ព្រឹត្តិការណ៍កីឡាទូកក្តោងជ្រើសរើសជើងឯកអាស៊ីអាគ្នេយ៍ ឆ្នាំ២០២១ បានបើកការប្រកួតជាជាផ្លូវការ នៅលើទឹកទីខេត្តព្រះសីហនុ នាថ្ងៃចន្ទនេះ និងគ្រោងបញ្ចប់ នៅថ្ងៃទី១៧ ខែធ្នូ បន្ទាប់ពីបានរៀបចំពិធីបើក ព្រមទាំងប្រកួតសមល្បងគ្នារួចរាល់ កាលពីថ្ងៃអាទិត្យ ម្សិលមិញ។
សម្រាប់ការប្រកួតកីឡាទូកក្តោងជើងឯកអាស៊ីអាគ្នេយ៍នេះ ត្រូវបានថ្នាក់ដឹកនាំជាភាគីតំណាងឱ្យកម្ពុជា ចាត់ទុកថា ជាព្រឹត្តិការណ៍ប្រវត្តិសាស្រ្ត លើកដំបូង នៅកម្ពុជា ដែលនឹងជួយជំរុញលើកកម្ពស់ឧត្តមភាព និងកិត្យានុភាពជាតិ របស់ប្រទេសកម្ពុជា ទៅលើឆាកអន្តរជាតិ។
អភិបាលខេត្តព្រះសីហនុ លោក គួច ចំរើន បានថ្លែង នៅក្នុងពិធីបើកការប្រកួត កាលពីល្ងាចថ្ងៃអាទិត្យ ម្សិលមិញថា៖ «ជំនួសមុខឱ្យ រដ្ឋបាលខេត្តព្រះសីហនុ ខ្ញុំសូមថ្លែងអំណរគុណយ៉ាងជ្រាលជ្រៅបំផុត ចំពោះរាជរដ្ឋាភិបាលកម្ពុជា និងក្រសួងទេសចរណ៍ ដែលបានសម្រេចជ្រើសរើសយកខេត្តព្រះសីហនុ ធ្វើជាទីតាំងម្ចាស់ផ្ទះ ក្នុងការប្រកួតកីឡាទូកក្តោងជ្រើសរើសជើងឯកអាស៊ីអាគ្នេយ៍ ឆ្នាំ២០២១ ដែលជាព្រឹត្តិការណ៍ប្រវត្តិសាស្រ្ត មិនធ្លាប់មាននៅក្នុងប្រទេសកម្ពុជា និងក៏ជាការបើកទំព័រសករាជថ្មីមួយ សម្រាប់ខេត្តព្រះសីហនុ ក្នុងការសហការរៀបចំការប្រកួតនេះ ផងដែរ»។
លោក គួច ចំរើន បានបញ្ជាក់ថា៖ «ខ្ញុំមានសង្ឃឹមជឿជាក់យ៉ាងមុតមាំថា ការរៀបចំការប្រកួតកីឡាទូកក្តោងជ្រើសរើសជើងឯកអាស៊ីអាគ្នេយ៍ ឆ្នាំ២០២១ នាថ្ងៃនេះ នឹងជួយជំរុញលើកកម្ពស់ឧត្តមភាព និងកិត្យានុភាពជាតិ របស់ប្រទេសកម្ពុជា ឱ្យកាន់តែមានកេរ្តិ៍ឈ្មោះល្បីរន្ទឺថែមទៀត នៅក្នុងតំបន់ និងលើកឆាកអន្តរជាតិ ដែលបង្ហាញឱ្យពិភពលោកឃើញថា ប្រទេសកម្ពុជា មានសមត្ថភាពគ្រប់គ្រាន់ ក្នុងការទទួលរៀបចំគ្រប់ប្រភេទកីឡាកម្រិតអន្តរជាតិ ក៏ដូចជាដើម្បីត្រៀមខ្លួន ក្នុងការឈានឆ្ពោះទៅរៀបចំការប្រកួតកីឡាស៊ីហ្គេម លើកទី៣២ នៅឆ្នាំ២០២៣»។
យ៉ាងណាក៏ដោយ ការប្រកួតកីឡាទូកក្តោងជ្រើសរើសជើងឯកអាស៊ីអាគ្នេយ៍ ឆ្នាំ២០២១ នេះមានប្រទេសត្រឹម៣ប៉ុណ្ណោះ បានចូលរួម ក្នុងនោះមានម្ចាស់ផ្ទះកម្ពុជា សិង្ហបុរី និងម៉ាឡេស៊ី ដោយមានប្រតិភូសរុបចំនួន២៩នាក់។
ជាមួយនឹងបញ្ហានេះ លោក Chan Khun Sing Joseph អ្នកគ្រប់គ្រងគណៈកម្មការប្រកួត និងជាតំណាងប្រទេសសហម្ចាស់ផ្ទះ នៃព្រឹត្តិការណ៍នេះ បានអះអាងថា ដំបូងឡើយមានអត្តពលិកជាង ១០ប្រទេស ត្រៀមចូលរួម តែដោយសារបញ្ហាឥតព្រៀងទុក នៃជំងឺរាតត្បាតជាសកលកូវីដ១៩ នៅនាទីចុងក្រោយ បានធ្វើឱ្យពួកគេខកខានទៅវិញ បន្ទាប់ពីការលុបចោលជើងហោះហើរមកកម្ពុជា។
ជាមួយគ្នានេះ លោក Chan Khun Sing Joseph មានសង្ឃឹមយ៉ាងមុតមាំថា ការប្រកួតលើកក្រោយ ប្រទេសទាំងអស់ នឹងបានចូលរួមការប្រកួតនៅកម្ពុជាទាំងអស់គ្នា ហើយចំពោះការរៀបចំការប្រកួតនេះ ជាលើកដំបូង នៅកម្ពុជានេះ លោកចាត់ទុកថា ជាសញ្ញាដ៏ល្អ សម្រាប់ការអភិវឌ្ឍវិស័យកីឡាទូកក្ដោងកម្ពុជា ឈានឆ្ពោះទៅធ្វើម្ចាស់ផ្ទះ ការប្រកួតកីឡាស៊ីហ្គេម ឆ្នាំ២០២៣ ក៏ដូចជាការប្រកួតកីឡាអូឡាំពិក យុវជនអាស៊ី ឆ្នាំ២០២៩ នៅកម្ពុជា។
«ខ្ញុំសង្ឃឹមយ៉ាងមុតមាំថា ការប្រកួតទូកក្ដោងជើងឯកអាស៊ីអាគ្នេយ៍ ឆ្នាំ២០២១ នៅកម្ពុជានេះ គឺជាសញ្ញាដ៏ល្អ ក្នុងការអភិវឌ្ឍវិស័យកីឡាទូកក្ដោងកម្ពុជា ដើម្បីឈានឆ្ពោះទៅធ្វើម្ចាស់ផ្ទះស៊ីហ្គេម ឆ្នាំ២០២៣ និងកីឡាអូឡាំពិក យុវជនអាស៊ី ឆ្នាំ២០២៩»។ លោក Chan Khun Sing Joseph បានបញ្ជាក់។
បន្ថែមលើសារសំខាន់ៗ ដែលបានលើកឡើងខាងលើនេះ លោក គួច ចំរើន មានការរំពឹងថា តាមរយៈការប្រកួតទូកក្តោងជើងឯកអាស៊ាននេះ បណ្តាញសារព័ត៌មានជាតិ និងអន្តរជាតិ នឹងជួយធ្វើការផ្សព្វផ្សាយ ឱ្យបានទូលំទូលាយ អំពីសក្តានុពលរបស់ខេត្តព្រះសីហនុ រួមមានឆ្នេរសមុទ្រដ៏ស្រស់ស្អាតបំផុត លើសកលលោក កោះតូច-ធំ កំពង់ផែអន្តរជាតិ អាកាសយានដ្ឋានអន្តរជាតិ រមណីដ្ឋានទេសចរណ៍ធម្មជាតិ និងធនធានធម្មជាតិ ដ៏សម្បូរបែបផ្សេងៗ ជាពិសេសហេដ្ឋានរចនាសម្ព័ន្ធផ្លូវក្រុងចំនួន៣៧ខ្សែ ស្ថានីយប្រព្រឹត្តិកម្មទឹកកខ្វក់ បន្ទប់ទឹកសាធារណៈ និងសមិទ្ធផលនានាជាច្រើនទៀត ដែលទើបបានសម្ភោធដាក់ឱ្យប្រើប្រាស់ ក្រោមអធិបតីភាពលោកនាយករដ្ឋមន្រ្តី ហ៊ុន សែន កាលពីថ្ងៃទី២ ខែធ្នូ ឆ្នាំ២០២១៕
