ខ្សែប្រយុទ្ធដ៏ឆ្នើម ទើបបានបញ្ចប់កុងត្រាជាមួយក្លិបវិសាខា Ajayi Opeyemi បានក្លាយជាកីឡាករបរទេសទី១ ដែលក្លិបបឹងកេត បានប្រកាសពីការចុះកុងត្រា សម្រាប់ត្រៀមការប្រកួតរដូវកាលថ្មី ឆ្នាំ២០២២ ហើយជាមួយគ្នានេះ បឹងកេត ក៏បានប្រកាសពីការចុះកិច្ចព្រមព្រៀង ក្នុងភាពជាដៃគូជាមួយក្លិបលេងនៅលីគកំពូលជប៉ុន Shonan Bellmare ផងដែរ។
បឹងកេត បានប្រកាសពីការនាំយកខ្សែប្រយុទ្ធនីហ្សេរីយ៉ា Ajayi Opeyemi មកកាន់ទឹកដីកីឡដ្ឋានខេមបូឌាអ៊ែរវ៉េ កាលពីថ្ងៃព្រហស្បតិ៍ ម្សិលមិញ គឺបន្ទាប់ពី ក្លិបមួយនេះ បានប្រកាសចែកផ្លូវគ្នាជាមួយខ្សែបម្រើរបស់អាហ្រ្វិកខាងត្បូង Gopane កាលពីថ្ងៃទី១១ ខែមករា ឆ្នាំ២០២២នេះ។ ចំណែកខ្សែបម្រើជប៉ុន Mizuno Hikaru និង Kenta Yamazaki ក៏បានចែកផ្លូវជាមួយ បឹងកេត ផងដែរ។
ជាមួយគ្នា ក្លិបបឹងកេត កាលពីថ្ងៃព្រហស្បតិ៍ម្សិលមិញ ក៏បានប្រកាសពីការចុះព្រមព្រៀង
ស្តីពី «ភាពជាដៃគូសហការជាមួយក្លិបក្នុងលីកកំពូលប្រទេសជប៉ុន Shonan Bellmare» ផងដែរ ហើយកិច្ចសហការនេះ ផ្អែកលើចំណុចរួមដូចជា ទី១ ការផ្លាស់ប្តូរដ៏មានតម្លៃនៃក្រុមឈុតធំ ដែលផ្តោតសំខាន់លើការផ្ទេរកីឡាករ, ការបញ្ជូនបុគ្គលិក និងការគាំទ្រដល់ការបោះជំរុំហ្វឹកហាត់ជាដើម។
ចំណែកទី២ ការផ្លាស់ប្តូរគ្នានូវថ្នាលបណ្តុះបណ្តាលយុវជន ដែលផ្តោតសំខាន់លើ ការចូលរួមក្នុងការបណ្តុះបណ្តាលរបស់កីឡាករ បុគ្គលិកនៃក្រុមគ្រូបង្គោល និងការចូលរួមក្នុងការប្រកួតនៃក្រុមទាំងពីរ ហើយទី៣ ការចែករំលែកព័ត៌មាន ដែលផ្តោតសំខាន់ជុំវិញព័ត៌មាននៃកីឡាកររបស់ក្រុមទាំងពីរ ក្រុមការងារគ្រូបង្គោល ព័ត៌មាននៃការប្រកួតនានា និង វិធីសាស្រ្តបណ្តុះបណ្តាលជាដើម។
បន្ថែមលើនេះ ការចុះព្រមព្រៀងនេះ គឺក្លិបទាំង២ មានកិច្ចសហប្រតិបត្តិការអាជីវកម្ម ដែលផ្តោតសំខាន់ជុំវិញ ការលក់លើកញ្ចប់ឧបត្ថម្ភ ការលក់សំបុត្រ ការលក់សម្ភារអនុស្សាវរីយ៍ ការរៀបចំការកម្សាន្ត និងការផ្សារភ្ជាប់ជាមួយនឹងអ្នកគាំទ្រ ហើយកិច្ចព្រមព្រៀងនេះ មានសុពលភាពតាំងពីថ្ងៃ១ ខែមករា ឆ្នាំ២០២២នេះ រហូតដល់ថ្ងៃទី ៣១ ខែមករា ឆ្នាំ ២០២៤៕