ភ្នំពេញៈ ក្រុមកោះកុងអេហ្វស៊ី បានបន្តរកឃើញជ័យជម្នះដ៏មានន័យ ដើម្បីបានឡើងទៅកាន់ការប្រកួវគ្គផ្តាច់ព្រ័ត្រ ពានរង្វាន់សម្តេចហ៊ុនសែន (ថ្នាក់ខេត្ត) លើកទី១៥ ឆ្នាំ២០២១ យ៉ាងរំភើប ប៉ុន្តែក្រុមខេត្តបាត់ដំបង បានជួបនៅរឿងសយ ហើយក៏ជាគ្រោះសម្រាប់ក្រុមទាំងមូលផងដែរ ដែលនាំឱ្យ ពួកគេ ត្រូវបានកំណត់ឱ្យចាញ់ក្រុមខេត្តត្បូងឃ្មុំ ដោយស្វ័យប្រវត្តិតែម្តង។
វាហាក់បីដូចជាពិបាកនឹងទទួលយកដែរ សម្រាប់ក្រុមខេត្តបាត់ដំបង ខណៈការព្យាយាមហ្វឹកហាត់ ត្រៀមបញ្ចេញសមត្ថភាពរបស់ពួកគេ នៅក្នុងការប្រកួតវគ្គពាក់កណ្តាលផ្តាច់ព្រ័ត្រ ជាមួយក្រុមខេត្តត្បូងឃ្មុំ កាលពីថ្ងៃពុធ ត្រូវបានបញ្ចប់ដោយគ្មានន័យ នៅពេលគណៈកម្មការសម្រេចលុបចោលការប្រកួតនេះភ្លាមៗ ហើយបានប្រគល់ជ័យជម្នះទៅឱ្យក្រុមខេត្តត្បូងឃ្មុំ ដោយស្វ័យប្រវត្តិ នោះ។
យ៉ាងណាក៏ដោយ ការសម្រេចនេះ ក៏ព្រោះតែ កីឡាកររបស់ក្រុមខេត្តបាត់ដំបង ត្រូវបានធ្វើតេស្តរកឃើញ វិជ្ជមានជំងឺកូវីដ ដល់ទៅ២លើក ហើយតាមច្បាប់ និងលក្ខខណ្ឌនៃការប្រកួត គឺត្រូវឱ្យក្រុមនេះ មានអ្នកឆ្លងជំងឺកូវីដ១៩ ចាញ់ដោយស្វ័យប្រវត្តិ តែម្តង ហើយក្រុមម្ខាងទៀត ជាអ្នកឈ្នះ។
ដោយឡែក ក្រុមរបស់លោក ហុក សុជីវ័ន បានទម្លាក់ក្រុមខេត្តបន្ទាយមានជ័យ ជាមួយការប្រកួតយ៉ាងស្វិតស្វាញ និងលំបាក ទម្រាំរកឃើញជ័យជម្នះដ៏រំភើប នៅកីឡដ្ឋានអេអ៊ីយូស្ពតផាក កាលពីថ្ងៃពុធនោះ។
បើទោះបីជា ក្រុមកោះកុងអេហ្វស៊ី បានលត់ក្រុមខេត្តកំពង់ឆ្នាំង រហូតដល់ ៩-១ នៅវគ្គជម្រុះ៨ក្រុមចុងក្រោយ ប៉ុន្តែសម្រាប់ការជួបក្រុមខេត្តបន្ទាយមានជ័យ នៅក្នុងវគ្គពាក់កណ្តាលផ្តាច់ព្រ័ត្រនេះ ក្រុមកោះកុងអេហ្វស៊ី រកបានតែ១គ្រាប់គត់ ដែលជាគ្រាប់បាល់របស់ ហ៊ីម រ៉ស់សាលី នៅនាទីទី ៤៥+១ ដើម្បីយកឈ្នះក្រុមខេត្តបន្ទាយមានជ័យ និងឡើងទៅជួបក្រុមជួបសំណាង ខេត្តត្បូងឃ្មុំ នៅវគ្គផ្តាច់ព្រ័ត្រ៕
