ក្រុមជម្រើសជាតិកម្ពុជា បានចាកចេញពីមាតុប្រទេស ឆ្ពោះទៅកាន់ទឹកដីប្រទេសសិង្ហបុរី កាលពីព្រឹកថ្ងៃព្រហស្បតិ៍ ដើម្បីចូលរួមប្រជែង ក្នុងការប្រកួតពានរង្វាន់ AFF Suzuki Cup 2020 នៅទីនោះ ដែលនឹងចាប់ផ្តើមពីថ្ងៃទី៥ ខែធ្នូ ឆ្នាំ២០២១ រហូតដល់ថ្ងៃទី១ ខែមករា ឆ្នាំ២០២២។
បើតាមអ្នកចាត់ការក្រុមជម្រើសជាតិកម្ពុជា លោក ឈូក សិសិដ្ឋ បានឱ្យដឹងថា កីឡាករជម្រើសជាតិ ដែលបានជាប់ឈ្មោះ នៅក្នុងបញ្ជីឈ្មោះក្រុមជម្រើសជាតិកម្ពុជា ទាំង៣០នាក់ របស់សហព័ន្ធកីឡាបាល់ទាត់កម្ពុជា គឺមិនមាននរណាម្នាក់ បាត់បង់ឱកាស សម្រាប់ការចេញទៅបំពេញភារកិច្ច លើកនេះទេ។
«យើងយកទាំង៣០នាក់ហ្នឹង ទៅចូលរួមការប្រកួត ពានរង្វាន់ AFF Suzuki Cup 2020 នេះតែម្តង ព្រោះពួកគាត់ សុទ្ធតែអាចលេងបានទាំងអស់»។ នេះជាការបញ្ជាក់របស់លោក ឈូក ពិសិដ្ឋ មុនពេលលោកបានដឹកនាំក្រុមកម្ពុជា ចាកចេញពីមាតុប្រទេស នៅព្រលានយន្តហោះអន្តរជាតិភ្នំពេញ កាលពីព្រឹកថ្ងៃព្រហស្បតិ៍។
ជាមួយគ្នានេះ ក្រុមជម្រើសជាតិទាំង៣០នាក់នេះ សុទ្ធតែមានឱកាសអាចបង្ហាញសមត្ថភាពដូចគ្នា នៅក្នុងការប្រកួតពានរង្វាន់ AFF Suzuki Cup 2020 នៅប្រទេសសិង្ហបុរីនេះ ព្រោះ លោក ឈូក ពិសិដ្ឋ បានពន្យល់ថា បើទោះបីជា បញ្ជីឈ្មោះចុងក្រោយ គេកំណត់យកត្រឹម២៣នាក់ ឱ្យចូលលេងជាផ្លូវការ ប៉ុន្តែពី១ប្រកួត ទៅ១ប្រកួត យើងអាចផ្លាស់ប្តូរសមាសភាពកីឡាករបាន។
ជាមួយគ្នានេះ លោក ភា សុភ័ក្ត្រា គ្រូជំនួយក្រុមជម្រើសជាតិកម្ពុជា បានអះអាងថា ការចេញទៅប្រកួតលើកនេះ កម្ពុជា បានត្រៀមខ្លួនល្អដែរ បើទោះបីជាក្រុមតំណាងឱ្យកម្ពុជាមួយនេះ ទើបប្រមូលផ្តុំហាត់ជុំគ្នា បានត្រឹម៦ថ្ងៃទេ ពោលគឺទើបចាប់ផ្តើម កាលពីថ្ងៃទី២៦ ខែវិច្ឆិកា ឆ្នាំ២០២១ ក៏ដោយ។
លោក ភា សុភ័ក្ត្រា បាននិយាយថា៖ «សម្រាប់ការហ្វឹកហាត់ជុំគ្នា ប៉ុន្មានថ្ងៃនេះ យើងផ្តោតខ្លាំងទៅលើកម្លាំងកាយសម្បទា និងការធ្វើតាក់ទិចមួយចំនួន ហើយយើងនឹងធ្វើបន្ថែមទៀត នៅសិង្ហបុរី។ កីឡាករទាំងអស់ មានការយកចិត្តទុកដាក់ និងព្យាយាមយល់ពីអ្វីដែលក្រុមចង់បាន និងចង់ធ្វើ អ៊ីចឹងយើងមើលឃើញពីភាពរីកចម្រើន ជាមួយការហ្វឹកហាត់ប្រកបដោយការយល់ចិត្តគ្នា និងជាការត្រៀមខ្លួនបានល្អដែរ»។
សម្រាប់ការប្រកួតពានរង្វាន់ AFF Suzuki Cup 2020 នេះកម្ពុជា ឈរនៅពេលB ជាមួយ វៀតណាម ម៉ាឡេស៊ី ឥណ្ឌូនេស៊ី និងឡាវ ហើយកម្ពុជា ត្រូវប្រកួតបើកឆាកជាមួយក្រុមម៉ាឡេស៊ី នៅថ្ងៃទី៦ មុនទៅជួបឥណ្ឌូនេស៊ី ថ្ងៃទី៩ រួចបន្តទៅប៉ះក្រុមឡាវ នាថ្ងៃទី១៥ និងចុងក្រោយត្រូវប្រឈមជាមួយក្រុមខ្លាំងប្រចាំនៅអាស៊ាន វៀតណាម នៅថ្ងៃទី១៩ ខែធ្នូ៕
