អ្នកជំនាញផ្នែកបច្ចេកទេស របស់គណៈកម្មាធិការជាតិរៀបចំការប្រកួតកីឡាអាស៊ី អាគ្នេយ៍ លើកទី៣២ ឆ្នាំ២០២៣ (CAMSOC) លោក វ៉ាត់ ចំរើន បានអះអាងថា រាល់បញ្ហាប្រឈម នៅក្នុងដំណើរការឆ្ពោះទៅធ្វើម្ចាស់ផ្ទះស៊ីហ្គេម លើកទី៣២ របស់កម្ពុជា នៅឆ្នាំ២០២៣ នឹងត្រូវលើកយកមកពិភាក្សា និងដោះឱ្យអស់ នៅក្នុងថ្ងៃសន្និបាតរបស់ CAMSOC ខាងមុខនេះ។
លោក វ៉ាត់ ចំរើន បានថ្លែងថា៖ «នៅក្នុងសន្និបាតរបស់ CAMSOC ខាងមុខនេះ នឹងមានវាគ្មិនសំខាន់ៗ ក៏ដូចជាវាគ្មិន មានជំនាញការអន្តរជាតិ មកចូលរួម អ៊ីចឹងនៅក្នុងសន្និបាតលើកនេះ យើងនឹងត្រូវលើកយកនៅរាល់បញ្ហាប្រឈម មកដោះស្រាយ យកមកវិភាគ និងបន្ថែមនូវធាតុចូលទាំងឡាយ និងដោះស្រាយនៅបញ្ហាទាំងនោះឱ្យអស់»។
អគ្គលេខាធិការ CAMSOC រូបនេះ បានបន្ថែមថា៖ «អ្វីដែលជារបាំង និងបញ្ហាប្រឈម នៅក្នុងការដំណើរការ រហូតដល់ឆ្នាំ២០២៣ យើងត្រូវដោះឱ្យអស់។ ពេលដោះអស់ហើយ យើងសម្រួលឱ្យគណៈកម្មការយើង ធ្វើការដោយមានភាពងាយស្រួល ដោយមានទំនុកចិត្ត និងដោយមានភាពប្រទាក់ក្រឡាគ្នាល្អ»។
ការលើកឡើងបែបនេះរបស់លោក វ៉ាត់ ចំរើន ត្រូវបានធ្វើឡើង បន្ទាប់ពីកិច្ចប្រជុំប្រចាំសប្តាហ៍របស់ CAMSOC ដែលដឹកនាំដោយលោកបណ្ឌិត ថោង ខុន ជាអនុប្រធានអចិន្រ្តយ៍ រួមទាំងក្រុមគណៈកម្មការជំនាញរបស់ CAMSOC ព្រមទាំងអ្នកពាក់ព័ន្ធមួយចំនួនទៀត កាលពីថ្ងៃអង្គារ ម្សិលមិញ។
នៅក្នុងកិច្ចប្រជុំពេញមួយព្រឹកនោះ អង្គប្រជុំ បានសង្កត់ខ្លាំងទៅលើការសាងសង់ភូមិកីឡា ដែលបញ្ហានេះ ត្រូវបានលើក វ៉ាត់ ចំរើន ចាត់ទុកថា ជាចំណុចក្តៅ និងជាយុទ្ធសំខាន់របស់កម្ពុជា ក្នុងការឈានទៅធ្វើម្ចាស់ផ្ទះការប្រកួតស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ នៅឆ្នាំ២០២៣។
លោក វ៉ាត់ ចំរើន បានបញ្ជាក់ថា៖ «ការងារទី១ នៅកិច្ចប្រជុំ ថ្ងៃនេះ យើងមានការបទបង្ហាញពីក្រុមហ៊ុនសាងសង់ភូមិកីឡា ព្រោះនេះជាចំណុចក្តៅ និងជាយុទ្ធសាស្រ្តរបស់កម្ពុជា ក្នុងការធ្វើជាម្ចាស់ផ្ទះ ព្រោះបើយើងមានកន្លែងភូមិកីឡានេះ គឺយើងនឹងកាត់បន្ថយការចំណាយបានច្រើន ហើយត្រូវនឹងស្តង់ដារចលនាអូឡាំពិក របស់ការប្រកួតកីឡាអូឡាំពិកធំៗ» អ៊ីចឹងក្រុមហ៊ុន បានអះអាងថា នឹងសាងសង់ភូមិកីឡានេះ ឱ្យបានទាន់ពេលវេលា តាមការកំណត់ ដើម្បីប្រគល់មកឱ្យ CAMSOC នៅដើមខែកុម្ភៈ ឆ្នាំ២០២៣»៕
