ក្រុមបាល់ទាត់កោះកុងអេហ្វស៊ី បានជួបឧបសគ្គតាំងពីដើមទី សម្រាប់ការឈានទៅរកការសម្រេចបំណង និងមហិច្ឆតាធំរបស់ខ្លួន ខណៈពួកគេ បានជួបការបរាជ័យ នៅលើទឹកដីខ្លួនឯង សម្រាប់ការប្រកួតបើកឆាកជម្រើសជើងឯកកម្ពុជា លីគ២ ឆ្នាំ៣២០២១ នោះ ប៉ុន្តែអតីតក្រុមធ្លាប់លេងនៅលីគកំពូលកម្ពុជា សាលាកីឡាបាល់ទាត់ជាតិ បានបង្ហាញឱ្យឃើញថា ពួកគេ អាចនឹងមានសមត្ថភាព ដណ្តើមបានកៅអី ឡើងមកលេង នៅលីគកំពូល ឆ្នាំ២០២២ វិញ។
នៅមុនការប្រកួតលីគ២ បានចាប់ផ្តើម កាលពីថ្ងៃសៅរ៍ កន្លងមកនេះ គ្រូបង្គោលក្រុមកោះកុងអេហ្វស៊ី លោក ហុក សុជីវ័ន បានបញ្ជាក់ថា គោលដៅធំរបស់ក្រុមមានមូលដ្ឋាននៅដែនសមុទ្រមួយនេះ ត្រូវ គឺការប្រជែងឱ្យបានតំណែងជើងឯក នៅលីគ២នេះ ដើម្បីទទួលបានឱកាស ឡើងទៅលេងនៅលីគកំពូលកម្ពុជា ឆ្នាំ២០២២ ទៅតាមផែនការរបស់ថ្នាក់ដឹកនាំក្លិប បានដាក់ចេញ។
«គោលដៅវែងឆ្ងាយរបស់យើង ជាមួយថ្នាក់ខេត្ត គឺសម្លឹងរកពានរង្វាន់លីគ២។ យើងត្រូវប្រជែងឱ្យបានកៅអី សម្រាប់ការឡើងទៅលេងនៅលីគកំពូលកម្ពុជា ហើយនេះជាគោលដៅសំខាន់ ដែលយើងត្រូវធ្វើឱ្យបាន»។ នេះជាសម្តីរបស់លោក ហុក សុជីវ័ន បានថ្លែង បន្ទាប់ពីលោកបានដឹកនាំក្រុមកោះកុងអេហ្វស៊ី ឈ្នះតំណែងជើងឯកថ្នាក់ខេត្ត ពានរង្វាន់សម្តេចហ៊ុនសែន ឆ្នាំ២០២១ កាលពីខែតុលា កន្លងមកនេះ។
តែទោះបីជាយ៉ាងណា ការបោះជំហានទៅរកការសម្រេចគោលដៅធំនេះ របស់ក្រុមកោះកុង បានជួបឧបសគ្គតាំងពីដើមទី ខណៈពួកគេ បានចាញ់ក្រុមU21កងយោធពលខេមរភូមិន្ទ ២-១ នៅថ្ងៃបើកឆាកនោះ ហើយការចាញ់នេះ វាបានបន្ថែមសម្ពាធផងដែរ សម្រាប់លោក ហុក សុជីវ័ន ព្រោះនៅក្នុងចំណោមក្រុមទាំង៨ ដែលបានចូលរួមការប្រកួតលីគ២នេះ គឺមានតែ១ក្រុមប៉ុណ្ណោះ ដែលមានសិទ្ធ ឡើងទឬៅលេង នៅលីគកំពូលកម្ពុជា ឆ្នាំ២០២២ ជំនួសក្រុមសូលទីឡូអង្គរ ដែលទើបត្រូវបានកាត់ចេញ ក្នុងនាមជាក្រុម ដែលមានពិន្ទុតិចជាងគេ នៅរដូវកាលនេះ។
ផ្ទុយពីនេះក្រុមសាលាកីឡាបាល់ទាត់ជាតិ ដែលទើបបានធ្លាក់ និងកាត់ចេញពីលីគកំពូលកម្ពុជា កាលពីឆ្នាំ២០២០នោះ បានបង្ហាញឱ្យឃើញពីភាពរីកច្រើន ក្នុងនាមជាក្រុមយុវជនថ្នាលរបស់សហព័ន្ធកីឡាបាល់ទាត់កម្ពុជា ហើយការយកឈ្នះក្រុមម្ចាស់ផ្ទះឬទ្ធីសែន ៤-០ ក្នុងជំនួបបើកឆាក លីគ២នេះ បានជារតម្រុយដ៏ល្អសម្រាប់ពួកគេ ក្នុងការបន្តប្រកួតប្រជែង យកកៅអី ឡើងទៅលេងនៅលីគកំពូលវិញ។
ជាមួយគ្នានេះ ក្រុម ISI ដង្កោសែនជ័យ ដែលបានដាក់គោលដៅប្រជែងយកពានលីគ២ដែរនោះ បានយកឈ្នះក្រុមសៀមរាប ៤-១ ហើយក្រុមមន្ទីរអយកខេត្តត្បូងឃ្មុំ ក៏បានយកឈ្នះម្ចាស់ផ្ទះខេត្តបន្ទាយមានជ័យ ៥-២ ដើម្បីទទួលបាន៣ពិន្ទុ សម្រាប់ការប្រកួតបើកឆាកនេះ ផងដែរ៕