កីឡាករជើងខ្លាំងលំដាប់ប្រទេស ក្នុងប្រភេទទម្ងន់៥៤គីឡូក្រាម ខាំ ខ្លានាង បានអះអាង ដោយភាពជឿជាក់ថា រូបគេ មិនអាចចាញ់អ្នកប្រដាល់ជើងថ្មី កំពុងល្បីឈ្មោះ ពេជ្រ ប៊ុនសិដ្ឋបាននោះទេ សម្រាប់ការប្រកួតគ្នា កម្មវិធី ONESTRIKE ចំនួន ២ ទឹក (១ ទឹកមាន ៧ នាទី) នៅលើសង្វៀន PNN នាថ្ងៃអាទិត្យនេះ។
ការផ្គូផ្គងដាក់ឱ្យជើងខ្លាំងវ័យក្មេងទាំង២នេះ ជួបគ្នា ក្នុងកម្មវិធី ONESTRIKE នេះ បាននឹងកំពុងធ្វើឱ្យអ្នកគាំទ្រប្រដាល់គុនខ្មែរ មានការចាប់អារម្មណ៍ខ្លាំង ទាំង ខាំ ខ្លានាង និង ពេជ្រ ប៊ុនសិដ្ឋ សុទ្ធតែអ្នកប្រដាល់ចិត្តសឿង វាយមកដកថយដូចគ្នា ហើយអ្វីកាន់តែពិសេសទៀតនោះ
គឺកម្មវិធី អ្នកដែលអាចឈ្នះបាន លុះត្រាតែវាយគូប្រកួតឱ្យសន្លប់ ឬបោះបង់ចោលការប្រកួត។
សម្រាប់ការជួបគ្នាលើកនេះ ទាំង ខាំ ខ្លានាង និង ពេជ្រ ប៊ុនសិដ្ឋ សុទ្ធតែកំពុងផ្តោតលើការប្រកួតនេះខ្លាំងដូចគ្នា ដោយក្នុងនោះ ខ្លានាង បានអះអាងថា ត្រូវតែយកឈ្នះឱ្យបាន ដើម្បីបន្តក្លាយជាជើងខ្លាំងគ្មានគូប្រៀប ក្នុងប្រភេទទម្ងន់ ៥៤គីឡូក្រាមនេះ ចំណែក ពេជ្រ ប៊ុនសិដ្ឋ កំពុងអន្ទះសាខ្លាំង ក្នុងការជួប ខាំ ខ្លានាង ដោយរូបគេបញ្ជាក់ថា ក្នុងប្រភេទទម្ងន់នេះ គេធ្លាប់ជួបអស់ហើយ នៅឡើយតែ ខ្លានាង នេះម្នាក់ទេ។
ខាំ ខ្លានាង បាននិយាយថា៖ «សម្រាប់ជំនួបនេះ ខ្ញុំធានាឈ្នះបាន ព្រោះខ្ញុំគិតថា ក្បាច់របស់ ប៊ុនសិដ្ឋ មិនជាបញ្ហាលំបាកទប់ទល់ទេ។ យើងក៏មិនងាយ នឹងយកឈ្នះបានស្រួលៗនោះដែរ គឺត្រូវការពារឱ្យបានច្រើន ព្រោះកណ្តាប់ដៃរបស់គេធ្ងន់ដែរ ប៉ុន្តែខ្ញុំមានទំនុកចិត្តឈ្នះ ១០០ ភាគរយតែម្តង គឺមិនអាចចាញ់បានទេ លើកលែងតែករណីភ្លាត់ស្នៀតណាមួយ ដោយចៃដន្យប៉ុណ្ណោះ»។
ចំណែកអ្នកលេងកណ្តាប់ដៃ ពេជ្រ ប៊ុនសិដ្ឋ បាននិយាយថា៖ «ខ្ញុំចង់ប្រកួតជាមួយគាត់ យូរហើយ ហើយពេលនេះបានសម្រេចហើយ ព្រោះនៅក្នុងទម្ងន់ ៥៤ គីឡូក្រុមនេះ ខ្ញុំធ្លាប់ជួបអស់ហើយ គឺនៅតែ ខាំ ខ្លានាង នេះម្នាក់ទេ។ គាត់ជាកីឡាករខ្លាំង ហើយខ្ញុំធ្លាប់បានឃើញការប្រកួតរបស់គាត់ច្រើនដងហើយ ប៉ុន្តែខ្ញុំអត់ខ្លាចគាត់ នោះទេ»
កូនសិស្សរបស់លោក ពេជ្រ សុផាន់ រូបនេះ បានប្រាប់បន្ថែមថា៖ «ខ្ញុំចង់ប្រកួតជាមួយគាត់ណាស់ ហើយដោយសារ កម្មវិធីគូឯក ONESTRIKE នេះមាន ២ ទឹក ស្មើនឹង ១៤ នាទី គឺខុសពីគុនខ្មែរ អ៊ីចឹងបើខ្ញុំរក្សាកម្លាំងបាន គឺអាចស៊ីនៅចុងទឹកបាន»។ ចំណែកលោក ពេជ្រ សុផាន់ ជាគ្រូបង្វឹក បាននិយាយថា៖ «ខ្ញុំមានជំនឿថា ពេជ្រ ប៊ុនសិដ្ឋ នឹងឈ្នះ ព្រោះបើវាមិនល្អ ខ្ញុំមិនដាក់ចូលឱ្យប្រកួតនោះទេ»៕
