ក្រុមកីឡាករអាយុក្រោម២៣ឆ្នាំ សរុបចំនួន៧៤នាក់ ដែលត្រូវបានសហព័ន្ធកីឡាបាល់ទាត់កម្ពុជា និងក្រុមគ្រូបង្វឹកជម្រើសជាតិ បានជ្រើសរើស និងដាក់ឱ្យធ្វើតេស្ត នៅក្នុងដំណាក់កាលទី១នោះ នឹងត្រូវធ្វើការប្រមូលផ្តុំ នៅថ្ងៃពុធនេះ ដើម្បីជម្រុះរកអ្នកមានសមត្ថភាព និងទេពកោសល្យចុងក្រោយចំនួន២៨នាក់ ត្រៀមចូលរួមការប្រកួត ជើងឯកបាល់ទាត់តំបន់អាស៊ីអាគ្នេយ៍ អាយុក្រោម២៣ឆ្នាំ (AFF U23 Championship 2022) ដែលកម្ពុជាត្រូវធ្វើជាម្ចាស់ផ្ទះ។
សម្រាប់បញ្ជីរាយនាមកីឡាករ សម្រាប់ការធ្វើតេស្ត នៅក្នុងដំណាក់កាលទី១ ទាំង៧៤នាក់នេះ ត្រូវបានជ្រើសរើសចេញពីក្លិបចំនួន១៨ ក្នុងនោះក្លិបភ្នំពេញក្រោន ៦នាក់ ព្រះខ័នរាជស្វាយរៀង ៦នាក់ វិសាខា ៧នាក់ ណាហ្គាវើលដ៍ ២នាក់ បឹងកេត ៩នាក់ អង្គរថាយហ្គឺរ ៥នាក់ ក្រុមទ័ព ៦នាក់ គិរីវង់សុខសែនជ័យ ៤នាក់ នគរបាលជាតិ ២នាក់ អាស៊ីអឺរ៉ុប ២នាក់ អគ្គិសនីកម្ពុជា ៤នាក់ ខេត្តព្រៃវែង ៨នាក់ សូលទីឡូអង្គរ ២នាក់ សាលាបាល់ទាត់ជាតិបាទី ៣នាក់ ក្រុម ISI ដង្កោសែនជ័យ ២នាក់ ខេត្តត្បូងឃ្មុំ ២នាក់ ក្រុមកោះកុងអេហ្វស៊ី ២នាក់ និងក្រុមសៀមរាប ២នាក់។
ទាក់ទងទៅនឹងការធ្វើតេស្ត នៅក្នុងដំណាក់កាលទី១នេះ លោក ភា សុភ័ក្រ្តា គ្រូជំនួយក្រុមជម្រើសជាតិកម្ពុជា បានប្រាប់ថា៖ «ក្នុងដំណាក់កាលទី១នេះ យើងតេស្តទៅលើកាយសម្បទា បានដូចជាកំណត់ល្បឿន លំហាត់លោត និងលំហាត់ផ្សេងៗទៀត ហើយពេលល្ងាច យើងធ្វើតេស្តជាមួយនឹងហ្គេម ដោយយើងចែកគ្នាជា៤ក្រុម រួចប្រកួតគ្នា ១ថ្ងៃមាន២ហ្គេម។ បន្ទាប់មកយើងពិនិត្យរកមើលកីឡាករ មានសមត្ថភាពខ្ពស់ និងជ្រើសរើសយក៣៥នាក់ នៅក្នុងដំណាក់កាលនេះ»។
នៅក្រោយការបញ្ចប់ការធ្វើតេស្តដំណាក់កាលទី១ ដែលត្រូវពីថ្ងៃទី២ ដល់ថ្ងៃទី៤ ខែកុម្ភៈ ឆ្នាំ២០២២នេះ គឺក្រុមគ្រូបង្វឹកជម្រើសជាតិបាល់ទាត់កម្ពុជា នឹងឈានទៅដល់ការធ្វើតេស្ត នៅដំណាក់កាលទី២ និងទី៣ ដើម្បីជ្រើសរើសបេក្ខភាពចុងក្រោយ ចំនួន២៨នាក់ ត្រៀមប្រកួតផ្លូវការ ក្នុងពានរង្វាន់ AFF U23 Championship 2022 ដោយកម្ពុជា ឈរនៅពូលA ជាមួយក្រុមU23ប្រ៊ុយណេ ក្រុមហ្វីលីពីន និងក្រុមU23 ទីម័រខាងកើត។
លោក ភា សុភ័ក្រ្តា បានប្រាប់ភ្នំពេញប៉ុស្តិ៍ បន្ថែមថា៖ «ចំពោះកីឡាករ៣៥នាក់ ដែលបានជាប់ នៅក្នុងដំណាក់កាលទី២ យើងបន្តធ្វើតេស្ត នៅដំណាក់កាលទី២ ពីថ្ងៃទី៥ ដល់ទី៨ ដោយយើងធ្វើការហ្វឹកហាត់ធម្មតា បូករួមទាំងការបង្វឹកបន្ថែម ទៅលើតាក់ទិច ហើយក៏មានការប្រកួតគ្នាដែរ ដើម្បីសម្រេចយក២៨នាក់ចុងក្រោយ។ អ្នកទាំង២៨នេះ នឹងបានចូលរួមការហ្វឹកហាត់ នៅក្នុងដំណាក់កាលទី៣ ដោយចាប់ផ្តើមពីថ្ងៃទី៩ ខែកុម្ភៈទៅ រហូតដល់ថ្ងៃប្រកួតជាផ្លូវការតែម្តង»។
គួរបញ្ជាក់ថា គ្រប់ការប្រកួតជម្រុះក្នុងពូលទាំង៣លើករបស់ក្រុមកម្ពុជា ត្រូវធ្វើឡើង នៅម៉ោង៧យប់ដូចគ្នា នៅពហុកីឡដ្ឋានជាតិមរតកតេជោ ហើយតាមសហព័ន្ធកីឡាបាល់ទាត់កម្ពុជា បានប្រកាសឱ្យដឹង កាលពីថ្ងៃអង្គារថា អ្នកចាត់ការទូទៅ គឺលោក Keisuke Honda នឹងធ្វើដំណើរពីប្រទេសជប៉ុន មកដឹកនាំក្រុមជម្រើសជាតិកម្ពុជា ដោយផ្ទាល់តែម្តង៕
