ក្នុងការឆ្លងផុតពីការប្រកួតកម្រិត៤នេះ ដើម្បីឡើងទៅលេងនៅកម្រិត៣ ជាថ្មីម្តងទៀត ព្រោះលោក ទេព រិទ្ធីវិទ្ធ បានបញ្ជាក់ថា៖«ការប្រកួតនៅឆ្នាំនេះ គេយក៣ក្រុម សម្រាប់ឡើងទៅលេងនៅកម្រិត៣ ហេតុនេះ កម្ពុជាយើងមានសង្ឃឹមច្រើន»៕
