ក្រុមជម្រើសជាតិវៀតណាម ពិតជាអាចធ្វើបានយ៉ាងល្អ ក្នុងការបន្តយកឈ្នះលើក្រុមគោព្រៃកម្ពុជា ដើម្បីឈ្នះកៅអី ឡើងទៅប្រកួតវគ្គពាក់កណ្តាលផ្តាច់ព្រ័ត្រពានរង្វាន់ AFF Suzuki Cup 2020 ប៉ុន្តែពួកគេ ហាក់មិនសូវពេញចិត្ត នឹងការឈ្នះក្រុមកម្ពុជា ត្រឹម ៤-០ ប៉ុន្មានទេ។
តាមរយៈការប្រកួត នៅពហុកីឡដ្ឋាន Bishan Stadium លើទឹកទីប្រទេសសិង្ហបុរី កាលពីយប់ថ្ងៃអាទិត្យ ម្សិលមិញនេះ ក្រុមជម្រើសជាតិកម្ពុជា អាចរក្សាការគ្រប់គ្រងបាល់បានច្រើនជាងក្រុមវៀតណាម ប៉ុន្តែពួកគេ មិនអាចរកបានសូម្បី១គ្រាប់។ ផ្ទុយពីនេះ ការរកបាន២គ្រាប់របស់ខ្សែប្រយុទ្ធ Nguyen Tien Linh នៅនាទីទី ៣ និងទី២៧ និងការរកបានម្នាក់១គ្រាប់ទៀតរបស់ Bui Tien Dung និង Nguyen Quang Hai នៅនាទីទី៥៥ និងទី៥៧ បានជួយឱ្យក្រុមវៀតណាម បន្តយកឈ្នះក្រុមកម្ពុជា ៤-០។
ការយកឈ្នះក្រុមកម្ពុជា ៤-០ កាលពីយប់មិញនេះ បានបញ្ជាក់យ៉ាងច្បាស់ថា ក្រុមកម្ពុជា នៅតែមិនអាចកែប្រែប្រវត្តិសាស្រ្តរបស់ខ្លួន ចំពោះការចាញ់ក្រុមវៀតណាម ព្រោះតាមរយៈកំណត់ត្រានៃការជួបគ្នាចំនួន៨លើក ទាំងក្នុងការប្រកួតស៊ីហ្គេម ពាន AFF Championship និងការប្រកួតពាន AFC ASIAN Cup ចាប់តាំងពីឆ្នាំ១៩៩៥ រហូតដល់ឆ្នាំ២០១៨ គឺកម្ពុជា បានចាញ់រហូត។
យ៉ាងណាក៏ដោយ សម្រាប់ការឈ្នះក្រុមកម្ពុជា ៤-០ លើកនេះ គ្រូបង្គោលក្រុមវៀតណាម លោក Park Hang Seo ហាក់មិនសូវសប្បាយចិត្តប៉ុន្មានទេ បើទោះបី នេះជាការសម្រេចគោលដៅ ដែលលោកបានកំណត់ និងប្តេជ្ញាចិត្តធ្វើឱ្យបាន តាំងពីមុនការប្រកួតចាប់ផ្តើមក៏ដោយ ព្រោះលទ្ធផលនេះ វាមិនអាចជួយឱ្យក្រុមវៀតណាម ដណ្តើមបានចំណាត់ថ្នាក់លេខ១ ប្រចាំពូលB នោះទេ។
ការរកបាន៤គ្រាប់នេះ វាបានត្រឹមជួយឱ្យក្រុមវៀតណាម ឈរនៅលេខ២ ក្រោមក្រុមឥណ្ឌូនេស៊ី ដដែល ព្រោះកាលពីយប់ថ្ងៃអាទិត្យនោះដែរ ឥណ្ឌូនេស៊ី បានយកឈ្នះក្រុមម៉ាឡេស៊ី ៤-១ ដើម្បីបន្តមានប្រៀបលើ វៀតណាម តាមរយៈការស៊ុតបញ្ចូលទីទៅលើគូប្រកួតបានច្រើនគ្រាប់ជាងក្រុមវៀតណាម បើទោះបីជាក្រុមទាំង២នេះ មាន១០ពិន្ទុស្មើគ្នា និងមានគ្រាប់បាល់ចំណេញ ៩គ្រាប់ដូចគ្នាក៏ដោយ។
ជាមួយលទ្ធផលនេះ ក្រុមវៀតណាម នឹងត្រូវប្រឈមការប្រកួតដ៏តានតឹង ដោយពួកគេ ត្រូវឡើងទៅជួបក្រុមលេខ១ប្រចាំពូលA គឺជម្រើសជាតិថៃ ដែលបានឈ្នះតាំង៤ប្រកួត មាន១២ពិន្ទុពេញ ខណៈក្រុមឥណ្ឌូនេស៊ី ត្រូវប៉ះក្រុមលេខ២ពូលA សិង្ហបុរី ហើយការប្រកួតវគ្គពាក់កណ្តាលផ្តាច់ព្រ័ត្រ នេះ ត្រូវធ្វើឡើងចំនួន២ជើង ដើម្បីរកក្រុមឈ្នះឡើងទៅប្រកួតគ្នា នៅវគ្គផ្តាច់ព្រ័ត្រ៕
