គណៈកម្មាធិការប្រតិបត្តិថ្មី អាណត្តិទី៧ ឆ្នាំ២០២១-ឆ្នាំ២០២៥ របស់សហព័ន្ធកីឡាប្រដាល់គុនខ្មែរ ដែលទើបបានបង្កើតឡើង តាមរយៈការបោះឆ្នោត នៅក្នុងមហាសន្និបាតបញ្ចប់អាណត្តិចាស់ទី៦ កាលពីពេលថ្មីៗនេះ ត្រូវបានសមាជិកចាស់វស្សារបស់សហព័ន្ធមួយនេះ ទម្លាយថា ត្រូវបានធ្វើឡើង ដោយបក្ខពួកនិយម និងគ្មានតម្លា ស្រប់ទៅតាមច្បាប់នោះទេ។
«លទ្ធផលបោះឆ្នោតជ្រើសរើសគណៈកម្មាធិការប្រតិបត្តិសហព័ន្ធកីឡាប្រដាល់គុនខ្មែរអាណត្តិទី៧ កាលពីថ្ងៃទី១០ ខែធ្នូ ឆ្នាំ២០២១ បានធ្វើឡើង ដោយការចាប់បង្ខំ និងសម្រេចដោយភាពតក់ក្រហល់។ លទ្ធផលមិនឯកច្ឆន្ទ ដោយសមាជិកមួយចំនួនមិនលើកដៃឯកភាពឡើយ ព្រោះនេះជាការរៀបចំទុកជាមុន ដោយលក្ខណៈបក្សពួកនិយម»។
នេះជាការបង្ហោះសារស័ព្ទទម្លាយ ជាសាធារណៈរបស់អតីតអគ្គលេខាធិការសហព័ន្ធប្រដាល់គុនខ្មែរ លោក ពេជ្រ សូផែន (រាជ សុផែន) ដែលទើបត្រូវបានទម្លាក់មកធ្វើជាសមាជិកធម្មតាវិញ នៅក្នុងអាណត្តិថ្មីនេះ។ លោកបានបន្តថា៖ «ខ្ញុំខិតខំស្ទើមួយជីវិត ដើម្បីគុនខ្មែរ ប៉ុន្តែគ្មានន័យអ្វី ដូចបក្សពួកអែបអបឡើយ! ឱគុនខ្មែរអើយ តើឆ្នាំ២០២៣ក្នុងនាមជាម្ចាស់ផ្ទះទៅជាយ៉ាងណា? បើផ្ទៃក្នុងដឹកនាំសហព័ន្ធ កំពុងតែរកាំរកូសគ្នាចាប់ពីពេលនេះទៅហើយនោះ?»។
បន្ថែមលើនេះ លោក រាជ សុផែន បានបញ្ជាក់យ៉ាងលម្អិតពីសមាសភាពថ្មីទាំង៦នាក់ និងអ្នក ដែលបាននាំអ្នកទាំង៦នេះ មកដាក់បញ្ចូល នៅក្នុងអាណត្តិថ្មីនេះ ព្រមទាំងបង្ហាញពីការផ្លាស់ប្តូរតួនាទីគ្នា ដ៏សែនចម្លែក នៅក្នុងអាណត្តិថ្មីនេះ ផងដែរ ហើយបញ្ហាទាំងអស់នេះ ត្រូវបានលោក រាជ សុផែន ចាត់ទុកថា ជាករណីបក្ខពួកនិយម ដែលបានរៀបចំឡើង ដោយមេៗ នៅក្នុងសហព័ន្ធនេះ។
លោក ពេជ្រ សូផែន បានប្រាប់កាសែតក្នុងស្រុកមួយ បន្ថែមទៀតថា៖ «តាមច្បាប់ គឺមុនបោះឆ្នោត គេយកសមាសភាពថ្មីហ្នឹង ទៅឆ្លងគណៈកម្មាធិការប្រតិបត្តិចាស់សិន ដើម្បីពិនិត្យមើល និងធ្វើការវាយតម្លៃ ប៉ុន្តែនេះអត់ទេ អ្នកធំៗ២ទៅ៣នាក់ហ្នឹង គេស៊ុមគ្រលំគ្នា រៀបចំមុនទុកជាស្រេច ហើយនៅថ្ងៃមហាសន្និបាត ទើបបង្ហាញមុខអ្នកថ្មីទាំងនោះតែម្តង អ៊ីចឹងយើងមិនអាចទៅកែប្រែអ្វីបានទេ ព្រោះអាហ្នឹងវាដូចជាការចាប់បង្ខំយើងឱ្យបោះឆ្នោត តាមការលើកដៃ ដើម្បីបានសមាសភាព ជាបក្ខពួករបស់គេ បានរៀបចំហ្នឹង»។
«ចំណែកពួកខ្ញុំ បានតស៊ូជាមួយគុនខ្មែរនេះ ១០ទៅ២០ឆ្នាំមកហើយ ប៉ុន្តែដល់ពេលគេធ្វើបែបហ្នឹង ដូចជាមើលងាយពួកខ្ញុំៗ ជាចាស់ៗពេក ព្រោះអ្នកថ្មីដែលយកមកនោះ ជាបក្ខពួកតែមួយ ព្រោះសុទ្ធតែជាបងប្អូនជីដូនមួយ បងធម៌ ប្អូនធម៌ ប្អូនថ្លៃ ដល់អ៊ីចឹងវាពិបាកដែរ»។ លោក រាជ សុផែន បានប្រាប់បន្ថែម។
តាមរយៈលទ្ធផលនៃការបោះឆ្នោត កាលពីថ្ងៃសុក្រនោះ សហព័ន្ធកីឡាប្រដាល់គុនខ្មែរ បានបន្ថែមអ្នកថ្មីចំនួន៦នាក់ រួមមានលោក ប៉ែន ស៊ីនេត លោក ហួត សេងទ្រី លោក ទុយ ប៊ុនហឿន លោក ផេង វណ្ណៈ លោក ពៅ វណ្ណា និងលោក អ៊ិន ខេមរិន្ទ ចូលទៅក្នុងគណៈកម្មាធិការប្រតិបត្តិអាណត្តិថ្មីនេះ គឺបន្ថែមទៅលើបេក្ខភាពជាគណៈកម្មាធិការប្រតិបត្តិចាស់ ទាំង១៣នាក់ ដែលអ្នកទាំងនេះ សុទ្ធតែបន្តមានឈ្មោះ នៅក្នុងអាណត្តិថ្មីនេះ ប៉ុន្តែមានការផ្លាស់ប្តូរតួនាទីច្រើននាក់។
លោក រាជ សុផែន បានបញ្ជាក់ថា៖«ទាក់ទងនឹងប្រវត្តិក្បាច់គុនប្រដាល់ខ្មែរ បទបញ្ជានៃការប្រកួត ផែនការណ៍ឆ្ពោះទៅស៊ីហ្គេម ឆ្នាំ២០២៣ និងការងារផ្សេងៗទៀត គឺខ្ញុំ និងព្រឹទ្ធាចារ្យមួយចំនួនទៀត ជាអ្នកធ្វើ និងជាអ្នកចងក្រង តែទីបំផុត គេអត់ឱ្យតម្លៃទេ! អ៊ីចឹងខ្ញុំត្រូវតែមានប្រតិកម្មចំពោះអាណត្តិនេះ ដើម្បីឱ្យមហាជនបានដឹង និងឱ្យសហព័ន្ធ កែទម្រង់ ដើម្បីកុំឱ្យយកសហព័ន្ធជាតិ ទៅជាន់ឈ្លីបែបនេះ ព្រោះនេះជាការងាររបស់ជាតិ សម្រាប់ឆ្ពោះទៅឆ្នាំ២០២៣ តែបើយកបក្ខនិយមមកធ្វើការបែបនេះ វាអត់រីកចម្រើនទេ»។
តែទោះបីជាយ៉ាងណា ទាក់ទងទៅនឹងការចោទប្រកាន់ទាំងនេះ លោក តែម ម៉ឺន ដែលទទួលបានការគាំទ្រ ឱ្យបន្តធ្វើជាប្រធានសហព័ន្ធប្រដាល់គុនខ្មែរនោះ បានស្រាយបំភ្លឺ តាមរយៈកាសែតភ្នំពេញប៉ុស្តិ៍ កាលពីថ្ងៃចន្ទថា៖ «យើងបានជ្រើសរើសមនុស្សយកមកជួយ មិនមែនជាការប្រកាន់បក្ខពួកនិយមអ្វីនោះទេ ព្រោះបើនៅតែគណៈកម្មាធិការប្រតិបតិ្តចាស់ ១៣នាក់មុននោះ វាពិបាក នឹងធ្វើការកែទម្រង់ណាស់ ដោយសារមនុស្សចាស់ក៏ច្រើន អ៊ីចឹងអ្នកថ្មី ដែលយើងយកមក ទី១ នៅក្មេង ទី២ ជាធនធាន និងទី៣ មានចំណេះដឹង ដែលជាបញ្ហាសំខាន់»។
«យើងយកសុទ្ធតែថ្នាក់ប្រធាននាយកដ្ឋាន អ្នកមានផ្កាយ២ អ្នកមានទ្រព្យ និងគ្រូជំនាញកីឡា មកជួយធ្វើការងារ តើមានរឿងអីទៅខុស? មិនមែនយើងមក ដើម្បីយកលុយយើងឯណា!។ បើថាយក អ្នកមិនចេះមកបំផ្លាញ អាហ្នឹងខ្ញុំឯកភាពថា បក្ខពួក ប៉ុន្តែនេះយើងដាក់អ្នកមានភាពរហ័សរហួស នៅក្មេង មានចំណេះដឹង មកធ្វើការ គឺយើងយកមនុស្សមកជួយកែទម្រង់ មិនមែនយកមកបង្ករឿងឱ្យសហព័ន្ធ កាន់តែលំបាកនោះទេ»។
ប្រធានសហព័ន្ធរូបនេះ បានបន្ថែមថា៖«យើងមិនបានដកអ្នកចាស់ឯណា គឺយើងរក្សាអ្នកចាស់ បង្កើនអ្នកថ្មី ដោយយើងគ្រាន់តែផ្លាស់ប្តូរតួនាទីរបស់ពួកគាត់ អ៊ីចឹងអ្វីដែលខ្ញុំធ្វើ គឺដើម្បីកែទម្រង់សហព័ន្ធ ហើយបើនៅតែអ្នកចាស់១៣នាក់មុននោះ ក៏ខ្ញុំអត់ធ្វើជាប្រធានទៀតដែរ គឺទាល់តែយកអ្នកថ្មី ចូលមកជួយយើងឱ្យបានច្រើន ដើម្បីមករួមចំណែកជួយកីឡារបស់យើង ព្រោះបើធ្វើងំៗតែ១៣នាក់មុននោះ វាពិបាកនឹងឈានទៅមុខបានលឿនណាស់ ដ្បិតអីកម្លាំងចាស់ វាមិនដូចកម្លាំងក្មេងៗ ដែលគេទាំងសមត្ថភាព និងចំណេះដឹងនោះទេ»៕
