ក្រុមនារីរបស់ភ្នំពេញក្រោន និងព្រះខ័នរាជស្វាយរៀង សុទ្ធតែបានយកឈ្នះលើគូប្រកួត ដោយលទ្ធផល ១៣-០ ដូចគ្នា នៅក្នុងការប្រកួតបញ្ចប់ជើងទី១ នៃការប្រកួតបាល់ទាត់ជម្រើសជើងឯកបាល់ទាត់នារី ឆ្នាំ២០២១ កាលពីថ្ងៃអាទិត្យ ម្សិលមិញ ប៉ុន្តែក្រុមជើងឯក ណាហ្គាវើលដ៍កំពង់ស្ពឺ បានជួបការចាញ់ជាលើកទី២។
បើទោះបីជាការប្រកួតនេះ ត្រូវបានធ្វើឡើង នៅលើទីលានផ្សេងគ្នា ប៉ុន្តែទាំងក្រុមនារីភ្នំពេញក្រោន និងក្រុមស្វាយរៀង ពិតជាធ្វើបានល្អ និងរកបាន១៣គ្រាប់ដូចគ្នា ដោយក្នុងនោះ ក្រុមភ្នំពេញក្រោន បានលត់ក្រុមមន្ទីរអយកខេត្តបាត់ដំបង ១៣-០ នៅលើទឹកដីខ្លួនឯង ចំណែកក្រុមនារី ស្វាយរៀង បានបំបាក់ក្រុមម្ចាស់ផ្ទះ មន្ទីរអយកខេត្តកំពង់ឆ្នាំង ១៣-០។
ផ្ទុយពីនេះក្រុមម្ចាស់ជើងឯក ណាហ្គាវើលដ៍កំពង់ស្ពឺ បានចាញ់ក្រុមនារី បឹងកេត នៅលើទឹកដីខ្លួនឯង ២-១ គឺដូចគ្នាទៅនឹងក្រុមម្ចាស់ផ្ទះ មន្ទីរអយកខេត្តកណ្តាល ផងដែរ ដែលបានចាញ់ក្រុមសៀមរាប ៥-១។
តាមរយៈលទ្ធផលនៃការប្រកួតនេះ បានបង្ហាញឱ្យឃើញថា ក្រុមការពារតំណែងជើងឯក ណាហ្គាវើលដ៍ បាននឹងកំពុងថមថយនូវឱកាសប្រជែងយកពាន មួយកម្រិតទៀត សម្រាប់ការប្រកួតរដូវកាលនេះ ព្រោះការបាត់បង់៣ពិន្ទុជាលើកទី២នេះ បានធ្វើឱ្យពួកគេ មានគម្លាតចាញ់ក្រុមកំពុងឈរនៅលេខ១ ភ្នំពេញក្រោន រហូតដល់ ៦ពិន្ទុ គឺ២១ពិន្ទុ ទល់នឹង១៥ពិន្ទុ។
ចំណែកក្រុមសៀមរាប បានបន្តឈរនៅលេខ៣ ដោយមាន១៥ពិន្ទុ ស្មើជាមួយក្រុមណាហ្គាវើលដ៍ ដែរ រីឯកក្រុមនារី ព្រះខ័នរាជស្វាយរៀង បានបន្តឈរនៅលេខ៤ដូចគ្នា ដោយមាន១២ពិន្ទុស្មើជាមួយក្រុមនារី បឹងកេត៕
