លោក មីកាមិ ម៉ាសាហ៊ីរ៉ុ (MIKAMI MASAHIRO) ឯកអគ្គរាជទូតជប៉ុនប្រចាំនៅកម្ពុជា បានលើកឡើងថា គន្លឹះនៃភាពជោគជ័យ ចំពោះការរៀបចំការប្រកួតស៊ីហ្គេម លើកទី៣២ នៅរាជធានីភ្នំពេញ ក្នុងឆ្នាំ២០២៣ គឺស្ថិតនៅលើវិស័យសារព័ត៌មាន ហើយជាមួយគ្នានេះ អនុប្រធានអចិន្ត្រៃយ៍ CAMSOC លោកបណ្ឌិត ថោង ខុន បានចាត់ទុក សារព័ត៌មាន ជាដៃគូជួយអភិវឌ្ឍវិស័យកីឡា មិនអាចខ្វះបាន។
ការលើកឡើងបែបនេះរបស់លោកបណ្ឌិត ថោន ខុន និងលោក មីកាមិ ម៉ាសាហ៊ីរ៉ុ ត្រូវបានធ្វើឡើង កាលពីថ្ងៃព្រហស្បតិ៍ម្សិលមិញ នៅពេលអ្នកទាំង២ បានចូលរួមជាអធិបតីភាព នៅក្នុងពិធីបិទវគ្គសិក្សា ជំរុញការផ្សព្វផ្សាយព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ ស្តីពី «តួនាទីអ្នកសារព័ត៌មានកីឡា តាមរយៈបទពិសោធន៍ជនជាតិជប៉ុន» ដោយវគ្គនេះ មានសិក្ខាកាមចូលរួមជិត ១០០នាក់ ហើយបានបែងចែកជា២វគ្គ ដោយវគ្គទី១ សិក្សារយៈពេល ៤ថ្ងៃ គឺពីថ្ងៃទី១ ដល់ថ្ងៃទី៤ ខែវិច្ឆិកា និងវគ្គទី២ សិក្សាពីថ្ងៃទី៦ ដល់ថ្ងៃទី៩ ខែធ្នូ ឆ្នាំ២០២១នេះ នៅទីស្នាក់ការ NOCC។
លោក មីកាមិ ម៉ាសាហ៊ីរ៉ុ បានថ្លែងកោតសរសើរ ចំពោះមជ្ឈមណ្ឌលអាស៊ីមូលនិធិជប៉ុន ដែលបានសហការជាមួយក្លិបអ្នកកាសែតកម្ពុជា ពិសេសគណៈកម្មាធិការជាតិ CAMSOC ដែលរៀបចំវគ្គនេះឡើង តាមរយៈការចែករំលែកចំណេះដឹង និងបទពិសោធ ពីអ្នកជំនាញសារព័ត៌មាន និងជំនាញកីឡាជប៉ុន អំពីទស្សនៈនៃអត្ថបទ រូបថត ការអត្ថាធិប្បាយជាដើម ដែលទាក់ទងនឹងសារព័ត៌មានកីឡា រួមទាំងបទពិសោធន៍ នៃការធ្វើម្ចាស់ផ្ទះការប្រកួតកីឡាអូឡាំពិក និងប៉ារ៉ាឡាំពិក នាទីក្រុងតូក្យូ កាលពីថ្មីៗនេះ។
បន្ថែមលើនេះ ឯកអគ្គរាជទូតជប៉ុនរូបនេះ បានបញ្ជាក់ថា៖«គន្លឹះនៃភាពជោគជ័យនៃស៊ីហ្គេម លើកទី៣២ នៅរាជធានីភ្នំពេញ ក្នុងឆ្នាំ២០២៣ គឺស្ថិតនៅលើវិស័យសារព័ត៌មាន ដែលវាមិនមែនជាការនិយាយបំផ្លើសទេ ហេតុនេះ ខ្ញុំសង្ឃឹមថា អ្នកសារព័ត៌មាន នឹងប្រើប្រាស់ជំនាញ ដែលមានរៀងៗខ្លួន រីកចម្រើនរួមគ្នា ជាមួយនឹងកីឡាករ ដើម្បីគោលដៅឆ្នាំ២០២៣ ហើយជួយផ្សព្វផ្សាយយ៉ាងទូលំទូលាយ នូវភាពក្លៀវក្លារបស់កីឡាករកម្ពុជា ក៏ដូចជាអាស៊ីអាគ្នេយ៍»។
ជាមួយគ្នានេះ លោកបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាអនុប្រធានអចិន្ដ្រៃយ៍ នៃគណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ (CAMSOC) បានប្រាប់អ្នកសារព័ត៌មានទាំងអស់ថា៖«សូមអ្នកសារព័ត៌ មានត្រៀមចូលរួមធ្វើជាម្ចាស់ផ្ទះ រៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ដោយយកស្មារតីវិជ្ជាជីវៈសារព័ត៌មានកីឡា មកធ្វើការផ្សព្វផ្សាយជាលក្ខណៈវិជ្ជមាន ដើម្បីលើកកម្ពស់ គុណតម្លៃព្រឹត្តិការណ៍កីឡាជាប្រវត្តិសាស្ត្រនេះ»។
លោកបានបញ្ជាក់បន្ថែមថា៖«ក្នុងសម័យកាលកីឡាទំនើប និងចលនាអូឡាំពិកទំនើប យើងចាត់ទុកសារព័ត៌មានកីឡា គឺជាដៃគូជំរុញការអភិវឌ្ឍចលនាអូឡាំពិក និងចលនាកីឡាជាតិ ដែលមិនអាចខ្វះបាន។ ពិសេសសម័យកាល Digital និង Social Media បានគ្របដណ្ដប់រាល់សកម្មភាពកីឡា និងព្រឹត្តិការណ៍ប្រកួតកីឡា ទាំងកម្រិតជាតិ និងអន្តរជាតិ ដោយលើកកម្ពស់គុណតម្លៃកីឡា កាន់តែខ្ពស់ និងផ្តល់គុណភាពផ្សព្វផ្សាយ កាន់តែមានប្រសិទ្ធភាពទាក់ទាញអ្នកទស្សនាបានយ៉ាងច្រើនកុះករ»៕