កីឡាករជាក្មេងកំព្រា អេ ណារ័ត្ន បាននឹងកំពុងបាក់ទឹកចិត្តខ្លាំង ទៅនឹងការរិះគន់ និងការជេរប្រមាថ ដោយគ្មានមូលដ្ឋាន របស់អ្នកទស្សនាមួយចំនួន នៅពេលរូបគេ បានសន្លប់ក្រោមកណ្តាប់ដៃ ជើងខ្លាំងជំនាន់ក្រោយ ពេជ្រ សម្បត្តិ ក្នុងការប្រកួត Mas Fight ៩នាទី នៅលើសង្វៀនថោន កាលពីថ្ងៃអាទិត្យ។
អេ ណារ័ត្ន បានហៅការរិះគន់ និងជេរប្រមាថរបស់អ្នកគាំទ្រ មកលើរូបគេ ថា ជាការគិតបែបអគតិ ហើយជាមួយគ្នានេះ សិស្សរបស់លោកគ្រូអេ ភូថង រូបនេះ បានប្រើចោទសួរទៅកាន់អ្នកគាំទ្រទាំងនោះវិញ ដោយអារម្មណ៍ឈឺចាប់ តាមរយៈហ្វេសប៊ុករបស់ខ្លួនថា តើជេរខ្ញុំឆ្អែតឬនៅ?
«ជេរខ្ញុំឆ្អែតនៅ បន្ទោសខ្ញុំឆ្អែតនៅ បំបាក់ទឹកចិត្តខ្ញុំឆ្អែតនៅ គ្មានអ្នកណាចង់ចាញ់ គ្មាន អ្នកណាចង់សន្លប់ គ្មានអ្នកណាចង់ឱ្យគេស្អប់ទេ បើអ្នកមួយចំនួនមិនទាន់ឆ្អែតទេ បន្ដការគិតអគតិមកលើខ្ញុំទៀតទៅ ខ្ញុំលេងមានកម្លាំងបន្តទៅមុខទៀតហើយ»។ នេះជាសារស័ព្ទ បង្ហាញពីអារម្មណ៍ឈឺចាប់របស់ អេ ណារ័ត្ន ដែលបានឆ្លើយតបទៅកាន់អ្នកគាំទ្រ ដែលបានរិះគន់ និងជេរប្រមាថចំពោះរូបគេ។
តាមរយៈការប្រកួត នៅលើសង្វៀនថោន កាលពីម្សិលមិញនោះ អេ ណារ័ត្ន បានព្យាយាមវាយសងទៅកាន់ ពេជ្រ សម្បត្តិ បានប្រហែល១នាទី ហើយក៏បានព្យាយាមតាំងឃុំមុខ នៅពេលរូបគេ ហាក់គាំង ក្រោមកណ្តាប់ដៃរបស់ ពេជ្រ សម្បត្តិ ប៉ុន្តែការព្យាយាមបិទ មិនតបតនេះ មិនអាចគេចផុតពីការតាមវាយសម្រុករបស់ ពេជ្រ សម្បត្តិ នោះទេ គឺ ណារ័ត្ន បានដួល និងត្រូវបានអាជ្ញាកណ្តាប់ ក្រោយ សម្បត្តិ ម៉ាត់ស្តាំចូលមុខ បណ្តាលឱ្យដួល។
នៅក្នុងអំឡុងនាទីទី៣ អេ ណារ័ត្ន បានដួលទាំងជំហរម្តងទៀត នៅពេល ពេជ្រ សម្បត្តិ ម៉ាត់ស្តាំចូលមុខពេញទៀតនោះ ហើយអាជ្ញាកណ្តាល ក៏សម្រេចបញ្ឈប់ការប្រកួតរបស់ អេ ណារ័ត្ន តែម្តង និងផ្តល់ជ័យជម្នះទៅឱ្យ ពេជ្រ សម្បត្តិ ហើយ សម្បត្តិ ក៏ទទួលបានប្រាក់បន្ថែមចំនួន៤០០ដុល្លារបន្ថែម ចំពោះការផ្តួល អេ ណារ័ត្ន ឱ្យសន្លប់នេះ ផងដែរ។
ជាមួយការចាញ់ដោយសន្លប់លើកនេះ អ្នកទស្សនាមួយចំនួន បានរិះគន់ទៅកាន់ អេ ណារ័ត្ន តាមរយៈការខមិន (បញ្ចេញមតិ)របស់ខ្លួន នៅលើផេចហ្វេសប៊ុកផ្សាយផ្ទាល់របស់សង្វៀនថោនតែម្តង ហើយនៅក្រោយការប្រកួតនេះ បានបញ្ចប់ អេ ណារ័ត្ន បានឆ្លើយតប នៅក្នុងខមិនទាំងនោះថា «សុំទោសបងប្អូនទាំងអស់គ្នា សម្រាប់1ប្រកួតនឹងហើយ ខ្ញុំក៏សុំឈប់វ៉ៃ៩នាទីដែរ»៕
