កីឡាករមានរហស័ស្សនាម «អ្នកលេងអ្នកកាំភ្លើងខ្លី» វ៉ាន់ វឿន បានរកឃើញជ័យជម្នះដ៏ន័យទៅលើម្ចាស់ខ្សែក្រវាត់មាស២សម័យកាល អេលីត ចំរើន ដើម្បីបង្កើតឱ្យមានភាគរយឡើងវិញ ក្នុងប្រជែងឡើងទៅកាន់វគ្គពាក់កណ្តាលផ្តាច់ព្រ័ត្រ នៃការប្រកួតដណ្តើមពានមាស នៅលើសង្វៀនថោន ចំណែក ឈុត សេរីវ៉ាន់ថង បានឡើងទៅវគ្គបន្តហើយ បន្ទាប់ពីរូបគេ បានផ្តួល សេក ចៅជូត ឱ្យបោះបង់ការប្រកួត កាលពីថ្ងៃអាទិត្យនោះដែរ។
បើទោះបីជា វ៉ាន់ វឿន មិនធ្លាប់ឈ្នះ អេលីត សោះ ចំពោះការជួបគ្នា៣លើកកន្លងមក ប៉ុន្តែការជួបគ្នាលើកនេះ វ៉ាន់ វឿន បានព្យាយាមប្រកួតយ៉ាងស្វិតស្វាញបំផុត ដើម្បីវ៉ៃប្តូរជាមួយ អេលីត ចំរើន ហើយនៅទីបំផុត វ៉ាន់ វឿន អាចស្រែកហ៊ោអស់ពីចិត្ត ដើម្បីអបអរដល់ជ័យជម្នះរបស់ខ្លួន បន្ទាប់ពីចៅក្រមទាំង៥នាក់ បានសម្រេចឱ្យរូបគេឈ្នះ អេលីត ចំរើន ដោយពិន្ទុមិនឯកច្ឆន្ទ ៣-២ នោះ។
ការរកបានជ័យជម្នះរបស់ វ៉ាន់ វឿន ពិតជាមានន័យខ្លាំង ព្រោះការឈ្នះបាន៣ពិន្ទុ ក្រោយការចាញ់ ឈុត សេរីវ៉ាន់ថង នៅក្នុងការប្រកួតបើកឆាកនោះ បានជួយឱ្យរូបគេ មានភាគរយគ្រប់គ្រាន់ឡើងវិញ ក្នុងការប្រជែង ឡើងទៅកាន់វគ្គពាក់កណ្តាលផ្តាច់ព្រ័ត្រ នៅក្នុងការប្រកួតចុងក្រោយជាមួយ សេក ចៅជូត។
ផ្ទុយពីនេះ អេលីត ចំរើន បានធ្លាក់ចេញពីការប្រកួតនេះ ដោយស្វ័យប្រវត្តិហើយ ទោះបីជារូបគេ នៅសល់១ប្រកួតទៀត ជាមួយ ឈុត សេរីវ៉ាន់ថង ក៏ដោយ ព្រោះការចាញ់ សេក ចៅជូត ដោយស្វ័យប្រវត្តិ ព្រោះឈឺជើង មិនអាចប្រកួតបាន (បានសូន្យពិន្ទុ) និងការបន្តបានត្រឹម១ពិន្ទុ ចំពោះការចាញ់ វ៉ាន់ វឿន លើកនេះ វាគ្រាប់គ្រាន់ សម្រាប់រូបគេ ធ្លាក់ដោយស្វ័យប្រវត្តិហើយ។
ចំណែក ឈុត សេរីវ៉ាន់ថង បានក្លាយជាបេក្ខភាពទី១ ប្រចាំពូលBនេះ ដែលត្រូវឡើងទៅកាន់ការប្រកួតវគ្គពាក់កណ្តាលផ្តាច់ព្រ័ត្រ បើទោះបីជានៅសល់១ប្រកួតទៀតក៏ដោយ ព្រោះការផ្តួល សេក ចៅជូត ក្នុងទឹកទី៥ សម្រាប់ការប្រកួតលើកទី២នេះ បានជួយឱ្យ វ៉ាន់ថង មាន៦ពិន្ទុពេញ និងគ្រប់គ្រាន់ សម្រាប់ការឡើងទៅវគ្គពាក់កណ្តាលផ្តាច់ព្រ័ត្រហើយ។
យ៉ាងណាក៏ដោយ តាមរយៈការប្រកួត កាលពីម្សិលមិញនេះ អ្នកគាំទ្រភាគច្រើន បានកើតសរសើរទៅដល់ សេក ចៅជូត បានស៊ូទ្រាំប្រកួតជាមួយ វ៉ាន់ថង រហូតដល់ទឹកទី៥ ព្រោះ ចៅជូត ត្រូវបាន វ៉ាន់ថង ទាត់ឱ្យមានរបួសជើង និងត្រូវបានអាជ្ញាកណ្តាលរាប់ តាំងពីទី១ នៅនៅចុងទឹកទី២ និងទឹកទី៣ ចៅជូត ក៏ត្រូវបានអាជ្ញាកណ្តាលរាប់ ដោយបញ្ហារបួសជើងនេះទេ ប៉ុន្តែរូបគេបានស៊ូទ្រាំប្រកួត មិនព្រមចុះចាញ់ឡើយ។ តែទោះបីជាយ៉ាងណា នៅក្នុងទឹកទី៥ វ៉ាន់ថង បានប្រើក្បាច់ពិសេស គឺលោតធាក់បកក្រោយ ចំពោះ ចៅជូត ពេញទំហឹង បណ្តាលដួលដេក ហើយអាជ្ញាកណ្តាលក៏បញ្ឈប់ការប្រកួតតែម្តង៕