បរទេស៖ គ្រូបង្វឹកមួយចំនួនបានបាត់បង់តួនាទីនៅប៉ុន្មានសប្តាហ៍ថ្មីៗនេះមានដូចជាលោកNuno Espirito Santoនិងលោក Ronald Koeman និង Dean Smith ។ ព្រោះតែតម្រូវការចាំបាច់សម្រាប់លទ្ធផលក្រុមដែលទាមទារសម្រាប់បាល់​ទាត់សម័យ​ទំនើបគឺធ្វើយ៉ាងណាគឺដឹកនាំក្រុមទទួលបានជ័យជំនះផ្ទុយទៅវិញវាក៏ជាការងារប្រឈមនិងហានិភ័យបាត់បង់តួនាទី ប្រសិន ដឹកនាំក្រុមមិនបានល្អ។ ឧទាហរណ៏ដូចជាលោក Sir Alex Ferguson ដែលបានដឹកនាំក្លឹបអស់ជាច្រើនទសវត្សក្តី យ៉ាងណាក៏ដោយ សូម្បី​តែលោក Ferguson ក៏ធ្លាប់ត្រូវបានក្លឹបស្កុតឡេន St. Mirren ធ្លាប់ចែកផ្លូវគ្នាជាមួយរូបលោកផងដែរ។

ដូច្នេះខាងក្រោមនេះ​គឺជាគ្រូ​បង្វឹក ៥ រូបដែលមិនធ្លាប់​ត្រូវ​បាន​​បណ្តេញ​ចេញនោះទេៈ

១.Didier Deschamp​

Didier Deschamps គឺជាមនុស្សម្នាក់ក្នុងចំណោមមនុស្សបីនាក់ប៉ុណ្ណោះដែលបានឈ្នះពានរង្វាន់ FIFA World Cup ក្នុងនាមជាកីឡាករ និងអ្នកចាត់ការទូទៅ។ ពេលចាប់ផ្តើមអាជីពជាមួយ​ក្លឹបអាជីព​AS Monaco គាត់បានដឹកនាំក្លឹប​ឱ្យឈ្នះ​ពាន French League Cup និងនាំ Monaco ដល់វគ្គផ្តាច់ព្រ័ត្រ  Champions League ជាលើកដំបូងរបស់ពួកគេក្នុងឆ្នាំ ២០០៤ តែបានបានលាលែងពីតំណែងនៅរដូវក្តៅឆ្នាំ ២០០៥ ។ ក្រោយមករូបលោកបានជួយJuventus ត្រលប់ពី Serie B មកលេងនៅលីកកំពូលអ៊ីតាលីវិញ ​មុនពេលដឹកនាំMarseille អោយឈ្នះពាន៣រួមទាំងពានLigue-១ផងដែរ។ លោក Deschampsស្ទើរតែត្រូវបានក្លឹបបណ្តេញចេញពេលដែលដឹកនាំ Marseille បញ្ចប់ចំណាត់ថ្នាក់លេខ១០នៅរដូវ​កាល​២០១១-២០១២ តែបានសម្រេចចែកផ្លូវគ្នាក្នុងកិច្ចព្រមព្រៀងទៅវិញទៅមក។ បច្ចុប្បន្នលោក Deschamps គឺជាអ្នកចាត់​ការទូទៅរបស់ក្រុមជម្រើសជាតិបារាំងហើយត្រូវបានគេរំពឹងថានឹងបន្តតួនាទីនេះរហូតដល់ចុងឆ្នាំ២០២២។

២.Zinedine Zidane

ចាប់ផ្តើមអាជីពជាគ្រូបង្វឹកឈុតធំ Zinedine Zidane បានអភិវឌ្ឍសមត្ថភាពរបស់ខ្លួនក្លាយជាគ្រូបង្វឹកដ៏ ជោគជ័យបំផុត​ក្នុងប្រវត្តិសាស្ត្ររបស់ Real Madrid ក្រោយចូលមកកាន់តួនាទី២ដងផ្សេងគ្នា។ជាមួយនឹងការឈ្នះពានសរុបចំនួន ១១ ដែលក្នុងនោះបុរសសញ្ជាតិបារាំងរូបនេះបានឈ្នះពានរង្វាន់គ្រូបង្វឹកល្អបំផុតរបស់ពិភពលោក IFFHS ក្រោយជួយReal Madridឈ្នះពានក្របខណ្ឌ Champion League បីឆ្នាំជាប់គ្នា។ក្រោយសម្រេចចែកផ្លូវគ្នាជាមួយក្លឹបគ្រូបង្វឹក​វ័យ៤៩ឆ្នាំ​បច្ចុប្បន្ន​​​​អាច​នឹង​ត្រលប់​មកដឹកនាំក្រុម​វិញ​ក្នុង​ពេល​ឆាប់ៗ​នេះ ខណៈMan.Utd គឺជាក្លឹបដែល​ចង់បានរូបលោក​មកដឹកនាំ​ដើម្បី​ជួបជុំជាមួយ Cristiano Ronaldo និង Raphael Verane ឡើងវិញ។

៣.Diego Simeone

Diego Simeone គឺជាគ្រូបង្វឹកឆ្នើមម្នាក់ទៀតដែលបានកាន់កាប់តួនាទីរយៈពេល១០ឆ្នាំជាមួយក្រុម Atletico Madrid ។គ្រូបង្វឹកសញ្ជាតិអាហ្សង់ទីនរូបនេះបានបង្អាក់ដំណើរការគ្រប់គ្រងពានLa Ligaរយៈពេលវែងរបស់ Real Madrid-Barcelona ដោយបានឈ្នះពានLa Liga ចំនួនពីរដងនិងបានជួយអោយ Atletico Madrid ដល់វគ្គផ្តាច់ព្រ័ត្រនៃយុទ្ធនាការ UEFA Champions Leagueរដូវកាល២០១៣-២០១៤ និង ២០១៥-២០១៦។

៤.Jurgen Klopp

Kloppគឺជាបុគ្គលតែម្នាក់គត់ដែលបានដឹកនាំ ក្រុមប្រជែងជាមួយ Bayern Munich កំឡុងពេលគាត់នៅ Borussia Dortmund ។ គាត់បានបង្អាក់ដំណើរការកាន់កាប់ពានលីគកំពូលរបស់Bayern Munich ក្នុង​រយៈ​ពេល ១១ ឆ្នាំ និងបាន​ឈ្នះ​ពាន Bundesliga ២ឆ្នាំជាប់ៗគ្នា(២០១០-២០១២)អំឡុងពេលប្រាំពីរឆ្នាំនៅទឹកដី Signal Iduna Park ។ក្រោយ​ចូលមកដឹកនាំក្លឹបរយៈពេល៦ឆ្នាំ លោកKloppបាន​ដឹកនាំ Liverpool ឈ្នះ​ជើងឯក​លីគកំពូល Premier League និង Champions League ជាលើកដំបូង​ក្នុង​រយៈពេល ១៤ ឆ្នាំ។

៥.Pep Guardiola

Pep Guardiola គឺជាអ្នកចាត់ការជោគជ័យបំផុតនៅសតវត្សទី ២១នេះ ជាមួយនឹងពានរង្វាន់ជាង៣០ដែលរូប​លោក​បាន​ឈ្នះ ។ លោក Guardiola បានទទួលការងារដឹកនាំឈុតធំដំបូងរបស់គាត់ក្នុងឆ្នាំ ២០០៨ ។គាត់បានបង្វឹក​កីឡាករ​ឆ្នើមៗ​មានដូចជា Lionel Messi, Xavi និង Andres Iniesta នៅក្នុងក្រុមដោយនាំក្លឹបឈ្នះពាន La Liga ៣ដង និង Champion League ២ដង មុនពេលផ្លាស់ទៅដឹកនាំBayern Munichនៅឆ្នាំ២០១៣ដោយជួយពួកគេ ឈ្នះពាន៣រដូវកាល​ជាប់ៗគ្នា​ផង​ដែរ។បច្ចុប្បន្នបុរសវ័យ ៥០ ឆ្នាំរូបនេះ កំពុងដឹកនាំ Man. City ចាប់តាំងពីឆ្នាំ២០១៦ និងបានឈ្នះពានលីកកំពូលចំនួន ៣ ក្នុងរយៈពេល ៤រដូវកាលចុងក្រោយនេះជាមួយពានLeague Cup ៣ឆ្នាំចុងក្រោយជាប់គ្នាផងដែរ។