ក្រុមសាលាកីឡាបាល់ទាត់ជាតិ បានបង្ហាញឱ្យឃើញពីភាពវិជ្ជមាន ក្នុងការអាចវិលត្រឡប់មកលេង នៅលីគកំពូលកម្ពុជា ឆ្នាំ២០២២វិញ បន្ទាប់ពីពួកគេ ធ្វើបានយ៉ាងល្អ ដើម្បីគ្រប់គ្រងចំណាត់ថ្នាក់លេខ១ជាបណ្តោះអាសន្ន នៅក្នុងការប្រកួតជម្រើសជើងឯកកម្ពុជា លីគ២ ឆ្នាំ២០២១ នោះ។
បើទោះបីជាក្រុមសាលាកីឡាបាល់ទាត់ជាតិ បានធ្លាក់ចេញពីការប្រកួតលីគកំពូលកម្ពុជា នៅចុងរដូវកាល ឆ្នាំ២០២០ ប៉ុន្តែសម្រាប់ការប្រកួតលីគ២ ដើម្បីយកក្រុមជើងឯក ឡើងទៅលេង នៅលីគកំពូល ឆ្នាំ២០២២នេះ ក្រុមថ្នាលរបស់សហព័ន្ធកីឡាបាល់ទាត់កម្ពុជា មួយនេះ បានឈ្នះទាំង៣ប្រកួតជាប់ៗគ្នា បន្ទាប់ពីពួកគេ បានបន្តយកឈ្នះក្រុមU21កងយោធពលខេមរភូមិន្ទ ៣-០ កាលពីថ្ងៃអង្គារ។
ការរកបាន៣ពិន្ទុនេះ បានជួយឱ្យក្រុមសាលាកីឡាបាល់ទាត់ជាតិ ឈរនៅលេខ១ ជាបណ្តោះអាសន្ន ដោយមាន ៩ពិន្ទុ ច្រើនជាងក្រុមជាគូប្រជែង អាយអេសអាយដង្កោសែនជ័យ និងក្រុមមន្ទីរអយកខេត្តត្បូងឃ្មុំ ចំនួន២ពិន្ទុ ព្រោះកាលពីថ្ងៃអង្គារម្សិលមិញនោះ ខេត្តត្បូងឃ្មុំ បានស្មើ ១-១ ជាមួយក្រុមម្ចាស់ផ្ទះខេត្តត្បូងឃ្មុំ ហើយអាយអេសអាយ ក៏បានទៅស្មើជាមួយ ក្រុមឬទ្ធីសែន ២-២ ផងដែរ។
ចំណែកក្រុមខេត្តបន្ទាយមានជ័យ បានជួបការបរាជ័យ ជាលើកទី៣ បន្ទាប់ពីពួកគេ បានបន្តចាញ់ម្ចាស់ផ្ទះ សៀមរាបអេហ្វស៊ី ២-១ កាលពីថ្ងៃអង្គារនោះដែរ ហើយតាមលទ្ធផលនេះ វាស្ទើរតែបានបង្ហាញរួចទៅហើយថា ខេត្តបន្ទាយមានជ័យ នឹងអាចធ្លាក់ចេញពីការប្រកួតនេះ ព្រោះការប្រកួតលីគ២នេះ លេងតែ១ជើងទេ ហើយកំណត់យកតែក្រុមជើងឯកមួយប៉ុណ្ណោះ សម្រាប់ឡើងទៅលេង នៅលីគកំពូលកម្ពុជា ឆ្នាំ២០២២៕
