ប្រធានសហព័ន្ធកីឡាតេក្វាន់ដូអាយធីអែហ្វកម្ពុជា លោក កែវ រ៉េមី បានជំរុញឱ្យក្រុមកីឡាករ កីឡាការិនីតេក្វាន់ដូ ITF ទាំងអស់ ជាពិសេសក្រុមជម្រើសជាតិ ត្រូវតែហ៊ានប្តេជ្ញាចិត្តឱ្យបានខ្ពស់បំផុត ដើម្បីស្វែងរកមេដាយមាសឱ្យបានយ៉ាងតិច ចំនួន១៥ នៅពេលកម្ពុជា ធ្វើជាម្ចាស់ផ្ទះស៊ីហ្គេម លើកទី៣២ ឆ្នាំ២០២៣ ជាប្រវត្តិសាស្រ្តលើកដំបូង។
ការជំរុញឱ្យក្រុមអត្តពលិក ធ្វើការប្តេជ្ញាចិត្តនេះ គឺលោក កែវ រ៉េមី ចង់ធ្វើឱ្យមានភាពប្រាកដប្រជាកាន់តែខ្លាំង ចំពោះឈានទៅដណ្តើមមេដាយមាសឱ្យបាន១៥ ពេលកម្ពុជា ធ្វើជាម្ចាស់ផ្ទះ ដើម្បីឆ្លើយតបទៅនឹងការដាក់សន្ទស្សន៍របស់ក្រសួងអប់រំ យុវជន និងកីឡា និងគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ លើកទី៣២ ឆ្នាំ២០២៣ (CAMSOC) ជាពិសេសឆ្លើយតបទៅលោកនាយករដ្ឋមន្រ្តី ហ៊ុន សែន ដែលបានសរសេរពីភាពខ្លាំងរបស់ក្រុម ITF កម្ពុជា កាលពីពេលថ្មីៗនេះ។
លោក កែវ រ៉េមី បានបញ្ជាក់ថា៖ «ក្មួយៗត្រូវមានការប្តេជ្ញាចិត្តឱ្យបានខ្ពស់បំផុត ដើម្បីឆ្លើយតបទៅសម្តេចតេជោ នាយករដ្ឋមន្រ្តី លោកបានសរសើរយើង គឺដូចឯកឧត្តម អ៊ុក សិទ្ធិជាតិ បានមានប្រសាសន៍អ៊ីចឹង លោកបានសរសើរថា ITF ខ្លាំង ហេតុនេះកូនត្រូវប្តេជ្ញាចិត្តដាច់ខាត យកមេដាយមាសយ៉ាងតិច១៥ ជូនប្រទេសជាតិ»។
ប្រធានសហព័ន្ធរូបនេះ បានបញ្ជាក់បន្ថែមថា៖ «ត្រូវយកមេដាយមាសយ៉ាងតិច១៥ អត់លេងសើចទេ ត្រូវខំប្រឹងហាត់ឱ្យមែនទែន ដើម្បីសម្រកទម្ងន់ អ៊ីចឹងអ៊ុំសូមឱ្យកូនៗទាំងអស់ ប្រឹងប្រែង ដើម្បីឆ្លើយតប សម្តេចតេជោនាយករដ្ឋមន្រ្តី ដែលលោកមានទំនុកទុកចិត្តចំពោះ ITF របស់យើង ហើយក្រសួងអប់រំ យុវជន និងកីឡា និង CAMSOC លោកបានរៀបចំថា នៅពេលប្រកួតស៊ីហ្គេម លើកទី៣២ ឆ្នាំ២០២៣ គឺដាក់ ITF យើងប្រកួតមុនគេបំផុត ដើម្បីនាំមុខយកមេដាយមាស»។
ការលើកឡើងបែបនេះ របស់លោក កែវ រ៉េមី ត្រូវបានធ្វើឡើង នៅក្នុងការប្រកួតជ្រើសរើសជើងឯកថ្នាក់ជាតិ ឆ្នាំ២០២១ ដែលទើបបានបញ្ចប់ កាលពីថ្ងៃសៅរ៍ នៅទីលាននៃសកលវិទ្យាល័យភូមិន្ទភ្នំពេញ ដោយការប្រកួតនេះ មានអត្តពលិកចំនួន១៣២នាក់ (ស្រី៤៦នាក់) បានចូលរួម។
តាមរយៈការប្រកួតប្រជែង ទៅតាមជំនាញ និងកម្រិតខ្សែក្រវាត់ រយៈពេល៣ថ្ងៃ នៅលើវិញ្ញាសាចំនួន២៣នេះ ក្រុមកីឡាករ កីឡាការិនីរបស់ក្រសួងសេដ្ឋកិច្ច និងហិរញ្ញវត្ថុ បានឈ្នះមេដាយមាសច្រើនជាងគេ គឺមេដាយមាស៦ ប្រាក់២ និងសំរឹទ្ធ៤ ហើយតាមពីក្រោយដោយក្រុមក្រសួងមហាផ្ទៃ ដែលឈ្នះមេដាយមាស៥ ប្រាក់៦ និងក្រុមស.ស.យ.កខេត្តកំពង់ស្ពឺ ដែលឈ្នះបានមាស៣ ប្រាក់២ សំរឹទ្ធ១ ចំណែកក្លិបថ្មសខេត្តកោះកុង អាចដណ្តើមបានមេដាយមាស៣ និងសំរឹទ្ធ១ ផងដែរ ដើម្បីឈរនៅលេខ៤ ក្នុងចំណោមក្លិប និងសមាគម សរុបចំនួន១៨ ដែលបានចូលរួមការប្រកួតថ្នាក់ជាតិ លើកនេះ៕