បរទេស៖ គ្រូបង្វឹកក្រុមតោខៀវ Chelsea លោក Thomas Tuchel មិនរំពឹងថានឹងក្លឹបមានការចុះហត្ថលេខានាំយកកីឡាករថ្មីណាមួយក្នុងអំឡុងពេលទីផ្សារដោះដូរកីឡាករនិងបើកជាលើកទីពីរនៅកំលុងខែមករា២០២២ខាងមុខ នោះទេ។ទោះបីជាបច្ចុប្បន្នក្រុមការពារតំណែងជើងឯកក្របខណ្ឌ Champion League មានធនធានកីឡាករគ្រប់គ្រាន់ទៅហើយក្តី ប៉ុន្តែបច្ចុប្បន្ននេះក្រុមដែលមានមូលដ្ឋាននៅទីក្រុងឡុងដ៏ បានជួបប្រទះបញ្ហានៅតំបន់ខ្សែការពារស្លាបឆ្វេង និងនៅតំបន់បម្រើកណ្តាល ដោយសារបញ្ហារបួសរបស់កីឡាករឆ្នើមមួយចំនួន។
ជាក់ស្តែងកីឡាករដែលកំពុងរបួសគឺខ្សែការពារអង់គ្លេស Ben Chilwell ជាដើម ប៉ុន្តែគ្រូបង្វឹកសញ្ជាតិអាឡឺម៉ង់លោក Tuchel បានបង្ហើបប្រាប់ថារូបលោកនៅតែមានការជឿជាក់ពេញលេញនៅក្នុងក្រុមសម្រាប់កីឡាករបច្ចុប្បន្នដែលរូបលោកមាន ។
ថ្លែងទៅកាន់អ្នកសារព័ត៌មានក្នុងសន្និសីទសារព័ត៌មានលោកTuchel បានលើកឡើងថាៈ យើងមិនទាន់ពិភាក្សាគ្នាទេថានិងនាំយកកីឡាកររូបណាមករួមក្រុម ព្រោះជាដំបូងយើងបន្តប្រើប្រាស់ធនធានដែលមាន ហើយសង្ឃឹមថាយើងអាចដាក់អោយ កីឡាករទាំងអស់បង្ហាញសមត្ថភាពពេលពួកគេវិលត្រលប់ពីបញ្ហារបួស វិញ ដោយមានភាពរឹងមាំពេញលេញ ។អតីតគ្រូបង្វឹកPSG និង Dortmund ក៏បានឆ្លើយសំណួរទាក់ទងកីឡាករដែលកិច្ចសន្យារបស់ពួកគេជាមួយក្លឹបអស់សុពលភាពនៅរដូវក្តៅខាងមុខនេះដោយរូបលោកបានធ្វើការអំពាវនាវឱ្យមានការអត់ធ្មត់រវាងភាគីទាំងសងខាង និង និងនរណាម្នាក់ដែលពាក់ព័ន្ធជាមួយក្លឹប៕
ប្រភពព័ត៍មាន៖ Sportsmole