បរទេស៖ ខ្សែការពារស្លាបស្តាំ Diogo Dalot របស់ក្រុមបិសាចក្រហម Man. Utd បានបង្ហាញពីឆន្ទៈប្រកួតប្រជែងតំណែង ជម្រើស១១នាក់ដំបូងពិតប្រាកដ ក្រោមការដឹកនាំរបស់អ្នកចាត់ការបណ្តោះអាសន្នសញ្ជាតិអាឡឺម៉ង់លោក Ralf Rangnick។
កីឡាករអន្តរជាតិព័រទុយហ្គាល់វ័យ ២២ ឆ្នាំរូបនេះបានតស៊ូដើម្បីទទួលបានឪកាសលេងដ៏ លំបាក បំផុត ក្រោមការដឹកនាំរបស់អតីតគ្រូបង្វឹក Ole Gunnar Solskjaer ប៉ុន្តែកាលពីពេលថ្មីៗនេះ រូបគេ ទទួល បានទំនុកចិត្តដោយមានឪកាសបង្ហាញខ្លួនជម្រើស១១នាក់ដំបូងពេលផ្តួល Arsenal និង Crystal Palace។ ទោះបីជាមានការចាប់អារម្មណ៍ចង់ជួបជុំគ្នាសាជាថ្មីពីសំណាក់ លោក Jose Mourinho បច្ចុប្បន្នកំពុងដឹកនាំ Roma ក៏ដោយ ប៉ុន្តែ Dalot មានអារម្មណ៏ សប្បាយចិត្ត នឹងគោល បំណង ចង់បន្តអាជីពនៅទឹកដី Old Trafford ជាមួយនិងការទទួលតួនាទី ទៀងទាត់សម្រាប់ក្រុមជើងឯកអង់គ្លេស២០សម័យ ។
កីឡាករអន្តរជាតិព័រទុយហ្គាល់បានប្រាប់គេហទំព័រផ្លូវការរបស់ក្លឹបថា :វាជាអ្វីដែលខ្ញុំត្រៀមលះបង់ វាមិនងាយស្រួលទេនៅពេលអ្នកអង្គុយបម្រុងហើយមិនបានចូលលេងច្រើនតាមដែលអាចធ្វើទៅបាន ។ ប៉ុន្តែការងាររបស់យើងគឺរក្សាការត្រៀមខ្លួន ហើយខ្ញុំគិតថាខ្ញុំកំពុងធ្វើការងារដ៏អស្ចារ្យនៅខាងក្រៅទីលានដើម្បីត្រៀមខ្លួនជួយក្រុមបន្តទៀត។នៅពេលដែលឱកាសមកដល់ ពេលនេះខ្ញុំមានអារម្មណ៍ថា ខ្ញុំត្រូវតែបន្តទៅមុខ ហើយផ្តល់អ្វីគ្រប់យ៉ាងនៅពេលដែលខ្ញុំមានវត្តមាននៅលើទីលាន ។ Dalot មានកុងត្រាជាមួយក្លឹបរហូតដល់ខែមិថុនាឆ្នាំ ២០២៣ និងបានបង្ហាញខ្លួន ៤៤ លើកបន្ទាប់ពីមកដល់ទឹក ដីOld Traffordនៅក្នុងឆ្នាំ២០១៨ ហើយរដូវកាលនេះរូបគេចូលលេងបាន៩ប្រកួតហើយ៕
ប្រភពព័ត៍មាន៖ Sportsmole
