កីឡាករវ័យក្មេង សូត្រ វាសនា និង វេង សុភ័ក្រ សុទ្ធតែបានប្រើក្បាច់ជង្គង់ឆ្វេង ដើម្បីផ្តួល ម៉ន សាម៉េត និង ជ័រ ពៅ ឱ្យសន្លប់ដូចគ្នា សម្រាប់ការប្រកួតជម្រុះដណ្តើមខ្សែក្រវាត់មាស នៅលើសង្វៀនថោន កាលពីថ្ងៃអាទិត្យ ហើយជ័យជម្នះនេះ បានបញ្ជាក់ច្បាស់រួចទៅហើយ ចំពោះបេក្ខភាពទាំង២នាក់ ប្រចាំពូលAនេះ ដែលបានឈ្នះកៅអី ឡើងទៅកាន់ការប្រកួតវគ្គពាក់កណ្តាលផ្តាច់ព្រ័ត្រ។
បើទោះបីជា សូត្រ វាសនា បានផ្តួល ជ័រ ពៅ ឱ្យសន្លប់ត្រឹមទឹកទី១ សម្រាប់ការប្រកួតបើកឆាក ប៉ុន្តែគ្មានអ្នកណាជឿថា កីឡាករវ័យក្មេងរូបនេះ អាចផ្តួលខ្លាចាស់ ម៉ន សាម៉េត ឱ្យសន្លប់បាននោះទេ ព្រោះមតិភាគច្រើន បានលើកឡើងថា វាសនា អាចនឹងចាញ់ ម៉ន សាម៉េត សម្រាប់ការប្រកួតជម្រុះលើកទី២ ប្រចាំពូលAនេះ ជាមិនខាន ដ្បិតអី សូត្រ វាសនា ក៏ធ្លាប់បានប្រវត្តិចាញ់ ម៉ន សាម៉េត កន្លងមក ផងដែរ។
យ៉ាងណាក៏ដោយ តាមរយៈការប្រកួតជាក់ស្តែង កាលពីថ្ងៃអាទិត្យ ម្សិលមិញនេះ សូត្រ វាសនា បានបង្ហាញការប្រកួតយ៉ាងល្អ ដើម្បីវាយសម្រុកទៅលើរៀមច្បង ម៉ន សាម៉េត ដែលមានកម្ពស់ទាបជាងខ្លួន ហើយការបុក១២ជង្គង់ឆ្វេង និងថែម២ជង្គង់ស្តាំ បានធ្វើឱ្យ សាម៉េត ដួលទាំងទ្រមខ្លួន និងត្រូវបានអាជ្ញាកណ្តាលរាប់ នៅចុងទឹកទី២។
បើទោះបីជា សំឡេងស្នូរជួងបញ្ចប់ទឹកទី២ បានជួយសង្រ្គោះ ម៉ន សាម៉េត បានមួយគ្រា ប៉ុន្តែឈានចូលទឹកទី៣ សូត្រ វាសនា បានតាមវាយលុក កាន់តែខ្លាំង ហើយនៅពាក់កណ្តាលទឹកនេះ វាសនា បានចាប់ក្រៀក ម៉ន សាម៉េត នៅក្បែរបង្គោលរេញ រួចបានបុកជង្គង់ឆ្វេងផ្ទួនៗចំនួន៣ជង្គង់ បណ្តាលឱ្យ សាម៉េត ដួលសន្លប់ ក្រោកលែងរួចតែម្តង។
ជ័យជម្នះរបស់ សូត្រ វាសនា បានធ្វើឱ្យគ្រប់គ្នា មានការភ្ញាក់ផ្អើលខ្លាំង ហើយសម្រាប់ការផ្តួល ម៉ន សាម៉េត ឱ្យសន្លប់នេះ សូត្រ វាសនា បាននិយាយថា៖ «ខ្ញុំបានដឹងពីយុទ្ធសាស្រ្តរបស់គាត់អស់ទៅហើយ ព្រោះខ្ញុំធ្លាប់ជួបគាត់ ហើយបកាលនោះ ខ្ញុំចាញ់កម្លាំងសុហ្វ និងបច្ចេកទេសរបស់គាត់ តែឥឡូវ ខ្ញុំហ្វឹកហាត់បានច្រើន និងស្ទាបស្ទង់បច្ចេកទេសគាត់ បានច្រើនទៀត ហេតុនេះធ្វើឱ្យខ្ញុំមានការជំនឿចិត្តលើខ្លួនឯង»។
ដោយឡែក វេង សុភ័ក្រ ក៏បានប្រើស្នៀតជង្គង់ឆ្វេង ផ្តួល ជ័រ ពៅ ឱ្យសន្លប់ នៅក្នុងទឹកទី៣ ដូចគ្នា ហើយការរកបានជ័យជម្នះ បន្ថែមទៅលើការឈ្នះពិន្ទុ ម៉ន សាម៉េត នេះ បានជួយឱ្យ វេង សុភ័ក្រ ទទួលបានឱកាស ឡើងទៅវគ្គបន្តដូច សូត្រ វាសនា ដែរ តែអ្នកទាំង២នេះ នឹងត្រូវជួបគ្នា ដើម្បីប្រកួតដណ្តើមយកលេខ១ និងលេខ២ប្រចាំពូលA នេះ ចំណែក ម៉ន សាម៉េត និង ជ័រ ពៅ បានធ្លាក់ចេញពីការប្រកួតនេះ ដោយស្វ័យប្រវត្តិហើយ ទោះនៅសល់១ប្រកួតទៀត ក៏ដោយ៕