ក្រុមកីឡាករជម្រើសជាតិកីឡាម៉ូតូទឹកកម្ពុជា បានបន្តរក្សាការឈ្នះមេដាយមាស នៅក្នុងការប្រកួតកីឡាម៉ូតូទឹកជើងឯកអាស៊ី នៅលើកទឹកដីថៃ ប៉ុន្តែសម្រាប់ការប្រកួតជុំទី២នេះ ម្ចាស់ជយលាភីមេដាយមាស មិនមែនជាវីរកីឡាករ សាលី អ៊ូមើត ដែលធ្លាប់ឈ្នះមេដាយមាស១ និងសំរឹទ្ធ១ ពីការប្រកួតកីឡាអាស៊ី នោះទេ។
សម្រាប់ការប្រកួតកីឡាម៉ូតូទឹកជើងឯកអាស៊ី នៅលើកទឹកដីប្រទេសថៃនេះ កាលពីជុំ១ កន្លងមក កីឡាករ សាលី អ៊ូមើត បានក្លាយជាបេក្ខភាពតំណែងឱ្យកម្ពុជា ដែលបានឈ្នះមេដាយមាស ខណៈមិត្តរួមក្រុមរបស់គេផ្សេងទៀត បានត្រឹមលេខ៤ លេខ៥ លេខ៦ និងលេខ៧ ប៉ុណ្ណោះ។
យ៉ាងណាក៏ដោយ សម្រាប់ការប្រកួតជុំទី២ ដែលទើបបានបញ្ចប់ ជាផ្លូវការ កាលពីថ្ងៃអាទិត្យ ម្សិលមិញនេះ វីរកីឡាករ សាលី អ៊ូមើត បានត្រឹមលេខ៤ប៉ុណ្ណោះ ហើយកីឡាករ សាលី ហ្វីលីន ក៏បានជាប់ចំណាត់ថ្នាក់លេខ៤ សម្រាប់ការប្រកួតនេះជុំទី២ នេះផងដែរ ហើយកីឡាករដែលដណ្តើមបានមេដាយមាសលេខ១ ឱ្យកម្ពុជា មីន ម៉ូសស្តាន។ នេះបើតាមលទ្ធផលដែល សាលី អ៊ូមើត បានបង្ហោះនៅលើហ្វេសប៊ុករបស់ខ្លួន កាលពីថ្ងៃអាទិត្យ។
ជាមួយគ្នានេះកីឡាករជម្រើសជាតិកម្ពុជា សាលី អ៊ូមើត ក៏បានអរគុណដល់អ្នកគាំទ្រនៅកម្ពុជា ដែលតែងតែគាំទ្រ និងលើកទឹកចិត្តដល់ពួកគេផងដែរ។ អ៊ូមើត បានសរសេរថា៖«បានអគុណ សម្រាប់ការគាំទ្រ ផ្ដល់កម្លាំងចិត្ត ដល់ក្រុមកីឡាករជម្រើសជាតិម៉ូតូទឹកកម្ពុជា។ ពួកយើងនឹងខិតខំប្រឹងប្រែងហ្វឹកហាត់បន្ត ដើម្បីរកជ័យជម្នះមកជូនប្រទេសជាតិកម្ពុជាយើង បន្តទៅមុខទៀត»៕
