ខ្សែភាពយន្តខ្មែរ-កាណាដា Surviving Bokator ដែលបង្ហាញពីការរស់ឡើងវិញ នូវក្បាច់គុនបុរាណខ្មែរ គុនល្បុក្កតោ បានបញ្ចប់នូវរដូវកាលមហោស្រពភាពយន្ត ប្រចាំឆ្នាំ២០២១ ជាមួយនឹងការឈ្នះបានពានអន្តរជាតិ ជាប្រវត្តិសាស្ត្រជាង២៥ ហើយកាលពីចុងខែធ្នូ ភាពយន្តនេះ ត្រូវបានទទួលការគំាទ្រពីទស្សនិកជន និងអ្នកសរសេរកម្មវិធី ក្នុងកម្មវិធី BKK DOC (Bangkok) International Documentary Awards នៅប្រទេសថៃ ដោយទទួលបានពានរង្វាន់ឯកសារកីឡាល្អបំផុត។
ជាមួយការឈ្នះពានអន្តរជាតិ ជាបន្តបន្ទាប់នេះ ខ្សែភាពយន្ត Surviving Bokator មានការចូលរួមសម្តែង ដោយលោកគ្រូព្រឹទិ្ធចារ្យក្រមាមាស សាន គឹមស៊ាន និងអ្នកប្រដាល់ក្បាច់គុនចម្រុះរបស់កម្ពុជាមានរហ័ស្សនាមថា «កង្កែបតូច» សំ ថារ័ត្ន ព្រមទាំងលោកគ្រូ អ៊ឹង ដារិទ្ធ ដែលជាគ្រូបង្វឹកក្រុមល្បុក្កតោជម្រើសជាតិកម្ពុជា ហើយជាមួយការប្រើពេលថតជាង៥ឆ្នាំ ភាពយន្តនេះ ក៏មានការបង្ហាញពីការឈ្នះបានមេដាយប្រាក់ ជាប្រវត្តិសាស្ត្រលើកដំបូង របស់គុនល្បុក្កតោ ក្នុងការប្រកួតក្បាច់គុនពិភពលោក ដែលឧបត្ថម្ភដោយអង្គការយូណេស្កូ នៅកូរ៉េខាងត្បូង ផងដែរ។
បន្ថែមលើនេះ ការទទួលស្គាល់នៅក្នុងមហោស្រពភាពយន្តកីឡា ដែលចំណាស់ជាងគេបំផុតរបស់ពិភពលោក (៤១ឆ្នាំ) Paladino D’Oro នៅ Palermo នាទីក្រុង Sicily ប្រទេសអ៊ីតាលី កាលពីខែវិច្ឆិកា គឺជាជ័យជម្នះជាប្រវត្តិសាស្ត្រមួយផ្សេងទៀត នៅក្នុងវិស័យភាពយន្តកីឡា និងជាប្រវត្តិសាស្ត្រដំបូងគេ សម្រាប់កម្ពុជា ដែលឈ្នះក្នុងព្រឹត្តិការណ៍នេះ ហើយភាពយន្តនេះ ក៏ទទួលបានការតែងតាំង ក្នុងប្រភេទឯកសារល្អបំផុតផងដែរ។
ផលិតករភាពយន្ត លោក Mark Bochsler ដែលបានចូលរួមក្នុងកម្មវិធី Paladino D’Oro ហើយបានទទួលពានរង្វាន់ការកែសម្រួលល្អបំផុត នោះ បានថ្លែងថា ៖ «ការទទួលបានពានរង្វាន់នេះ ត្រូវបានទទួលស្គាល់ពីគណៈវិនិច្ឆ័យជ្រើសរើស ជាមួយការស្វែងយល់អំពីបញ្ហាប្រឈមពិសេសរបស់ភាពយន្តប្រភេទនេះ ដែលត្រូវបានចំណាយពេលថត ក្នុងរយៈពេលច្រើនឆ្នាំ និងមានការសម្រិតសម្រាំងយកនូវប្លង់ពិសេសរបស់វីដេអូ ដោយត្រូវចំណាយរយៈពេលពីរបីរយម៉ោង ព្រមទាំងប្រឈមមុខ ក្នុងការកែសម្រួល»។
កាលពីខែវិច្ឆិកា នោះដែរ ភាពយន្ត Surviving Bokator ក៏បានបង្ហា្ញញខ្លួន នៅមហោស្រពភាពយន្តអន្តរជាតិ Liverpool ចក្រភពអង់គ្លេស ដែលជាកន្លែងភាពយន្តឯកសារនេះ បានឈ្នះជាភាពយន្តឯកសារល្អបំផុត ហើយនៅក្នុងការប្រគល់ពានរង្វាន់នេះ នាយកផ្នែកសិល្បៈ LIVIFF លោក Al Bailey បានលើកឡើងថា៖ «ចំនុចមួយ នៃការផលិតភាពយន្តឯកសារមួយនេះ គឺជាអី្វ ដែលបំផុសរាល់អារម្មណ៍ នៅក្រោមពន្លឺថ្ងៃ ( A piece of heartfelt documentary filmmaking that evokes every emotion under the sun)»។
ជាការឈ្នះពានរង្វាន់ផ្សេងទៀត រួមមានអ្នកដឹកនាំរឿងល្អបំផុត ភាពយន្តឯកសារល្អបំផុត និងអ្នកជ្រើសរើសរូបភាពល្អបំផុត នៅទីក្រុងឡុងដ៍ រួមទាំងពានភាពយន្តឯកសារល្អបំផុត និងការកែសម្រួលល្អបំផុត នៅ Los Angeles និងពានរង្វាន់ ផលិតករល្អបំផុត នៅ Las Vegas គឺរហូតមកទល់ពេលនេះ Surviving Bokator បានឈ្នះជាង២៥ពានរង្វាន់ទូទាំងពិភពលោក រួមមាន Mention D’Honneur ក្នុងកម្មវិធី World FICTS Sport Cinema Challenge នៅទីក្រុង Milano ក្នុងឆ្នាំ២០២០ ដែលជាព្រឹត្តិការណ៍គណៈកម្មាធិការអូឡាំពិកអន្តរជាតិ បានឧបត្ថម្ភឡើង។
នៅពេលសួរអំពីសមិទ្ធិផលទាំងនេះ ផលិតករភាពយន្ត លោក Mark Bochsler បានឆ្លើយតបថា៖ «យើងមានកិត្តិយសណាស់ ដែលបានដើរតួយ៉ាងសំខាន់ ក្នុងការពាំនាំយកនូវការយល់ដឹង ព្រមទាំងការបង្ហាញពីការខិតខំប្រឹងប្រែងរបស់ប្រជាជនកម្ពុជា ក្នុងការទាមទារឡើងវិញ នូវប្រពៃណី និងអត្តសញ្ញាណវប្បធម៌របស់ពួកគេ ដែលត្រូវបានរងការគំរាមកំហែង ក្នុងសម័យប៉ុល ពត កាលពីជាង៤០ឆ្នាំមុន។ សមិទិ្ធផលនៃភាពជោគជ័យ ជាលក្ខណៈអន្តរជាតិរបស់ខ្សែភាពយន្តមួយនេះ ព្រមទាំងការទទួលស្គាល់នៃការបង្ហាញខ្លួនរបស់ក្បាច់គុនល្បុក្កតោ បានជួយផ្លាស់ប្តូរនៅរបៀប ដែលពិភពលោកយល់ដឹងពីប្រទេសកម្ពុជាដែលធ្លាប់មានរបបប្រល័យពូជសាសន៍ ទៅជាប្រទេសនៃវប្បធម៌»។
បន្ទាប់ពីមានដំណើរផ្សព្វផ្សាយដ៏ទូលំទូលាយនេះ នៅក្រៅប្រទេស ភាពយន្ត Surviving Bokator គ្រោងនឹងចាក់បញ្ចាំងផ្សាយ នៅតាមរោងកុនទូទាំងប្រទេសកម្ពុជា នៅឆ្នាំ២០២២នេះ បន្ទាប់ពីគម្រោងមុន ត្រូវបានខកខាន ដោយជំងឺកូវីដ១៩ ហើយកាលវិភាគថ្មីនេះ គឺស្របពេលដែលគុនល្បុក្កតោ ត្រូវបានដាក់ស្នើឡើងវិញ ជាបេតិកភណ្ឌវប្បធម៌អរូបី ដោយអង្គការយូណេស្កូ ឆ្នាំ២០២២នេះ៕