សហព័ន្ធខ្មែរកីឡាទោចក្រយាន បានប្រកាសពីការពន្យារពេលការប្រកួតកីឡាទោចក្រយានជ្រើសរើសជើងឯកថ្នាក់ជាតិ ប្រចាំឆ្នាំ២០២១ ដែលគ្រោងធ្វើនៅថ្ងៃទី២៥ ខែធ្នូ ឆ្នាំ២០២១នេះ ទៅធ្វើនៅថ្ងៃទី១១ ដល់១៣ ខែមករា ឆ្នាំ២០២២វិញ នៅលើទឹកដីខេត្តសៀមរាប ដោយមានការបើកទូលាយគ្រប់មជ្ឈដ្ឋានទូទៅឱ្យចូលរួមតែម្តង។
ជុំវិញការប្រកាសពីការពន្យារពេលភ្លាមៗនេះ លោក នូ ចំរើន អគ្គលេខាធិការសហព័ន្ធខ្មែរកីឡាទោចក្រយាន បានប្រាប់ថា ដោយសារទីលានសម្រាប់ការប្រកួតរបស់ក្រុមជំនាញកម្រិតខ្ពស់ នៅមិនទាន់ធ្វើបានរួចរាល់ តាមស្តង់ដារ ព្រោះគោលដៅនៃការទទួលធ្វើម្ចាស់ផ្ទះស៊ីហ្គេមឆ្នាំ២០២៣ របស់កម្ពុជា នឹងយកទីតាំងតំបន់យើងត្រៀមនេះ ជាទីតាំងប្រកួតស៊ីហ្គេមតែម្តង។
«សហព័ន្ធ នឹងលើកពេល នៃការប្រកួតកីឡាទោចក្រយានជ្រើសរើសជើងឯកថ្នាក់ជាតិ ដោយសារទីលានប្រកួតប្រជែងជំនាញកម្រិតខ្ពស់ ទាំងកង់គួក និងកង់ភ្នំ មិនទាន់រៀបរយតាមបច្ចេកទេសរួចរាល់ទាន់ពេលវេលា ហេតុនេះយើងមិនទាន់អាចធ្វើបានទេ ព្រោះព្រឹត្តិការណ៍នេះ ធ្វើឡើង ដើម្បីត្រៀមឆ្ពោះទៅគោលដៅស៊ីហ្គេម ២លើកចំពោះមុខ តម្រូវរៀបចំឱ្យតបានរលូនតាមបច្ចេកទេស»។
លោក នូ ចំរើន បានបន្ថែមថា៖ «សម្រាប់ការប្រកួតជើងឯកថ្នាក់ជាតិនេះ យើងបើកទូលាយ សម្រាប់កីឡាករ កីឡាការិនីទាំងប្រភេទកង់គួក និងកង់ភ្នំ អ៊ីចឹងការប្រកួតនេះ យើងសម្រួចទៅជំនាញក្នុងកម្រិតខ្ពស់ ដើម្បីវាស់ស្ទង់សមត្ថភាពកីឡាករកីឡាការិនីជម្រើសជាតិផង និងផ្តល់ឱកាសជូនដល់កីឡាករកីឡាការិនី មកពីបណ្តាក្លិប-សមាគមទូទាំងប្រទេស បានបញ្ចេញសមត្ថភាពផង គឺគ្រប់មជ្ឈដ្ឋាន»។
អគ្គលេខាធិការរូបនេះ បានប្រាប់ទៀតថា៖ «ការប្រកួតនេះ ក៏ជាផែនការគោលដៅរបស់សហព័ន្ធ ដើម្បីសម្រិតសម្រាំងកីឡាករកីឡាការិនី ដែលមានសិទ្ធផលខ្ពស់ៗទុក ត្រៀមហ្វឹកហាត់បំប៉នបន្ថែម សម្រាប់ស៊ីហ្គេមនាខែ ឧសភាឆ្នាំ២០២២ នៅប្រទេសវៀតណាម និងត្រៀមស៊ីហ្គេម លើកទី៣២ ឆ្នាំ២០២៣ នៅកម្ពុជា»។
ចំពោះវិញ្ញាសា ដែលត្រូវដាក់ឱ្យប្រកួតនេះ គឺប្រភេទកង់គួក(Road Bike) មានការប្រកួតកម្រិតថ្នាលផ្នែកបុរស អាយុក្រោម១៨ឆ្នាំ (Man Junior Road Bike) ក្រុមជំនាញខ្ពស់ផ្នែកបុរស អាយុ១៨ឆ្នាំឡើង (Man Elite Road Bike) និងក្រុមជំនាញផ្នែកបុរសអាយុ៤០ឆ្នាំឡើង (Man Master Road Bike)។ ចំណែកប្រភេទកង់ភ្នំ (Mountain Bike) មានការប្រកួតសម្រាប់ក្រុមកម្រិតថ្នាល ក្រុមជំនាញខ្ពស់ ក្រុមជំនាញ និងការប្រកួតកង់ភ្នំផ្នែកនារី (Women Mountain Bike)៕