កីឡាករជម្រើសជាតិប្រដាល់សកលកម្ពុជា វី សម្ភស្ស បានអះអាងថា រូបគេ នឹងយកប្រាក់រង្វាន់ ដែលទទួលបានពីការឈ្នះជើងឯក នៅក្នុងព្រឹត្តិការណ៍កីឡាប្រដាល់សកល Ultimate Boxing Championship 2021 កាលពីថ្ងៃអាទិត្យ យកទៅជួយដល់ម្តាយរបស់គេ ហើយមួយចំនួនទៀត រក្សាទុកសម្រាប់ការចំណាយរបស់ខ្លួនឯង។
«ប្រាក់រង្វាន់ ៣លានរៀលនេះ ខ្ញុំសន្សំទុកសម្រាប់ខ្លួនឯងខ្លះ និងយកទៅជួយម៉ែខ្ញុំខ្លះ សម្រាប់ដោះស្រាយជីវភាព»។ នេះជាសម្តីរបស់ វី សម្ភស្ស បន្ទាប់ពីរូបគេបានក្លាយជាម្ចាស់ជើងឯក នៅក្នុងព្រឹត្តិការណ៍កីឡាប្រដាល់សកល Ultimate Boxing Championship 2021 កាលពីថ្ងៃអាទិត្យ។
នៅក្នុងការប្រកួតផ្តាច់ព្រ័ត្រ កាលពីថ្ងៃអាទិត្យនោះ វី សម្ភស្ស បានយកឈ្នះលើ ទូច ដេវីត ដោយពិន្ទុ ហើយវាក៏ជជ័យជម្នះលើទី២ សម្រាប់រូបគេផងដែរ ព្រោះនៅមុនការឡើងមកជួបគ្នា នៅវគ្គដ៏សំខាន់នេះ វី សម្ភស្ស បានយកឈ្នះដោយពិន្ទុលើ ទូច ដេវីត ដោយពិន្ទុម្តងហើយ នៅក្នុងការប្រកួតវិលជុំ គឺបន្ទាប់ទៅលើការយកឈ្នះ សែត សារិត និងការផ្តួល ម៉ាង ព្រហ្មម៉ាញ ឱ្យសន្លប់។
ជាមួយគ្នានេះ វី សម្ភស្ស បានអះអាងថា ការបង្កើតឱ្យមានការប្រកួតដណ្តើមប្រាក់លាន សម្រាប់ក្រុមជម្រើសជាតិ ក្នុងព្រឹត្តិការណ៍កីឡាប្រដាល់សកល Ultimate Boxing Championship នេះ ពិតជាមានសារៈសំខាន់ ចំពោះរូបគេ និងក្រុមជម្រើសជាតិ ក្នុងការបង្កើនសមត្ថភាព និងបច្ចេកទេសបន្ថែម។
សិស្សគណក្លិបនាយកដ្ឋានអង្គរក្ស បានបញ្ជាក់ថា៖ «ខ្ញុំគិតថា ការប្រកួតនេះ ពិតជាសំខាន់សម្រាប់ខ្ញុំ ដែលមិនត្រឹមតែដណ្តើមបានប្រាក់រង្វាន់លើកទឹកចិត្តប៉ុណ្ណោះទេ ប៉ុន្តែថែមទាំងចំណេញបានទាំងបច្ចេកទេសកាន់តែច្រើន ព្រោះការហ្វឹកហាត់ក្នុងក្រុមជម្រើសជាតិកាន់តែល្អ គឺដោយសារមានការប្រកួតកាន់តែច្រើន ព្រមទាំងបន្ថែមបាននូវគុណភាពបច្ចេកទេសកាន់តែខ្ពស់ រួមទាំងបទពិសោធលើសង្វៀនផងដែរ»។
ចំណែកលោក ប៊ុយ សុភ័ណ្ឌ អគ្គលេខាធិការសហព័ន្ធកីឡាប្រដាល់សកលកម្ពុជា បាននិយាយថា ព្រឹត្តិការណ៍ Ultimate Boxing Championship 2021 នេះ ជាគោលដៅបង្កើនបច្ចេកទេស ឆ្ពោះទៅប្រជែងមេដាយ ស៊ីហ្គេម ២លើកចំពោះមុខ ហើយតាមរយៈការប្រកួតនេះយើងអាចវាយតម្លៃជារួមថា វាជាជោគជ័យដ៏ត្រចេះត្រចង់»។
លោកបានបន្ថែមថា៖ «អ្វីដែលទទួលបានពីការខិតខំ រៀបចំការប្រកួតនេះ គឺយើងទទួលបានអត្ថប្រយោជន៍នៃការពង្រឹងកម្រិតបច្ចេកទេសរបស់កីឡាករជម្រើសជាតិ ត្រៀមទៅចូលរួមប្រកួតជើងឯកថ្នាក់ជាតិ នាថ្ងៃទី ២៣-២៦ ខែធ្នូ ឆ្នាំ២០២១ ព្រមទាំងជួយជំរុញឱ្យក្រុមជម្រើសជាតិ កាន់តែមានបច្ចេកទេសគ្រប់គ្រាន់ ត្រៀមឆ្ពោះទៅចូលរួមប្រកួតប្រជែងមេដាយ ក្នុងស៊ីហ្គេម លើកទី៣១ នៅប្រទេសវៀតណាម នាខែឧសភា ឆ្នាំ២០២២។ ជាមួយគ្នានេះ មន្ត្រីបច្ចេកទេសរបស់យើង ក៏ទទួលបាននូវបទពិសោធថ្មីៗពីការរៀបចំ ការផ្គូផ្គងកីឡាករ កីឡាការិនី ផងដែរ ដូច្នេះចាប់ពីឆ្នាំ២០២២តទៅ យើងបានដាក់ក្តីសង្ឃឹមខ្ពស់ ក្នុងការធ្វើឱ្យព្រឹត្តិការណ៍នេះ កាន់តែរីចកម្រើន និងទទួលបានការគាំទ្រពីមហាជនថែមទៀត»។
គួរបញ្ជាក់ថា ការប្រកួតជើងឯកប្រដាល់សកល ក្នុងព្រឹត្តិការណ៍ Ultimate Boxing Championship 2021 នេះ សហព័ន្ធកីឡាប្រដាល់សកលកម្ពុជា បានដាក់កីឡាករជម្រើសជាតិ៤នាក់ឱ្យប្រកួតគ្នានេះ ហើយតាមរយៈការប្រកួតនោះ កីឡាករ សែត សារឹត និង ម៉ាង ព្រហ្មម៉ាញ សុទ្ធតែបានធ្លាក់នៅវគ្គជម្រុះ។ ចំណែកការប្រកួតផ្តាច់ព្រ័ត្រប្រចាំសប្តាហ៍ទី៦ កាលពីថ្ងៃអាទិត្យ ម្សិលមិញ វី សម្ភស្ស បានយកឈ្នះដោយពិន្ទុលើ ទូច ដេវីត ដើម្បីក្លាយជាម្ចាស់ជើងឯក អមដោយប្រាក់រង្វាន់៣លានរៀល ខណៈអ្នកចាញ់ ទូច ដេវីត បានប្រាក់រង្វាន់ចំនួន១លានរៀល៕