ក្លិបអ្នកមានទ្រព្យ វិសាខា បានឈានដល់ការបំបែកនូវកំណត់ត្រាថ្មី តាមរយៈការនាំយកកីឡាករមានកម្ពស់ខ្ពស់ជាងគេ មានសញ្ជាតិស៊ូដង់ខាងត្បូង Kenny Athiu គឺខ្សែប្រយុទ្ធ Kenny Athiu ដើម្បីមកពង្រឹងតំបន់ប្រយុទ្ធ នាការប្រកួតលីគកំពូលកម្ពុជា រដូវកាលថ្មី ឆ្នាំ២០២២នេះ។
ក្លិបមានមូលដ្ឋាននៅកីឡដ្ឋានព្រីនស៍ វិសាខា បានប្រកាសពីការចុះកុងត្រាជាផ្លូវការជាមួយខ្សែប្រយុទ្ធវ័យ២៩ឆ្នាំ Kenny Athiu នៅលើផេចហ្វេសប៊ុករបស់ខ្លួន កាលពីយប់ថ្ងៃព្រហស្បតិ៍ម្សិលមិញ ហើយគេជាកីឡាករបរទេសទី៥ចុងក្រោយ របស់វិសាខា សម្រាប់ត្រៀមការប្រកួតរដូវកាលថ្មីនេះផងដែរ។
កីឡាករ Kenny Athiu មានកម្ពស់រហូតដល់ ២,០១ ម៉ែត្រ ហើយគេនឹងក្លាយជាកីឡាករបរទេសដំបូងគេ ដែលមានកម្ពស់ខ្ពស់បំផុត ប្រចាំនៅលីគកំពូលកម្ពុជា ហើយគេម្នាក់នេះ ក៏ធ្លាប់ជាមិត្តរួមក្រុមរបស់លោក Keisuke Honda ដែលជាអ្នកចាត់ការទូទៅក្រុមជម្រើសជាតិកម្ពុជា ផងដែរ នៅពេលអ្នកទាំង២ បានលេងឱ្យក្លិបនៅអូស្រ្តាលី Melbourrne Victory នៅចន្លោះឆ្នាំ២០១៨ ដល់ឆ្នាំ២០១៩។
កីឡាករសញ្ជាតិ ស៊ូដង់ខាងត្បូង Kenny Athiu បានប្រកបអាជីពភាគច្រើន នៅលីគអូស្រ្តាលី ហើយកំណត់ត្រាល្អបំផុតរបស់គេ គឺរយ:ពេល៥ឆ្នាំ ពីឆ្នាំ២០១២-២០១៧ ដោយក្នុងនោះ ការបង្ហាញខ្លួនឱ្យក្លិបចំនួន២ នៅអូស្រ្តាលីចំនួន១១៤ប្រកួត គឺសុតបញ្ចូលទីបានរហូតដល់៧៣គ្រាប់។
នៅមុនការធ្វើដំណើរមកចូលរួមជាមួយក្លិបវិសាខា របស់កម្ពុជានេះ Kenny Athiu បានលេងឱ្យក្លិប Sri Pahang នៅលីកម៉ាឡេស៊ី កាលពីឆ្នាំ២០២១ ដោយរកបាន៤គ្រាប់ ចំពោះការបង្ហាញខ្លួនចំនួន១១ដង។
ចំពោះបទពិសោធផ្សេងទៀត នៅអូស្រ្តាលី Kenny Athiu ធ្លាប់លេងឱ្យក្លិបSpringvale White Eagles (២០១២) ក្លិប Box Hill United (២០១២-២០១៤) ក្លិប Heidelberg United (២០១៤-២០១៧) ក្លិប Melbourne Victory (លក្ខខណ្ឌជើងជើង ឆ្នាំ២០១៧-២០១៨) ក្លិប South Springvale(២០១០-២០១១) និងវិលមកលេងក្លិប Melbourne Victory FC ម្តងទៀត ពីឆ្នាំ២០១៨ ដល់ឆ្នាំ២០២០៕
