ក្រុមវិសាខា បាននឹងកំពុងស្ថិតនៅលើមាត់ជ្រោះ ដែលអាចនឹងបាត់បង់ឱកាស សម្រាប់ការឈានទៅរកការការពារតំណែងជើងឯក នៃពានរង្វាន់សម្តេច ហ៊ុន សែន ប្រចាំឆ្នាំ២០២១ របស់ខ្លួន ខណៈពួកគេ កំពុងចាញ់ប្រៀបក្រុមបឹងកេត ជាមួយលទ្ធផលមិនទាន់ផ្លូវការ ១-០ កាលពីថ្ងៃចន្ទនោះ។
តាមរយៈការប្រកួត នៅកីឡដ្ឋានខេមបូឌាអ៊ែរវ៉េ កាលពីថ្ងៃម្សិលមិញនេះ ការប្រកួតរវាងក្រុមម្ចាស់ផ្ទះបឹងកេត និងវិសាខា មិនអាចដំណើរការប្រកួត បានចប់៩០នាទីពេញ ទៅតាមគម្រោងនោះទេ គឺក្រុមទាំង២នេះ ប្រកួតបានត្រឹម ៥៣ នាទី ក៏ត្រូវបានគណៈកម្មការរៀបចំការប្រកួត ពន្យារពេល ចំនួន ៣០ នាទី ២ ដង ដោយសារមានការរំខាន ដោយសារភ្លៀងខ្លាំងពេក។
នៅក្រោយការពន្យារពេល ៣០ នាទី២ដងហើយនោះ គឺស្ថានភាពទឹកភ្លៀង កាលពីល្ងាចថ្ងៃចន្ទនោះ មិនបានថមថយ គឺនៅតែបន្តជន់លិចទីលាន ជាហេតុនាំឱ្យអាជ្ញាកណ្តាល និងគណៈកម្មការ ព្រមទាំងភាគីក្លិបទាំង២ សម្រេចលើកពេលការប្រកួតតែម្តង ដែលត្រូវយកមកប្រកួតបន្ត នៅរសៀលម៉ោង ៣ ថ្ងៃអង្គារនេះ។
យ៉ាងណាក៏ដោយ នៅមុនពេល សម្រេចលើកពេលប្រកួត នៅនាទីទី ៥៣ នេះ ក្រុមបឹងកេត បានធ្វើការនាំមុខ ១-០ រួចទៅហើយ តាមរយៈគ្រាប់បាល់របស់ខ្សែការពារ សឿត ណាវ៉ា នៅនាទីទី ១៧ ហេតុនេះ វិសាខា នៅសល់ពេលត្រឹម ៣៧ នាទីទៀតប៉ុណ្ណោះ ដើម្បីបង្រ្គប់ឱ្យគ្រប់ ៩០ នាទីពេញ សម្រាប់ការប្រកួតបន្តឡើងវិញ នៅរសៀលថ្ងៃនេះ។
តាមរយៈលទ្ធផលជាបណ្តោះអាសន្ន ១-០ និងពេលវេលាសេសសល់នេះ អាចបង្ហាញបានថា ក្រុមវិសាខា កំពុងស្ថិតនៅក្នុងភាពមិនច្បាស់លាស់ ដែលអាចនឹងគ្មានឱកាសបានទៅវគ្គផ្តាច់ព្រ័ត្រ បើសិនជា ពួកគេ មិនអាចរកបានគ្រាប់បាល់តាមស្មើ ឬវាយបកយកឈ្នះក្រុមបឹងកេត បានវិញទេនោះ។
ជាមួយគ្នានេះ ក្រុមបឹងកេត អាចនឹងផ្លាស់ប្តូរទម្រង់លេង សម្រាប់ការប្រកួតបង្រ្គប់ចំនួន៣៧នាទី នៅថ្ងៃនេះ ដោយគ្រូបង្គោល លោក គឹម ភក្តី អាចនឹងរៀបចំប្រព័ន្ធលេង បែបការពារ ដើម្បីរក្សាការមានប្រៀបនេះ ព្រោះ បឹងកេត ត្រូវការឈ្នះពានរង្វាន់សម្តេច ហ៊ុន ខ្លាំងដូចគ្នា ដើម្បីប៉ះពៅ ចំពោះការបាត់បង់តំណែងជើងឯកលីគកំពូលកម្ពុជា ឆ្នាំ២០២១ ហើយ បឹងកេត ក៏ធ្លាប់បានឈ្នះពានសម្តេចនេះ បានម្តង កាលពីឆ្នាំ២០១៩ ផងដែរ៕
