ក្រុមអគ្គិសនីកម្ពុជា បានបង្ហាញឱ្យឃើញកាន់តែច្បាស់ថា ពួកគេជាក្រុមខ្លាំង នៅលើវាលស្មៅ ចំពោះការប្រកួត ដែលប្រើប្រាស់កីឡាករក្នុងស្រុកសុទ្ធ បន្ទាប់ពីក្រុមមានគោលការណ៍ មិនប្រើប្រាស់កីឡាករបរទេសមួយនេះ បានយកឈ្នះក្រុមកងយោធពលខេមរភូមិន្ទ (ទ័ព) ៤-០ ក្នុងការប្រកួតជម្រុះវគ្គ១៦ក្រុមពានរង្វាន់សម្តេច ហ៊ុន សែន (ថ្នាក់ជាតិ) ប្រចាំឆ្នាំ២០២១ កាលពីថ្ងៃពុធ ប៉ុន្តែសូលទីឡូអង្គរ គិរីវង់សុខសែនជ័យ និងខេត្តព្រៃវែង បានធ្លាក់ចេញពីការប្រកួតនេះដូចគ្នា។
ការរកបានម្នាក់១គ្រាប់ របស់កីឡាករល្អ សា ទី, យ៉ាន សុខា, អ៊ឹម វីនុន និង ទ្រី ប៊ុនស៊ាងយ៉ាលិន្ធ ដើម្បីយកឈ្នះក្រុមទ័ព ៤-០ កាលពីម្សិលមិញនេះ វាបានក្លាយជាលទ្ធផលដ៏ល្អបំផុត ដែលគេមិននឹកស្មានថា អគ្គិសនីកម្ពុជា អាចធ្វើបាននោះទេ ព្រោះក្រុមទ័ព ក៏មានកីឡាករក្នុងស្រុក ដែលមានគុណភាពលេង ច្រើនផងដែរ។
ចំណែកខ្សែប្រយុទ្ធ ម៉ាត នូរុណ បានបង្ហាញភាពលេចធ្លោខ្លាំង និងត្រូវបានជ្រើសរើសជាកីឡាករល្អប្រចាំការប្រកួត បន្ទាប់ពីរូបគេ រកបាន៣គ្រាប់តែម្នាក់ឯង ដើម្បីជួយឱ្យក្រុមបឹងកេតយកឈ្នះក្រុមសូលទីឡូអង្គរ ៤-០ កាលពីថ្ងៃពុធនោះដែរ ខណៈ ១ គ្រាប់ទៀត រកបានដោយ សឿត ណាវ៉ា។
ផ្ទុយពីនេះ គីរីវង់សុខសែនជ័យ បានក្លាយជាក្រុម ដែលមានការឈឺចាប់ខ្លាំងជាងគេ សម្រាប់ការធ្លាក់ចេញពីការប្រកួតពានរង្វាន់សម្តេច ហ៊ុន សែន ត្រឹមវគ្គ១៦ក្រុមនេះ ព្រោះពួកគេ បានចាញ់ក្រុមអាស៊ីអឺរ៉ុប ដោយការពិន័យបាល់ ១១ម៉ែត្រ នៅនាទីទី ៩០+៦ ដែលស៊ុតបានសម្រេចដោយកីឡាករ ព្រីង ចិត្រា។ ១ គ្រាប់ចុងក្រោយនេះ បានធ្វើឱ្យ ការព្យាយាមវាយបកតាមបានស្មើ ២-២ របស់ គិរីវង់ បានប្រែក្លាយជាគ្មានន័យ និងបានធ្លាក់ចេញពីការប្រកួតនេះ ដ៏ឈឺចាប់បំផុត។
យ៉ាងណាមិញ ក្រុមអង្គរថាយហ្គឺរ អាចសម្រេចការសងសឹក ទៅលើក្រុមខេត្តព្រៃវែង បានវិញហើយ។ អង្គរថាយហ្គឺរ ធ្លាប់បានធ្លាក់ចេញពីការប្រកួតនេះ ក្រោមស្នាដៃក្រុមខេត្តព្រៃវែង យ៉ាងអាម៉ាស កាលពីឆ្នាំ២០២០ ក្នុងវគ្គជម្រុះ១៦ក្រុមនេះតែម្តង ប៉ុន្តែការរកបានម្នាក់១គ្រាប់ របស់ កីឡាករ ឡុង ភារ៉ាត និង សុវណ្ណ ដូណា កាលពីម្សិមិញនេះ បានជួយឱ្យ អង្គរថាយហ្គឺរ អាចយកឈ្នះលើក្រុមខេត្តព្រៃវែង ២-០ បានវិញ ដើម្បីឡើងទៅកាន់វគ្គ៨ក្រុមចុងក្រោយ សាជាថ្មី។
ជាមួយគ្នានេះ ក្រុមភ្នំពេញក្រោន វិសាខា ណាហ្គាវើលដ៍ និងព្រះខ័នរាជស្វាយរៀង ក៏បានទម្លាក់គូប្រកួតរៀងៗខ្លួន កាលពីថ្ងៃអង្គារ ដើម្បីឡើងទៅកាន់ការប្រកួតវគ្គ៨ក្រុមចុងក្រោយ ជាមួយក្រុមបឹងកេត អគ្គិសនីកម្ពុជា អង្គរថាយហ្គឺរ និងក្រុមអាស៊ីអឺរ៉ុប ផងដែរ៕
