ក្រុមវិសាខា ដែលទើបបង្កើតកំណត់ត្រាថ្មី ដោយការឈ្នះពានរង្វាន់សម្តេចហ៊ុនសែន ចំនួន២ឆ្នាំជាប់ៗគ្នានោះ បាននាំយកកីឡាករមានបទពិសោធម្នាក់ទៀត ឈង់ ប៊ុនណាត មកជួយដល់ក្រុម សម្រាប់ត្រៀមការប្រកួតរដូវកាលថ្មី ឆ្នាំ២០២២ ក៏ដូចជាការប្រកួតប្រជែង នៅលើឆាកអន្តរជាតិ នាពេលខាងមុខនេះ។
សមាជិកថ្មីរបស់ក្រុមមានមូលដ្ឋាននៅកីឡដ្ឋានព្រីនស៍ វិសាខា គឺជាខ្សែការពារដ៏រឹងមាំរបស់ក្លិបបាល់ទាត់អង្គរថាយហ្គឺរ ដោយរូបគេបានលេងឱ្យ ក្រុមមានមូលដ្ឋាននៅខេត្តសៀមរាបមួយនេះ បានរយៈពេល៤ឆ្នាំមកហើយ ហើយ អង្គរថាយហ្គឺរ បានប្រកាសពីការចែកផ្លូវជាមួយ ឈង់ ប៊ុនណាត កាលពីថ្ងៃអាទិត្យ ម្សិលមិញ។
ចំណែកក្រុមវិសាខា បានប្រកាសពីការចុះកុងត្រាជាមួយខ្សែការពារលេខ៤ ឈង់ ប៊ុនណាត នៅថ្ងៃចន្ទនេះ ហើយវត្តមានរបស់គេ នឹងធ្វើឱ្យតំបន់ការពាររបស់ក្រុមវិសាខា កាន់តែមានភាពរឹងមាំ ខណៈបច្ចុប្បន្ន វិសាខា បានក្លាយជាក្លិប ដែលមានធនធានកីឡាករក្នុងស្រុកសម្បូរបែបជាងគេ។
ជាមួយគ្នានេះ ការយកឈ្នះក្រុមព្រះខ័នរាជស្វាយរៀង ដោយបាល់ប៉េណាល់ទី ៥-៤ បន្ថែមទៅលើការស្មើគ្នា ២-២ ក្នុងការប្រកួតផ្តាច់ព្រ័ត្រ ពានរង្វាន់សម្តេចហ៊ុនសែន កាលពីថ្ងៃព្រហស្បតិ៍ សប្តាហ៍មុននេះ ដើម្បីបន្តលើកពានចំនួន២ឆ្នាំជាប់ៗគ្នានោះ វាបានបង្ហាញរួចទៅហើយថា វិសាខា ជាក្រុមខ្លាំងជាងគេ នាពេលនេះ សម្រាប់ការប្រកួត ដោយប្រើប្រាស់កីឡាករក្នុងស្រុកសុទ្ធ។
យ៉ាងណាក៏ដោយ តាមប្រភពក្រៅផ្លូវការ បានឱ្យដឹងថា វិសាខា បានចែងចូវកីឡាករ ឈង់ ប៊ុនណាត បានសម្រេច តាំងពីបញ្ចប់ការប្រកួតជើងទី១ លីគកំពូលកម្ពុជា ឆ្នាំ២០២១នេះ ហើយថ្នាក់ដឹកនាំក្លិបអង្គរថាយហ្គឺរ ក៏បានដឹងពីរឿងនេះដែរ ប៉ុន្តែអ្វីដែលគួរឱ្យសរសើរនោះ គឺអង្គរថាយហ្គឺរ នៅតែបន្តដាក់ ឈង់ ប៊ុនណាត ឱ្យលេង នៅក្នុងជម្រើសរើស១១នាក់ដំបូង រហូតដល់ចប់រដូវកាលតែម្តង៕
