ក្រុមយុវជនអាយុក្រោម១៨ឆ្នាំ នៃមជ្ឈមណ្ឌល និងសាលាបាល់ទាត់ជាតិ (យុវជនបាទី) នឹងត្រូវវិលត្រឡប់ទៅលេងនៅលីគកំពូលកម្ពុជា ប្រចាំឆ្នាំ២០២២ ជាថ្មី ជំនួសក្រុមសូលទីឡូអង្គរ ដែលទើបបានកាត់ចេញ បន្ទាប់ពីពួកគេ ដណ្តើមបានតំណែងលេង១ នៃការប្រកួតជម្រើសជើងឯកកម្ពុជា លីគ២ ឆ្នាំ២០២១។
ការដណ្តើមបានកៅអី ឡើងទៅលេង នៅលីគកំពូលកម្ពុជា ឡើងវិញ របស់ក្រុមយុវជនបាទី បានកើតមានឡើង កាលពីថ្ងៃសៅរ៍ គឺបន្ទាប់ពីពួកគេ បានយកឈ្នះលើក្រុមខេត្តបន្ទាយមានជ័យ ត្រឹម ១-០ ក្នុងការប្រកួតលើកទី៧ចុងក្រោយ នៃលីគ២ ដែលបានធ្វើនៅមជ្ឈមណ្ឌល និងសាលាបាល់ទាត់ជាតិ។
យ៉ាងណាក៏ដោយ ការឈ្នះបានកៅអី ឡើងទៅលេងនៅលីគកំពូលកម្ពុជា ជាថ្មីនេះ ក៏ដោយសារតែក្រុមឈរនៅលេខ១ប្រចាំសប្តាហ៍ទី៦ ISI ដង្កោសែនជ័យ បានជួបការបរាជ័យ ២-១ ក្រោមស្នាដៃក្រុមមន្ទីរអយកខេត្តត្បូងឃ្មុំ ផងដែរ ហើយលទ្ធផលនេះ បានធ្វើឱ្យ ISI មានពិន្ទុតិចជាងក្រុមយុវជនបាទី វិញ គឺ១៨ពិន្ទុ ទល់នឹង១៦ពិន្ទុ។
ហេតុនេះការឈ្នះបានកៅអី ឡើងទៅលេងនៅលីគកំពូល ឡើងវិញ របស់ក្រុមយុវជនបាទី គឺមានការរួមចំណែកយ៉ាងសំខាន់ ពីសំណាក់ក្រុមខេត្តត្បូងឃ្មុំ។ ចំណែកក្រុមកោះកុងអេហ្វស៊ី ដែលបានដាក់គោលដៅ ប្រជែងយកកៅអី ឡើងទៅលេងនៅលីគកំពូលកម្ពុជា ដែរនោះ បានបន្តចាញ់ក្រុមសៀមរាប ៣-២ នាការប្រកួតវចុងក្រោយ កាលពីថ្ងៃសៅរ៍នោះដែរ ខណៈក្រុមU12កងយោធពលខេមរភូមិន្ទ បានស្មើ ២-២ ជាមួយក្រុមឬទ្ធីសែន។
ជាលទ្ធផលរួម សម្រាប់ការប្រកួតជម្រើសជើងឯកកម្ពុជា លីគ២ ឆ្នាំ២០២១ ដែលបានប្រព្រឹត្តទៅ ពីថ្ងៃទី២៧ ខែវិច្ឆិកា ដល់ថ្ងៃទី២៥ ខែឆ្នូ ឆ្នាំ២០២១នេះ គឺក្រុមយុវជនបាទី បានក្លាយជាម្ចាស់ជើងឯក ឯលេខ ២ បានទៅក្រុម ISIដង្កោសែនជ័យ លេខ ៣ ក្រុមមន្ទីរអយក ខេត្តត្បូងឃ្មុំ ហើយក្រុមនេះ ក៏បានពាន Fair Play ប្រចាំរដូវកាលនេះ ផងដែរ។
ជាមួយគ្នានេះ លោក Koji Gyotoku គ្រូបង្គោលយុវជនអាយុក្រោម ១៨ឆ្នាំ មជ្ឈមណ្ឌល និងសាលាបាល់ទាត់ជាតិ ទទួលបានពានជាគ្រូបង្វឹកល្អជាងគេ ចំណែកពានកីឡាករល្អជាងគេ បានទីលើកីឡាករ មិម សែតសាន របស់ក្រុមខេត្តត្បូងឃ្មុំ រីឯពានអ្នកចាំទីល្អជាងគេ បានទៅលើអ្នកចាំទី រ៉េត លីហេង របស់ក្រុមយុវជនបាទី ហើយអ្នកទាត់បាល់បញ្ចូលទីបានច្រើនជាងគេ បានទៅលើកីឡាកររបស់ក្រុមU12កងយោធពលខេមរភូមិន្ទ៕
