សហព័ន្ធកីឡាបាល់ទាត់កម្ពុជា ក្នុងនាមជាម្ចាស់ផ្ទះ បានចេញកាលវិភាគ ការប្រកួតជើងឯកបាល់ទាត់តំបន់អាស៊ីអាគ្នេយ៍អាយុក្រោម២៣ឆ្នាំ (AFF U23 Championship 2022) ជាផ្លូវការហើយ ហើយកម្ពុជា ក៏បានកំណត់យកនិមិត្តសញ្ញាផ្លូវការ នៃការប្រកួតនេះរួចរាល់ផងដែរ ខណៈព្រឹត្តិការណ៍នេះ ត្រូវចាប់ផ្តើមពីថ្ងៃទី១៤ និងត្រូវបញ្ចប់ នៅថ្ងៃទី២៦ ខែកុម្ភៈ ឆ្នាំ២០២២។
តាមរយៈកាលវិភាគ នៃការប្រកួតជម្រុះតាមពូលទាំង៣នេះ ក្រុមជម្រើសជាតិកម្ពុជា មិនមែនការប្រកួតណាមួយ ដែលត្រូវធ្វើនៅកីឡដ្ឋានព្រីនស៍នោះទេ ពោលគឺគ្រប់ការប្រកួតរបស់ក្រុមម្ចាស់ផ្ទះមួយនេះ ត្រូវធ្វើឡើង នៅកីឡដ្ឋានជាតិមរតកតេជោ ទាំងអស់ ហើយការប្រកួតវគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ ក៏ត្រូវធ្វើនៅកីឡដ្ឋានថ្មី ដែលអាចផ្ទុកអ្នកទស្សនា បានជាង៦ម៉ឺននាក់នេះផងដែរ។
ដោយឈរនៅពូលA ក្រុមគោព្រៃកម្ពុជា ត្រូវប្រកួតបើកឆាកជាមួយក្រុមជម្រើសជាតិអាយុក្រោម២៣ឆ្នាំរបស់ប្រ៊ុយណេ នៅថ្ងៃទី១៤ ខែកុម្ភ មុនពេលទៅជួបក្រុមហ្វីលីពីន នៅថ្ងៃទី១៧ និងប៉ះក្រុមទីម័រខាងកើត នៅថ្ងៃទី២០ ខែកុម្ភៈ ហើយការប្រកួតជម្រុះទាំង៣លើកនេះ របស់កម្ពុជា ត្រូវធ្វើចាប់ពីម៉ោង៧យប់ទាំងអស់។
ការកំណត់ពេលវេលានេះ គឺដើម្បីផ្តល់ឱកាសឱ្យអ្នកស្នេហាវិស័យកីឡាបាល់ទាត់ នៅកម្ពុជា អាចមានពេល ចូលទៅទស្សនាដោយផ្ទាល់ ហើយការប្រកួតនេះ ក៏ជាការចាប់ផ្តើមបើកឱ្យមានការប្រកួតជាផ្លូវការលើកដំបូង នៅកីឡដ្ឋានជាតិមរតកតេជោ ផងដែរ នៅមុនពេលកីឡដ្ឋានដ៏ទំនើបមួយនេះ បានក្លាយជាកន្លែងដ៏សំខាន់ ដើម្បីរៀបចំធ្វើជាម្ចាស់ផ្ទះការប្រកួតស៊ីហ្គេម លើកទី៣២ ឆ្នាំ២០២៣៕