ជាមួយទស្សនវិស័យអភិវឌ្ឍបាល់ទាត់ ក្នុងរយៈពេលវែងឆ្ងាយរវាងអ្នកចាត់ក្រុម លោក Lee Tae-hoon និងសមាគមបាល់ទាត់កងយោធពលខេមរភូមិន្ទ (ទ័ព) បានបញ្ចប់ដ៏គួរឱ្យភ្ញាក់ផ្អើល ខណៈក្លិបមានមូលដ្ឋាននៅកីឡដ្ឋានស្តាតចាស់មួយនេះ បានប្រកាសពីការបញ្ចប់កុងត្រាជាមួយគ្រូបង្វឹកជនជាតិកូរ៉េខាងត្បូងម្នាក់នេះ កាលពីថ្ងៃពុធ ម្សិលមិញ។
តាមរយៈការបញ្ចប់កុងត្រាជាមួយអតីតគ្រូបង្វឹកក្រុមជម្រើសជាតិកម្ពុជា លោក Lee Tae-hoon នេះ ត្រូវបានគេមើលឃើញថា បានធ្វើឡើងលឿនពេក គឺខុសពីអ្វីដែលភាគី បានប្រកាស នៅក្នុងសន្និសីទកាសែត ស្តីពីការចុះកុងត្រា ក្នុងនាមជាអ្នកចាត់ការក្រុម លោក Lee Tae-hoon និងក្លិបមួយនេះ កាលពីថ្ងៃទី១ ខែមិថុនា ឆ្នាំ២០២១។
គួររំឭកថា នៅក្នុងសន្និសីទកាសែត ពេលចុះកុងត្រានោះ លោក Lee Tae-hoon ត្រូវបានប្រកាសតែងតាំងជាអ្នកការចាត់ក្រុមទ័ព ដែលមានរយៈពេល ២ ឆ្នាំ ប៉ុន្តែអគ្គលេខាធិការក្លិបកង យោធ ពលខេមរភូមិន្ទ លោក ខូវ ឆាយ បានអះអាងថា នេះគ្រាន់ជាកិច្ចសន្យាជំហានដំបូងប៉ុណ្ណោះ ព្រោះអ្វីដែលយើងបានចចារជាមួយគាត់ គឺយើងមានទិសដៅដើរជាមួយគាត់ក្នុងរយៈពេលយូរអង្វែង។
លោក ខូវ ឆាយ បានបញ្ជាក់នាពេលនោះថា៖ «យើងចុះកិច្ចសន្យាជាមួយគាត់ (Lee Tae-hoon) ២ ឆ្នាំសិន ប៉ុន្តែអ្វីដែលយើងចចារជាមួយគាត់ គឺយើងមានទិសដៅដើរជាមួយគាត់យូរអង្វែង ដោយសារតែយើងបានដឹង និងយល់ច្បាស់ពីបាល់ទាត់ គឺគ្មាននរណាមួយ អាចធ្វើឱ្យបាល់ទាត់មានការផ្លាស់ប្តូរភ្លាមៗ ក្នុងរយៈពេលខ្លីនោះទេ អ៊ីចឹងលោក Lee ក៏ត្រូវការពេលវេលាដូចគ្នា ដើម្បីឱ្យទិសដៅ និងទស្សនៈស្របគ្នារបស់យើង និងកីឡាកររបស់យើង អាចធ្វើទៅតាមអ្វីដែលគាត់ចង់បាន ហេតុនេះយើងជឿជាក់ថា យើងនឹងធ្វើការងារជាមួយគាត់ យូរជាង ២ ឆ្នាំ»។
តែទោះបីជាយ៉ាងណា ការបំពេញតួនាទីរបស់ Lee Tae-hoon មិនទាន់ទាំងបានកន្លះឆ្នាំស្រួលបួលផង ក៏ត្រូវបានសមាគមបាល់ទាត់កងយោធពលខេមរភូមិន្ទ ប្រកាសបញ្ចប់កុងត្រា ជាមួយអ្នកចាត់ការរូបនេះ ទាំងការប្រកួតលីគកំពូលកម្ពុជា ឆ្នាំ២០២១ នៅសល់១លើកទៀត ប៉ុន្តែភាគីទាំង១ ពិសេសក្រមទ័ព មិនបានបង្ហាញពីមូលហេតុច្បាស់លាស ចំពោះការផ្តាច់កុងត្រា មុនពេលកំណត់នេះទេ។
សមាគមបាល់ទាត់កងយោធពលខេមរភូមិន្ទ បានត្រឹមប្រកាសព័ត៌មានបែបខ្លី ចំពោះការបញ្ចប់កុងត្រានេះ កាលពីថ្ងៃពុធម្សិលមិញថា៖ «សមាគមកីឡាបាល់ទាត់កងយោធពលខេមរភូមិន្ទ Tiffy Army FC បានសម្រេចបញ្ចប់កិច្ចសន្យា ជាមួយលោក Lee Tae-hoon ត្រឹមថ្ងៃនេះហើយ។សូមជូនពរ លោក Lee Tae-hoon ជោគជ័យក្នុងកិច្ចការងារលើវិស័យកីឡាបាល់ទាត់មួយនេះ»៕
