ខ្សែប្រយុទ្ធជម្រើសជាតិ ចាន់ វឌ្ឍនាកា ព្រមទាំងខ្សែការពារកូនកាត់ ធារី ចន្ថាប៊ីន ព្រមទាំងក្រុមតារាសិល្បៈ សុទ្ធតែបានសម្តែងការគាំទ្រ និងលើកទឹកចិត្ត ទៅដល់ក្រុមជម្រើសជាតិកីឡាអេឡិចត្រូនិកកម្ពុជា SeeYouSoon ដែលត្រូវប្រកួតកីឡាអេឡិចត្រូនិកជើងឯកពិភពលោក M3 World Championship ឆ្នាំ២០២១ លើវិញ្ញាសា Mobile Legends: Bang Bang នៅថ្ងៃចន្ទនេះ។
សម្រាប់ការប្រកួតកីឡាអេឡិចត្រូនិកជើងឯកពិភពលោក M3 World Championship ឆ្នាំ២០២១ ដែលធ្វើនៅប្រទេសសិង្ហបុរីនេះ មានក្រុមខ្លាំងៗមកពីទូទាំងពិភពលោក ចំនួន១៦ ដែលត្រូវប្រជែងគ្នា ប្រជែងយកតំណែងជើងឯក អមដោយប្រាក់រង្វាន់សរុបយ៉ាងច្រើនសន្ធឹកសន្ធាប់រហូតដល់ ៨ ម៉ឺនដុល្លារអាមេរិក។
ក្រុមទាំង១៦ ដែលត្រូវប្រកួតប្រជែងគ្នានេះ រួមមានក្រុម BEDEL (តួកគី) ក្រុមBLACKLIST INTERNATIONAL (ហ្វីលីពីន) ក្រុមBTK (អាមេរិកខាងជើង) ក្រុមEVOS SG (សិង្ហបុរី) ក្រុម GX SQUAD (តំណាងមជ្ឈិមបូព៌ា) ក្រុម KEYD STARS (ប្រេស៊ីល)ក្រុម MALVINAS GAMING (អាមេរិកឡាទីន) ក្រុម NATUS VINCIRE (ក្រុមតំណាងមកតំបន់CIS) ក្រុម ONIC ESPORT (ឥណ្ឌូណេស៊ី) ក្រុម ONIC PH (ហ្វីលីពីន) ក្រុម RED CANIDS (ប្រេស៊ីល) ក្រុម RRQ HOSHI (ឥណ្ឌូណេស៊ី) ក្រុម RSG SG (សិង្ហបុរី) ក្រុមSee You Soon (កម្ពុជា) ក្រុម TEAM MSG (ម៉ាឡេស៊ី) និង TODAK (ម៉ាឡេស៊ី)។
ក្រុមខ្លាំងទាំង១៦នេះ ត្រូវបានបែងចែកការប្រកួតជា៤ពូល ដែលក្នុងមួយពូលៗ មាន ៤ ក្រុម សម្រាប់ការប្រកួតវគ្គសន្សំពិន្ទុ ដើម្បីស្វែងរកក្រុមឡើងឡើងទៅវគ្គបន្ត ហើយអ្វីដែលគួរឱ្យចាប់អារម្មណ៍បំផុត សម្រាប់ក្រុមតំណាងឱ្យកម្ពុជា ក្នុងព្រឹត្តិការណ៍ដ៏អស្ចារ្យនេះ គឺពួកគេ ទទួលបានការចាប់អារម្មណ៍យ៉ាងខ្លាំង ពីបុគ្គលល្បីៗ នៅប្រទេសកម្ពុជា រួមទាំងក្រុមតារាសិល្បៈ និងកីឡាករបាល់ទាត់ ក៏ដូចជាអ្នកដែលល្បីល្បាញតាមបណ្តាញទំនាក់ទំនងសង្គម។
ជាក់ស្តែងតារាបាល់ទាត់ ដែលជាអាយដល សម្រាប់អ្នកគាំទ្រកម្ពុជា ចាន់ វឌ្ឍនាកា ក៏ចាប់អារម្មណ៍ និងលើកទឹកចិត្តចំពោះព្រឹត្តិការណ៍ ក៏ដូចជាក្រុមអេឡិចត្រូនិកជម្រើសជាតិកម្ពុជាSee You Soon ផងដែរ។
ខ្សែប្រយុទ្ធមានរហស្សនាម «CV11» ចាន់ វឌ្ឍនាកា បានបង្ហាញចំណាប់អារម្មណ៍របស់ខ្លួន នៅលើបណ្តាញសង្គមថា ៖ «កុំភ្លេចថា សំណាង មិនអាចយកឈ្នះការខំប្រឹងប្រែងបានទេ។ សង្ឃឹមថា អ្នកទាំងអស់គ្នាប្រឹងប្រែងអស់ពីសមត្ថភាព ដើម្បីយកជ័យជម្នះឱ្យកម្ពុជា»។
ជាមួយគ្នានេះ ខ្សែការពារកូនកាត់ខ្មែរ-បារាំង ធារី ចន្ថាប៊ីន របស់ក្លិបវវិសាខា ក៏បានចូលរួមលើកទឹកចិត្តដល់ក្រុមកម្ពុជា ផងដែរ ដោយបាននិយាយថា ៖ «ខ្ញុំសប្បាយចិត្តណាស់ ដែលបានឃើញក្រុមកម្ពុជា មានឱកាសចូលរួមប្រកួតលំដាប់ថ្នាក់ពិភពលោក។ ខ្ញុំសូមជូនពរកីឡាករ Mobile Legends ឱ្យពួកគាត់ធ្វើបានល្អ និងយកជ័យជម្នះ សម្រាប់កម្ពុជា»។
ចំណែកនារីរូបស្រស់ និងជាកីឡាការិនីល្បុក្កតោកម្ពុជា ពេជ្រ ចរណៃ បានចែករំលែកគំនិតថា ៖ «មិនថា បរាជ័យប៉ុន្មានដងទេ ឱ្យតែនៅមានជីវិត យើងនៅតែអាចចាប់ផ្ដើមម្ដងទៀតបាន។ នាងខ្ញុំសូមជូនពរ និងផ្តល់កម្លាំងចិត្តដល់អ្នកទាំងអស់គ្នា ដើម្បីយកពាន ក្នុងការប្រកួត M3។ ស៊ូៗ ស៊ូ»។
រឹតតែធ្វើឱ្យព្រឹត្តិការណ៍អស្ចារ្យ និងផ្តល់ឱ្យអ្នកគាំទ្រទូទាំងប្រទេស រំភើបសប្បាយបំផុត នៅវត្តមានម្ចាស់ឧបត្ថម្ភ និងដៃគូសហការ មានដូចជាក្រុមហ៊ុនទូរសព្ទ Smart, ភេសជ្ជៈ Sting, ធនាគារស្ថាបនា, ក្រុមហ៊ុនដឹកជញ្ជូនអាហារ Foodpandaនិងរថយន្ត LMCar ហើយបន្ថែមលើនេះទៀត តារាចម្រៀងល្បីៗដូចជា ចិត្ត កញ្ចនា 4T5 ជី ដេវីត និងតារាចម្រៀងផ្សេងៗទៀត នៅក្នុងវិស័យផ្សេងៗទៀត បានចូលរួមក្នុងព្រឹត្តិការណ៍ដ៏អស្ចារ្យ ដោយបាននិពន្ធបទចម្រៀងចំណងជើងថា «អាណាចក្រអ្នកចម្បាំង Kingdom of Warriors» ដើម្បីលើកទឹកចិត្តក្រុមអេឡិចត្រូនិកជម្រើសជាតិកម្ពុជា។
គួរបញ្ជាក់ថា ក្រុមជម្រើសជាតិកម្ពុជា See You Soon ជាម្ចាស់ជើងឯកពីព្រឹត្តិការណ៍ប្រកួតថ្នាក់ជាតិ MPL KH Champion ឆ្នាំ២០២១ ដែលបានតំណាងឱ្យកម្ពុជាចូលរួមប្រកួតជាលើកដំបូង ក្នុងព្រឹត្តិការណ៍ដ៏ធំសម្បើមនេះ ដែលមានការផ្សាយផ្ទាល់ តាមអនឡាញមគឺលើផេកផ្លូវការ MLBB និង Smart ចាប់ពីថ្ងៃទី៦ ដល់ទី១៩ ខែធ្នូ ឆ្នាំ២០២១៕