បរទេស៖ ក្រុម Manchester City បានផ្តួល Paris Saint-Germain ក្នុងលទ្ធផល ២-១ កាលពីថ្ងៃពុធ ប៉ុន្តែ ក្រុមទាំង២ បានឈានទៅវគ្គ១៦ក្រុមចុងក្រោយនៃក្របខ័ណ្ឌ Champions League ដូចគ្នា រួមជាមួយនឹងក្រុម Real Madrid និង Inter Milan ដែរ។
ខ្សែប្រយុទ្ធ Gabriel Jesus បានស៊ុតបាល់បំប៉ោងសំណាញ់ទីក្រោយពីការបញ្ជូនបាល់របស់ Bernardo Silva នៅនាទី ទី៧៦ ដើម្បីកាត់សេចក្តីក្នុងការប្រកួតដ៏ស្វិតស្វាញ នាកីឡដ្ឋាន Etihad ក្រោយពី Raheem Sterling បានរកគ្រាប់បាល់តាមស្មើរបស់ Kylian Mbappe។ ក្រុម Man City របស់លោក Pep Guardiola ដែលជាជើងឯករងកាលពីរដូវកាលមុន នឹងត្រូវបញ្ចប់ដោយការឈរលេខ១ក្នុងពូល A ស្របពេលដែល PSG ឈានទៅវគ្គបន្តក្នុងនាមជាក្រុមឈរលេខ២ បើទោះបីរងបរាជ័យក៏ដោយ ដោយសារតែក្រុម RB Leipzig បានផ្តួលក្រុម Club Brugge ៥-០ នៅបែលហ្ស៊ិក។
ជាមួយគ្នានេះ ខ្សែប្រយុទ្ធ Karim Benzema បានស៊ុតបាល់បញ្ចូលទីក្នុងរយៈពេលត្រឹមតែប៉ុណ្ណោះ ក្រោយពីត្រូវបានរកឃើញថា មានកំហុសដោយតុលាការប្រទេសបារាំង ក្នុងករណីគំរាមគំហែង ក្នុងពេលដែល Real Madrid បានផ្តួលក្រុម Sheriff Tiraspol ៣-០ ដើម្បីទៅវគ្គបន្ត។ ជ័យជម្នះនេះ ជួយឲ្យ Real វិលទៅឈរលើកំពូលតារាងនៃពូល D ដោយនាំមុខ២ពិន្ទុលើក្រុមឈរលេខ២ Inter Milan ដែលក៏បានឈានទៅវគ្គ១៦ក្រុមចុងក្រោយផងដែរ បន្ទាប់ពីផ្តួលក្រុម Shakhtar Donetsk ២-០៕
ប្រភពព័ត៌មាន៖ Channel News Asia