ផ្លូវរត់អត្តពលកម្ម ៨ខ្សែបន្ទាត់ អាងហែលទឹក និងអគារធ្វើលំហាត់ប្រាណ ដោយមានបំពាក់សម្ភារបរិក្ខារពីរដ្ឋាភិបាល និងប្រជាជនជប៉ុន ដែលបានចំណាយការសាងសង់នៅទឹកប្រាក់សរុបជាង៨១ម៉ឺនដុល្លារនោះ ត្រូវបានភាគីជប៉ុនប្រគល់ជូន ដល់វិទ្យាស្ថានជាតិអប់រំកាយ និងកីឡា ដើម្បីយកមកគ្រប់គ្រង់ និងប្រើប្រាស់ជាផ្លូវការហើយ។
ពិធីប្រគល់-ទទួល នូវផ្លូវរត់អត្តពលកម្ម ៨ខ្សែបន្ទាត់ អាងហែលទឹក និងអគារធ្វើលំហាត់ប្រាណនេះ ត្រូវបានធ្វើឡើង កាលពីថ្ងៃពុធម្សិលមិញ ក្រោមអធិបតីភាពប្រគល់ និងទទួល ពីសំណាក់លោកបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា តំណាងឱ្យកម្ពុជា និងលោក MIKAMI Masahiro ឯកអគ្គរាជទូតជប៉ុនប្រចាំកម្ពុជា តំណាងឱ្យភាគីជប៉ុន។
តាមរបាយការណ៍លោកស្រី ហ៊ូ សិទ្ធិសោភាល័យ នាយិកាវិទ្យាស្ថានជាតិអប់រំកាយ និងកីឡា បានឱ្យដឹងថា គម្រោង «អភិវឌ្ឍវិទ្យាស្ថានជាតិអប់រំកាយ និងកីឡា ជាគ្រឹះស្ថានឧត្តមសិក្សា» នេះ ត្រូវបានអនុវត្ត ក្រោមកិច្ចសហប្រតិបត្តិការ រវាងវិទ្យាស្ថានជាតិអប់រំកាយ និងកីឡា និងអង្គការក្រៅរដ្ឋាភិបាល បេះដូងមាស ក្រោមជំនួយឥតសំណង នៃរាជរដ្ឋាភិបាលជប៉ុន ហើយគម្រោងនេះ បានចាប់ផ្តើមដំណើរការ ចាប់តាំងពីខែមករា ឆ្នាំ២០១៩ ដែលមានរយៈពេល៣ឆ្នាំ។
តាមរបាយការណ៍ដដែលនេះ បានបញ្ជាក់ថា ផ្លូវរត់អត្តពលកម្ម តាមរយៈជំនួយឥតសំណង គូសាណូណិ មានតម្លៃសរុបចំនួន ៩០,៦៤០ ដុល្លាអាមេរិក ចំណែកអាងហែលទឹក និងអាគារធ្វើលំហាត់ប្រាណ ដោយបំពាក់សម្ភារបរិក្ខារ ជាមួយនិងសម្ភារកីឡាមួយចំនួនដូចជា ក្តារស្នោហែលទឹក កម្រាលយ៉ូហ្គា balance ball បាល់ទាត់ បាល់ទះ បាល់បោះ គ្រាប់ប៊ូល តុវាយកូនឃ្លីលើតុ និងថវិកា សម្រាប់ធ្វើឧបករណ៍រក្សាទុកខ្សែបន្ទាត់អាងហែលទឹក ដែលជាជំនួយឥតសំណង សម្របសម្រួលដោយអង្គការក្រៅរដ្ឋាភិបាលបេះដូងមាស ចាប់តាំងពីឆ្នាំ២០១៩ និងឆ្នាំ២០២១ នោះ គឺមានតម្លៃសរុបចំនួន ៧២១,៥០៥.៨៦ ដុល្លាអាមេរិក។
ជាមួយគ្នានេះ ក្រោមការសម្របសម្រួលដោយអង្គការក្រៅរដ្ឋាភិបាលបេះដូងមាស វិទ្យាស្ថានជាតិអប់រំកាយ និងកីឡា ក៏ទទួលបានស្បែកជើងកីឡា សម្រាប់គរុនិស្សិតថ្នាក់បរិញ្ញាបត្រចំនួន ៧០គូ ជាអំណោយរបស់ Fujisawa Minami Rotary Club ផងដែរ។
នៅក្នុងពិធីនោះ លោក MIKAMI Masahiro បានលើកឡើងថា សមិទ្ធផលហេដ្ឋារចនាសម័ន្ធកីឡាទាំងអស់នេះ វានឹងជួយ:ឱ្យវិទ្យាស្ថានជាតិអប់រំកាយ និងកីឡា មានគុណភាពខ្ពស់ ក្នុងបរិយាកាសសមស្រប ដើម្បីរួមចំណែកយ៉ាងសំខាន់ ក្នុងការផ្តល់ឱ្យនិស្សិតកម្រិតថ្នាក់អប់រំកាយ និងកីឡា ប្រកបដោយគុណភាព ទៅចែករំលែក នៅតាមបណ្តាសាលារៀននានា នៅក្នុងប្រទេស នៅពេលពួកគេ បានបញ្ចប់ការសិក្សា ព្រោះថ្នាក់អប់រំកាយ មិនត្រឹមតែផ្តល់ឱ្យសិស្ស នូវភាពសកម្មផ្នែករាងកាយប៉ុណ្ណោះទេ ប៉ុន្តែវាក៏បានបង្រៀនពីសារសំខាន់ នៃការងារជាក្រុម ការអនុវត្តតាមបទបញ្ញត្តិ និងស្មារតី នៃការលេងដោយយុត្តិធម៌ តាមរយៈសកម្មភាពលេងកីឡាជាក្រុម ផងដែរ។
ចំណែកលោកបណ្ឌិតសភាចារ្យ ហង់ជួន ណារ៉ុន បានថ្លែងថា តាមរយៈគម្រោងគូសាណូណិ និងអង្គការក្រៅរដ្ឋាភិបាលបេះដូងមាស ដែលបានជួយឧបត្ថម្ភជាផ្លូវរត់អត្តពលកម្ម ៨ខ្សែបន្ទាត់ ព្រមទាំងអាងហែលទឹក និងអគារធ្វើលំហាត់ប្រាណ ដោយមានបំពាក់សម្ភារបរិក្ខា សម្ភារកីឡា និងការរៀបចំកម្មវិធីសិក្សាបរិញ្ញាបត្រ សិល្បៈមនុស្សសាស្រ្ត ឯកទេស អប់រំកាយ ការអភិវឌ្ឍធនធានមនុស្ស នៅវិទ្យាស្ថានជាតិអប់រំកាយ និងកីឡានេះ ជាការរួមចំណែកក្នុងការអភិវឌ្ឍហេដ្ឋារចនាសម្ព័ន្ធ ដើម្បីអភិវឌ្ឍឱ្យវិទ្យាស្ថានមួយនេះ ក្លាយជាគ្រឹះស្ថានឧត្តមសិក្សា នាពេលខាងមុខ៕