មន្រ្តីជំនាញរបស់សហព័ន្ធកីឡាកាយសម្ព័ន្ធកម្ពុជា លោក ណយ ផាណា បានធ្វើការវាយតម្លៃជារួមថា ការប្រកួតកីឡាកាយសម្ព័ន្ធជ្រើសរើសជើងឯកថ្នាក់ជាតិ និងពានរង្វាន់ឯកឧត្តមបណ្ឌិត ថោង ខុន លើកទី៥ ឆ្នាំ ២០២១ ដែលធ្វើនៅសាលាបឋមសិក្សាសាលាលេខ ៥ ស្រុកកំពង់ត្រឡាច ខេត្តកំពង់ឆ្នាំង បានបញ្ចប់ដោយជោគជ័យ កាលពីល្ងាចថ្ងៃចន្ទ។
ជាមួយគ្នានេះ ក្រុមក្រសួងមហាផ្ទៃ ដែលមានបេក្ខភាពជម្រើសជាតិ លេងតំណាងឱ្យភាគច្រើននោះ បានទទួលចំណាត់ថ្នាក់លេខ១ ក្នុងនាមជាក្រុម ដែលឈ្នះបានមេដាយមាសច្រើនជាងគេ ប្រចាំឆ្នាំ២០២១នេះ ព្រោះមន្រ្តីជំនាញ បានធ្វើការពិនិត្យឃើញថា ក្រុមជម្រើសជាតិ មានភាពលេចធ្លោជាមួយបច្ចេកទេសរីកចម្រើនជាងឆ្នាំមុនទៅទៀត ដែលធ្វើឱ្យក្រុមអត្តពលិកមកពីតាមបណ្តាក្លិប មានការពិបាក ក្នុងការប្រកួតប្រជែងជាមួយពួកគេ។
លោក ណយ ផាណា បាននិយាយថា៖ «ផ្នែកទៅលើលទ្ធផល នៃប្រកួតការប្រកួតកីឡាកាយសម្ព័ន្ធថ្នាក់ជាតិ និងពានរង្វាន់ឯកឧត្តមបណ្ឌិត ថោង ខុន ឆ្នាំ២០២១នេះ គឺក្រុមជម្រើសជាតិ ទទួលបានលទ្ធផលល្អ ស្ទើរទាំងអស់ ដោយសារការហ្វឹកហាត់របស់ក្លិប មិនបានគ្រប់គ្រាន់ ព្រោះមានការបិទខ្ទប់ ក្នុងវិបត្តិនៃជំងឺកូវីដ ១៩ អ៊ីចឹងពួកគាត់ ពិតជាមានការពិបាក ក្នុងការប្រកួតប្រជែងជាមួយក្រុមជម្រើសជាតិ ដ្បិតអីក្រុមជម្រើសជាតិ បានហ្វឹកហាត់រហូត អត់មានរំសាយនោះទេ»។
អគ្គលេខាធិការសហព័ន្ធកីឡាកាយសម្ព័ន្ធកម្ពុជា លោក ណយ ផាណា បានបន្ថែមថា៖ «ក្រុមជម្រើសជាតិ មានគោលការណ៍មួយ ដោយឯកឧត្តមបណ្ឌិត ថោង ខុន បានអនុញ្ញាតឱ្យបិទខ្ទប់ហ្វឹកហាត់ អ៊ីចឹងខ្ញុំក្នុងនាមជាអ្នកអនុវត្តបច្ចេកទេស បានអនុវត្តតាមអនុសាសន៍របស់ឯកឧត្តមប្រធានសហព័ន្ធ ដើម្បីរៀបចំហ្វឹកហាត់បិទខ្ទប់រហូតមក គឺអត់មានរំសាយទេ ហេតុនេះក្រុមជម្រើសជាតិរបស់យើង នៅតែមានគុណផលល្អ គឺមានកម្រិតបច្ចេកទេសរីកចម្រើនជាងឆ្នាំមុនទៅទៀត»។
ឆ្លងកាត់ប្រកួតថ្នាក់ជាតិ យ៉ាងស្វិតស្វាញរបស់អត្តពលិកសរុបចំនួន ៦៤ នាក់ តាំងពីថ្ងៃទី៨ និងបានបញ្ចប់ នៅថ្ងៃទី១៣ ខែធ្នូ ម្សិលមិញនេះ ក្រុមកីឡាករ កីឡាការិនីរបស់ក្រសួងមហាផ្ទៃ ដណ្តើមបានមេដាយច្រើនជាងគេ នៅក្នុងការប្រកួតនៅលើទាំង ១១ គឺកាយសម្ព័ន្ធអាទីស្ទីក ៦ វិញ្ញាសា និងកាយសម្ព័ន្ធអាអេរ៉ូប៊ិក ៥ វិញ្ញាសា។
តាមលទ្ធផលបច្ចេកទេសរបស់គណៈកម្មការ បានបង្ហាញថា ក្រុមកីឡាករ កីឡាការិនីរបស់ក្រសួងមហាផ្ទៃ ឈរនៅលេខ ១ ដោយដណ្តើមបានមេដាយមាស៤ ប្រាក់៣ សំរឹទ្ធ២ តាមពីក្រោយដោយក្រុមខេត្តក្រចេះ ដែលឈ្នះបានមេដាយមាស៣ ប្រាក់៥ សំរឹទ្ធ២ រីឯក្រុមខេត្តកំពង់ឆ្នាំង ឈ្នះបានមេដាយមាស៣ ប្រាក់៣ សំរឹទ្ធ៤ និងក្រុមខេត្តតាកែវ ឈ្នះបានមេដាយមាស ១ សំរឹទ្ធ ៣។
ចំពោះគោលបំណងធំ នៃការប្រកួតកីឡាកាយសម្ព័ន្ធថ្នាក់ជាតិ ខុន ឆ្នាំនេះ លោក ណយ ផាណា បានបញ្ជាក់ថា៖ «តាមរយៈការប្រកួតនេះ យើងមានគោលបំណងសម្រួចគុណផលកីឡាករ កីឡាការិនីហ្នឹងឯង ជាពិសេសយើងពិនិត្យផ្តោតខ្លាំងមែនទែនទៅលើកីឡាកាយសម្ព័ន្ធអាអេរ៉ូប៊ិកនេះ គឺស្វែងរកឱ្យមានលទ្ធផលល្អជាងមុនៗ សម្រាប់ឆ្នាំ ២០២២ ដើម្បីវាស់ស្ទង់សមត្ថភាព ត្រៀមឆ្ពោះទៅស៊ីហ្គេម នៅវៀតណាម ឆ្នាំ២០២២ អ៊ីចឹងការប្រកួតនេះ ជាព្រឹត្តិការណ៍មួយ ដើម្បីសម្រួចស្វែងរកគុណផលពិតរបស់ក្រុមអត្តពលិក ត្រៀមទៅហ្វឹកហាត់នៅចិនផង និងត្រៀមទៅចូលរួមប្រកួតស៊ីហ្គេម ដែលប្រទេសវៀតណាម ធ្វើជាម្ចាស់ផ្ទះផង»៕