លោកនយករដ្ឋមន្រ្តី ហ៊ុន សែន លោកថ្លែងដោយបើកជំហថា បើយើងចង់ឱ្យមានការស្រុះស្រួលជាតិ រវាងកូរ៉េខាងជើង និងកូរ៉េខាងត្បូង យើងគួរតែលើកទឹកចិត្តឱ្យកីឡាទាំង២របស់កូរ៉េ បានចូលទៅក្នុងការប្រកួតកីឡាអូឡាំអន្តរជាតិដូចគ្នា ព្រោះប្រភេទកីឡាតេក្វាន់ ITF របស់កូរ៉េខាងជើង នៅមិនទាន់បានដាក់បញ្ចូល នៅឡើយទេ។
នៅក្នុងពិធីប្រគល់ប្រាក់រង្វាន់លើកទឹកចិត្តដល់វីរកីឡាការិនី អ៊ុក ស្រីមុំ ជាម្ចាស់មេដាយមាស ជើងឯកពិភពលោក នៅវិមានសន្តិភាព កាលពីព្រឹកថ្ងៃពុធ ម្សិលមិញ លោក ហ៊ុន សែន បានថ្លែងថា៖ «ប្រភេទកីឡាតេក្វាន់ដូ ITF របស់កូរ៉ាខាងជើង នៅមិនទាន់បានដាក់ចូលទៅក្នុងការប្រកួតកីឡាអូឡាំពិកអន្តរជាតិ នៅឡើយទេ អ៊ីចឹងបើដាក់កីឡាតេក្វាន់ដូ (WT) របស់កូរ៉េខាងត្បូងចូលហើយ គួរដាក់កូរ៉េខាងជើងចូលដែរទៅ ហេតុនេះ បើចង់បង្រួបបង្រួមកូរ៉េ លើកទឹកចិត្តទៅដល់កូរ៉េ ដើម្បីធ្វើការសម្រុះសម្រួលជាតិ គួរណាស់តែ គណៈកម្មាធិការអូឡាពិកអន្តរជាតិ ដាក់កីឡាទាំង២ប្រភេទនេះចូលកីឡាអូឡាពិក ដូចគ្នា ហើយនេះជាសំណូមពររបស់ខ្ញុំ»។
លោកនាយករដ្ឋមន្រ្តី បានបន្ថែមថា៖ «បើយើងចង់ឱ្យមានការស្រុះស្រួលជាតិ រវាងកូរ៉េខាងជើង និងកូរ៉េខាងត្បូង យើងគួរតែលើកទឹកចិត្តឱ្យកីឡាទាំង២នេះ វាទៅជាមួយគ្នា ព្រោះកាលមុន នៅក្នុងការប្រកួតកីឡាអូឡាំពិក កូរ៉េខាងជើង និងកូរ៉េខាងត្បូង បានរួមគ្នា បង្កើតជាក្រុមចម្រុះ ចូលទៅក្នុងការប្រកួតទៅហើយ អ៊ីចឹងទេ បើមកដល់កម្ពុជា កម្ពុជានឹងដាក់ទាំង២ គឺ ITF របស់កូរ៉េខាងជើង និង WT របស់កូរ៉េខាងត្បូង ព្រោះនេះជាផ្នែកមួយនៃការខិតខំជួយឱ្យប្រទេសទាំង២ ឈានឆ្ពោះទៅរកការបង្រួបបង្រួមជាតិ»។
គួរបញ្ជាក់ថា សម្រាប់ការប្រកួតកីឡាស៊ីហ្គេម លើកទី៣២ ឆ្នាំ២០២៣ កម្ពុជា ក្នុងនាមជាម្ចាស់ផ្ទះ បានសម្រេចរួចហើយថា នឹងដាក់ប្រភេទកីឡាតេក្វាន់ដូ ITF ចូលទៅក្នុងការប្រកួតនេះ ជាលើកដំបូង ហើយជាមួយគ្នានេះ សហព័ន្ធកីឡាតេក្វាន់ដូ ITFកម្ពុជា ដែលមានលោក កែវ រ៉េមី ជាប្រធាន មានការជឿជាក់ថា នឹងអាចដណ្តើមបានមេដាយមាស រហូតដល់ ១៥ ទៅតាមសម្ទុះនៃការកំណត់មេដាយមាសរបស់គណៈកម្មាធិការជាតិអូឡាំពិកកម្ពុជា និងក្រសួងអប់រំ យុវជន និងកីឡា។
តាងនាមឱ្យកម្ពុជា ដែលជាប្រទេសជិតខាង លោក ហ៊ុន សែន បានបញ្ជាក់ថា៖ «ខ្ញុំគិតថា សម្រាប់ផ្នែកអ្នកនយោបាយដូចជាប្រធានាធិបតីកូរ៉េខាងត្បូង មុននឹងដាច់អាណត្តិ គឺខិតខំដើម្បីឱ្យមានកិច្ចព្រមព្រៀងសម្របសម្រួលជាមួយកូរ៉េខាងជើង និងកូរ៉េខាងត្បូង ដូច្នេះក្នុងដំណើរនៃការឈានទៅសម្របសម្រួលនេះ វាគួរតែយើងជាអ្នកក្រៅ ដែលចង់ឃើញឧបទ្វីបកូរ៉េ មានសុខសន្តិភាព គួរគាំទ្រឱ្យកីឡាទាំង២នេះ វាបានចូលទៅក្នុងការប្រកួតកីឡាអូឡាំពិកអន្តរជាតិ ដូចគ្នា ហើយយើងសង្កេតឃើញថា កីឡា ITF ដែលដឹកនាំដោយឯកឧត្តម កែវ រ៉េមី គឺជាប្រភេទកីឡាមានសក្តានុពលខ្លាំង អាចដណ្តើមបានមេដាយមាសច្រើន»៕