ក្រុមប្រតិភូ គ្រូបង្វឹក និងកីឡាការិនីជម្រើសជាតិកីឡាប៉េតង់ សរុបនចំនួន៧នាក់ បានចេញដំណើរពីមាតុប្រទេសរបស់ខ្លួន ហោះបោះពួយ ទៅកាន់ទឹកដីប្រទេសអេស្ប៉ាញ កាលពីថ្ងៃអង្គារ ម្សិលមិញ ដើម្បីចូលរួមការប្រកួតកីឡាប៉េតង់ជើងឯកពិភពលោក ដែលនឹងចាប់ដំណើរការពីថ្ងៃទី១២ ដល់ទី១៤ ខែវិច្ឆិកា ឆ្នាំ២០២១ នៅទីនោះ។
ក្រុមជម្រើសជាតិកីឡាប៉េតង់កម្ពុជា ដែលបានចាកចេញមាតុប្រទេសនេះ គឺក្រុមជម្រើសជាតិនារី ចំណែកក្រុមជម្រើសជាតិបុរស ដែលនឹងត្រូវទៅចូលរួមក្នុងការប្រកួតនេះដែរ នឹងចេញដំណើរទៅតាមក្រោយ ព្រោះការប្រកួតជើងឯកពិភពលោក នៅទីក្រុង Santa Susanna ប្រទេសអេស្ប៉ាញនេះ មាន៣ផ្នែក គឺក្រុមនារី ក្រុមបុរស និងក្រុមយុវជន ដោយកំណត់ពេលវេលាប្រកួតខុសគ្នា ប៉ុន្តែកម្ពុជា មិនបានបញ្ជូនក្រុមយុវជនរបស់ខ្លួន ឱ្យទៅចូលរួមការប្រកួតនេះទេ។
បើតាមមន្ត្រីជំនាញរបស់សហព័ន្ធកីឡាប៊ូល និងប៉េតង់កម្ពុជា បានឱ្យដឹងថា បេក្ខភាពជម្រើសជាតិប៉េតង់ ផ្នែកនារីទាំង៤នាក់ ដែលត្រូវបានជ្រើសរើសឱ្យទៅចូលរួមការប្រកួតជើងពិភពលោក លើកនេះ រួមមានកីឡាការិនី អ៊ុក ស្រីមុំ, អ៊ុន ស្រីយ៉ា, ស្រ៊ាង សុរ៉ាឃីម និងកីឡាការិនី ឃួន យ៉ារី ចំណែកប្រតិភូដឹកនាំ រួមមាន លោក សុខ សប្បាយណា ជាអគ្គលេខាធិការ សហព័ន្ធ លោក អ៊ិន គឹមស្រ៊ុន ទីប្រឹក្សាសហព័ន្ធ និងលោក សុខ ម៉ុង ជាគ្រូបង្វឹក។
ចំពោះកីឡាការិនីជម្រើសជាតិប៉េតង់កម្ពុជាទាំង៤នាក់នេះ គឺមានតែកីឡាការិនីវ័យក្មេង ឃួន យ៉ារី ម្នាក់ទេ ដែលមិនទាន់ធ្លាប់ឈ្នះបានមេដាយ ពីការប្រកួតជើងឯកពិភពលោកនេះ ប៉ុន្តែបេក្ខភាព៣នាក់ទៀត សុទ្ធតែធ្លាប់បានសាងស្នាដៃ នៅក្នុងព្រឹត្តិការណ៍នេះ ដោយក្នុងនោះកីឡាការិនីជើងចាស់ អ៊ុក ស្រីមុំ ធ្លាប់ឈ្នះបានមេដាយមាស ១ និងមេដាយសំរឹទ្ធ ៣ រីឯ អ៊ុន ស្រីយ៉ា ធ្លាប់ឈ្នះមេដាយសំរឹទ្ធ ៣ និងកីឡាការិនី ស្រ៊ាង សុរ៉ាឃីម ធ្លាប់ឈ្នះបានមេដាយប្រាក់១ និងមេដាយសំរឹទ្ធ១។
យ៉ាងណាក៏ដោយ សម្រាប់ការចេញដំណើរទៅចូលរួមការប្រកួតជើងឯកពិភពលោក នៅប្រទេសអេស្ប៉ាញ លើកនេះ គេនៅមិនទាន់ដឹងថា ក្រុមនារីជើងខ្លាំងរបស់កម្ពុជា ទាំង៤នាក់នេះ អាចនឹងបន្តដណ្តើមបានមេដាយជូនជាតិ ឬយ៉ាងណានោះទេ ព្រោះវិបត្តិនៃជំងឺកូវីដ១៩ ធ្វើឱ្យការហ្វឹកហាត់ត្រៀមរបស់ក្រុមកម្ពុជា លើកនេះ មិនសូវបានពេញលេញដូចការចេញទៅប្រកួតមុនៗនោះទេ៕
