កីឡាករកូនខ្មែររស់នៅសហរដ្ឋអាមេរិក ម៉ាត់ថេរ ហ្រ្វេងតារា បេននីឈី (បេននីឈី) បានបង្កើតឱ្យមានក្តីសង្ឃឹមសម្រាប់ក្រុមជម្រើសជាតិហែលទឹកកម្ពុជា ក្នុងការឈានទៅរកការឈ្នះបានមេដាយ ក្នុងព្រឹត្តិការណ៍ស៊ីហ្គេម ដូចការរំពឹងទុក បន្ទាប់ពីរូបគេ បានបំបែកកំណត់ត្រាថ្នាក់ជាតិ នៅក្នុងព្រឹត្តិការណ៍ប្រកួតកីឡាហែលទឹកជ្រើសរើសជើងឯកកម្រិតពិភពលោក ទីខ្លី អាងហែលទឹកប្រវែង២៥ ម៉ែត្រ «World Swimming Championships (25 meters) កាលពីថ្ងៃព្រហស្បតិ៍ ម្សិលមិញ។
តាមរយៈការប្រកួតបើកឆាក លើវិញ្ញាសាហែលរបៀបមេអំបៅ ចម្ងាយ២០០ម៉ែត្រ នៅ ទីក្រុងអាប៊ូដាប៊ី ប្រទេសអារ៉ាប់រួម កាលពីម្សិលមិញនេះ កីឡាករ បេននីឈី ធ្វើបានយ៉ាងល្អ ដើម្បីមកដល់ទីផ្តាច់ព្រ័ត្រជាមួយថវិរវេលា ២:០០.៩៥នាទី ហើយជាមួយកំណត់ត្រាថ្មីនេះ បេននីឈី បានទទួលចំណាត់ថ្នាក់លេខ១ នៅក្នុងការប្រកួតជម្រុះតាម Heat របស់ខ្លួន ដែលមានបេក្ខភាព៥នាក់។
ជាមួយលទ្ធផលនេះ សហព័ន្ធខ្មែរកីឡាហែលទឹក បានសរសេរបង្ហោះនៅលើផេចហ្វេសប៊ុករបស់ខ្លួនថា៖ «អបអរសាទរ កីឡាករ ម៉ាត់ថេរ ហ្រ្វេងតារា បេននីឈី បានបំបែកកំណត់ត្រាថ្នាក់ជាតិ ក្នុងថិរវេលា ២:០០.៩៥ នាទី លើប្រភេទវិញ្ញាសា ២០០ម៉ែត្រ ហែលរបៀបមេអំបៅ ក្នុងការប្រកួតជ្រើសរើសជើងឯកពិភពលោក (អាងហែលទឹក២៥ម៉ែត្រ) ក្នុងទីក្រុងអាប៊ូដាប៊ី ប្រទេសអារ៉ាប់រួម»។
ជាមួយគ្នានេះ លោក ហែម គីរី អគ្គលេខាធិការសហព័ន្ធខ្មែរកីឡាហែលទឹក បាននិយាយថា ថិរវេលាដែលកីឡាករ បេននីឈី ធ្វើបាន នៅក្នុងការប្រកួតជើងឯកពិភពលោកនេះ គឺកាន់តែជិតកម្រិតស៊ីហ្គេម ដើម្បីរកមេដាយ ជាពិសេសស៊ីហ្គេម ឆ្នាំ២០២៣ ដែលកម្ពុជា ត្រូវធ្វើជាម្ចាស់ផ្ទះ ដោយលោកបានសង្កត់ធ្ងន់ថា យើងនៅមានពេល ១ឆ្នាំកន្លះទៀត។
បើតាមការប្រៀបធៀបពីថិរវេលា ដែលកីឡាករកម្ពុជា បេននីឈី ធ្វើបាននាពេលនេះ គឺកៀកបំផុត ទៅនឹងថិរវេលារបស់អត្តពលិក ដែលដណ្តើមបានមេដាយប្រាក់ និងមេដាយសំរឹទ្ធ នៅស៊ីហ្គេម ព្រោះការប្រកួតស៊ីហ្គេម លើកចុងក្រោយ កាលពីឆ្នាំ២០១៩ កីឡាករសិង្ហបុរី Quah Zheng Wen បានឈ្នះមេដាយមាស ជាមួយថិរវេលា ១:៥៦.៦១នាទី ខណៈកីឡាករថៃ ដែលដណ្តើមបានមេដាយប្រាក់ ប្រើពេល ២:០០.៣១នាទី និងអ្នកបានមេដាយសំរឹទ្ធជាកីឡាកររបស់សិង្ហបុរី ប្រើពេល ២:០០.៥៣នាទី ក្នុងការប្រកួតហែលមេអំបៅ ចម្ងាយ២០០ម៉ែត្រនេះ។
យ៉ាងណាក៏ដោយ ការធ្វើបានក្នុងថិរវេលា ២:០០.៩៥ នាទី លើប្រភេទវិញ្ញាសា ២០០ម៉ែត្រ ហែលរបៀបមេអំបៅ នៅក្នុងការប្រកួត