ហេតុការណ៍ដ៏កម្រមួយ បានកើតមានឡើង នៅក្នុងការប្រកួតម៉ាស់ហ្វៃ លើសង្វៀនថោន កាលពីថ្ងៃអាទិត្យ គឺវាប្រៀបដូចជាមាន់ស្ងោររស់ឡើងវិញ នៅពេលកីឡាករជើងថ្មី លន់ សៀកឡុង បានងើបពីការរាប់របស់លោកអាជ្ញាកណ្តាលទាំងត្រដាបត្រដួស មកផ្តួល កីឡាករ អេ ណារ័ត្ន ឱ្យដួលសន្លប់ វិញនោះ។
តាមស្ថានភាពប្រកួតយ៉ាងស្វិតស្វាញ និងជក់ចិត្តបំផុតនោះ កីឡាករ លន់ សៀកឡុង ត្រូវបានគេមើលឃើញថា នឹងត្រូវសន្លប់ក្រោមកណ្តាប់ដៃ អេ ណារ័ត្ន បន្ទាប់ពីរូបគេ បានទទួលរងការម៉ាត់ចូលពេញ បណ្តាលឱ្យដួលទាំងជំហរ និងបាត់ស្មារតីមួយភាំង នាំឱ្យអាជ្ញាកណ្តាលរាប់ភ្លាមៗនោះ តែការទាត់ថែមរបស់ អេ ណារ័ត្ន ពេល សៀកឡុង ដួលទៅហើយ ក៏បានទទួលរងការព្រមានពីអាជ្ញាកណ្តាលផងដែរ។
ប៉ុន្តែអ្វីៗបានប្រែក្រឡាស់ហួសពីការស្មាន គឺ លន់ សៀកឡុង បានខំប្រឹងងើបឈរទាំងត្រដាបត្រដួស និងបានព្យាយាមបិទ និងទប់ការវាយសម្រុកបន្ថែមរបស់ អេ ណារ័ត្ន ដ៏គួរឱ្យសរសើរបំផុត ហើយរឿងដែលធ្វើឱ្យអ្នកទស្សនាមានការភ្ញាក់ផ្អើលកាន់តែខ្លាំងនោះ គឺ សៀកឡុង បានព្យាយាមវាយសងយ៉ាងអំណត់ ធ្វើឱ្យ អេ ណារ័ត្ន ធ្លាក់កម្លាំង និងបង្ហាញភាពទន់ជ្រាយវិញម្តង។
ជាមួយស្ថានភាពដ៏ល្អនេះ មាន់ស្ងោរដែលគេហៀបនឹងហូបទៅហើយ លន់ សៀកឡុង បានប្រឹងស្ទុះស្ទារកាន់តែខ្លាំង ក្នុងការវាយសម្រុកដោយកណ្តាប់ដៃទៅលើ អេ ណារ័ត្ន បណ្តាលឱ្យ ណារ័ត្ន វង្វេងវង្វាន់ ត្រូវបានអាជ្ញាកណ្តាលរាប់វិញម្តង ហើយភ្លាមៗក្រោយពីការរាប់នោះ សៀកឡុង បានតាមម៉ាត់បន្ថែម៥ទៅ៦ដៃទៀត បណ្តាលឱ្យ អេ ណារ័ត្ន ដួលផ្កាប់មុខសន្លប់ធំតែម្តង។
តាមរយៈការផ្តួលឱ្យរៀមច្បង អេ ណារ័ត្ន សន្លប់ធំ ដែលជាករណីកម្របានឃើញនេះ បានជួយឱ្យ លន់ សៀកឡុង ទទួលបានប្រាក់រង្វាន់បន្ថែមចំនួន៨០ម៉ឺនរៀលទៀត ហើយជ័យជម្នះនេះ ក៏បានធ្វើឱ្យកេរ្តិ៍របស់គេ ចាប់ផ្តើមលេចត្រដែតឡើងខ្លាំងផងដែរ ព្រោះ អេ ណារ័ត្ន ត្រូវបានគេចាត់ទុកថា ជាជើងខ្លាំងរួចទៅហើយ ប៉ុន្តែបើជាមកចាញ់លក្រោមដៃ លន់ សៀកឡុង ក្នុងស្ថានភាព ដ៏មិនគួរឱ្យចង់ជឿបែបនេះ។
ជាមួយជ័យជម្នះ ដែលធ្វើឱ្យគ្រប់គ្នាភ្ញាក់ផ្អើលខ្លាំង និងស្ទើរតែមិនចង់ជឿនេះ លន់ សៀកឡុង បាននិយាយក្រោយការប្រកួតថា៖ «គាត់វាយខ្ញុំពីក្រោយ ហើយទាត់ថែមត្រូវមុខទៀត ធ្វើឱ្យខ្ញុំវង្វេង ប៉ុន្តែខ្ញុំបានខំប្រឹងទប់ស្មារតី ដើម្បីវាយសងទៅលើគាត់វិញ ហើយនៅពេលខ្ញុំម៉ាត់ឆ្វេងចូលមុខ ឃើញគាត់រាងថមថយ ហេតុនេះខ្ញុំបានព្យាយាមចូល ក្នុងបំណងវ៉ៃផ្តាច់គាត់តែម្តង»។
កីឡាករវ័យក្មេងរូបនេះ បានបន្ថែមថា៖ «ពេលខ្ញុំវ៉ៃគាត់ឱ្យអាជ្ញាកណ្តាលរាប់បែបនេះ ខ្ញុំកាន់តែមានកម្លាំងចិត្តខ្លាំង ក្នុងការដេញវ៉ៃទៅលើគាត់បន្ថែម រហូតដល់តែសន្លប់ ហើយខ្ញុំពិតជាសប្បាយរីករាយខ្លាំងណាស់ ចំពោះជ័យជម្នះនេះ ព្រោះនេះជាលើកដំបូង ដែលខ្ញុំបានប្រកួត Mas Fight លក្ខណៈរុំអំពោះឆៅបែបនេះ គឺវ៉ៃចូលពេញដៃតែម្តង»៕
