ក្រុមកីឡាករ កីឡាការិនីប្រដាល់សកល មកពីទូទាំងប្រទេសកម្ពុជា បាននឹងកំពុងប្រកួតប្រជែងគ្នា នៅក្លិបប្រដាល់នាយកដ្ឋានអង្គរក្ស ដើម្បីស្វែងរកជើងខ្លាំង ថ្នាក់ជាតិ ប្រចាំឆ្នាំ២០២១ ទៅតាមប្រភេទទម្ងន់នីមួយៗ ខណៈចំនួនអ្នកចូលរួម និងចំនួនក្លិប សមាគមន៍ ដែលបានដាក់ពាក្យចូលរួម គឺមានការកើនឡើងខ្លាំង ប្រើបៀបធៀបទៅនឹងការប្រកួតកីឡាប្រដាល់សកលជ្រើសរើសជើងឯកថ្នាក់ជាតិ កាលពីឆ្នាំ២០២០ ដែលមានការរឹតបណ្តឹង ដោយសារវិបត្តិនៃជំងឺកូវីដ១៩។
លោក ប៊ុយ សោភ័ណ្ឌ អគ្គលេខាធិការសហព័ន្ធកីឡាប្រដាល់សកលកម្ពុជា បានថ្លែងថា៖«ការប្រកួតប្រដាល់សកលជើងឯកថ្នាក់ជាតិ ឆ្នាំ២០២១នេះ មានកីឡាករ កីឡាការិនី ចូលរួមសរុបចំនួន១០៤នាក់ គឺមានការកើនឡើង ជិត៣ដង ហើយមានមកពី២១ក្លិបសមាគម ដែលចំនួននេះ កើនឡើងជិត២ដងផងដែរ បើប្រៀបធៀបទៅនឹងការប្រកួតថ្នាក់ជាតិ កាលពីឆ្នាំ២០២០ កន្លងមក ដែលរឹតបន្តឹង ដោយសារបញ្ហាជំងឺកូវីដ១៩»។
ចំពោះក្រុមអត្តពលិកទាំង១០៤នាក់ (ស្រី៤នាក់) នេះ ត្រូវធ្វើការប្រកួតយប្រជែងគ្នា នៅលើប្រភេទវិញ្ញាសាចំនួន១០ ដោយក្នុងនោះការប្រកួតផ្នែកនារី មានតែប្រភេទទម្ងន់៥៧គីឡូក្រាមមួយទេ ហើយការប្រកួត បានចាប់ផ្តើម កាលពីថ្ងៃព្រហស្បតិ៍ និងគ្រោងបញ្ចប់ នៅថ្ងៃអាទិត្យនេះ។
យ៉ាងណាមិញ សម្រាប់ការប្រកួតជម្រុះចំនួន២៤គូ នាថ្ងៃបើកឆាក កាលពីថ្ងៃព្រហស្បតិ៍ ម្សិលមិញនេះ លោក ប៊ុយ សុភ័ណ្ឌ បានវាយតម្លៃថា គុណភាពបច្ចេកទេសប្រកួតរបស់កីឡាករកីឡាការិនីទាំងនេះ មានលក្ខណៈល្អប្រសើរច្រើន។
លោក បានបញ្ជាក់ថា៖ «ឆ្លងកាត់ការប្រកួតថ្ងៃទី១នេះ ខ្ញុំសង្កេតឃើញថា កម្រិតបច្ចេកទេសរបស់កីឡាករ កីឡាការិនី មានគុណភាពមិនខុសគ្នាឆ្ងាយប៉ុន្មានឡើយ ដោយមិនសូវមានអ្នកចាញ់ដោយសន្លប់នោះទេ ពោលគឺមានភាពប្រហាក់ប្រហែលគ្នាច្រើន ខណៈផ្នែករៀបចំបច្ចេកទេសរបស់មន្ត្រីសហព័ន្ធ ក៏ដំណើរការដោយរលូនផងដែរ»។
ជាមួយគ្នានេះ លោក ប៊ុយ សុភ័ណ្ឌ ដែលជាអ្នកគ្រប់គ្រងការប្រកួតថ្នាក់ជាតិ ឆ្នាំ២០២១ដែរនោះ បានប្រាប់ទៀតថា សម្រាប់ការប្រកួតថ្ងៃទី២ នាថ្ងៃសុក្រ ទី២៤ ខែធ្នូនេះ មាន២៨គូទៀត ហើយការប្រកួត នឹងបន្តធ្វើ ដើម្បីរកជើងខ្លាំងៗ នៅតាមប្រភេទទម្ងន់ទាំង១០ប្រភេទ ឡើងទៅប្រកួត វគ្គផ្តាច់ព្រ័ត្រ នៅថ្ងៃទី២៦ ខែធ្នូ ឆ្នាំ២០២១៕
