បរទេស៖ ក្លិប Aston Villa ទំនងដូចជាត្រូវដាក់សំណើទៅកាន់ក្លិប Rangers ក្នុងរយៈពេល៤៨ម៉ោងទៀត ដើម្បីសុំការអនុញ្ញាត ក្នុងការទៅពិភាក្សាជាមួយនឹងលោក Steven Gerrard ក្រោយពីអតីតតារាឆ្នើមរបស់ក្លិប Liverpool រូបនេះ ត្រូវបានកំណត់ជាបេក្ខភាពក្នុងជម្រើសទី១ ក្នុងការចូលទៅកាន់ដឹកនាំលោក Dean Smith ជាអ្នកចាត់ការទូទៅ។
លោក Gerrard ដែលកំពុងតែជាប់កិច្ចសន្យារហូតដល់ឆ្នាំ២០២៤ នៅកីឡដ្ឋាន Ibrox នោះ ត្រូវបានគេរាយការណ៍ថា ចាប់អារម្មណ៍នឹងការវិលទៅកាន់ប្រទេសអង់គ្លេសវិញ ប្រសិនបើ Rangers អនុញ្ញាតឲ្យមានការពិភាក្សាគ្នា។ កញ្ចប់ទឹកប្រាក់សំណងប្រមាណជា២លានផោន ទំនងដូចជាមិនអាចរារាំងម្ចាស់ក្លិប Aston Villa លោក Nassef Sawiris និងលោក West Edens បានឡើយ។
Gerrard វ័យ៤១ឆ្នាំ ត្រូវបានគេរំពឹងទុកថា នឹងក្លាយជាអ្នកជំនួសលោក Jurgen Klopp នៅក្លិប Liverpool ហើយអ្វីដែលចៃដន្យនោះគឺថា កិច្ចសន្យារបស់គ្រូបង្វឹកទាំង២ នឹងផុតកំណត់ក្នុងឆ្នាំតែមួយ។ ប៉ុន្តែ ទោះបីជាយ៉ាងណា មហិច្ឆតារបស់ Aston Villa អាចនឹទាក់ទាញលោក Gerrrard ខណៈដែលក្លិបនេះ សម្លឹងរកការធ្វើឲ្យបានល្អប្រសើរជាងឆ្នាំមុន ដោយពួកគេបានបញ្ចប់ក្នុងចំណាត់ថ្នាក់លេខ១១៕
ប្រភពព័ត៌មាន៖ Channel News Asia
