ខ្សែប្រយុទ្ធដ៏មុតស្រួច ធ្លាប់លេងឱ្យក្រុមអង្គរថាយហ្គឺរ DA CRUZ GUARDLANO និងកីឡាករកម្ពុជាក្រោម ដាវ នីម របស់ក្លិបគិរីវង់សុខសែនជ័យ ត្រូវបានប្រកាសជាបេក្ខភាពថ្មីរបស់ក្រុមណាហ្គាវើលដ៍ ហើយជាមួយណាគ្នានេះ ណាហ្គា ក៏បានចុះកិច្ចសន្យាជាមួយកីឡាវ័យក្មេងមួយចំនួនទៀតផងដែរ ដើម្បីត្រៀមប្រកួតប្រជែង នារដូវកាលថ្មី ឆ្នាំ២០២២នេះ។
ក្លិបណាហ្គាវើលដ៍ បានប្រកាសពីការចុះកិច្ចសន្យាជាមួយខ្សែប្រយុទ្ធជនជាតិប្រេស៊ីល DA CRUZ GUARDLANO កាលពីថ្ងៃសុក្រនេះ ហើយអតីតខ្សែប្រយុទ្ធដ៏មុតស្រួចរបស់ក្រុមអង្គរថាយហ្គឺររូបនេះ បានក្លាយជាកីឡាករបរទេសដំបូងគេ ដែល ណាហ្គា បានចុះកុងត្រា ក្នុងរដូវកាលឆ្នាំ នេះ បន្ទាប់ពីណាហ្គា បានចែកផ្លូវជាមួយខ្សែប្រយុទ្ធ Leuca Petru និងខ្សែប្រយុទ្ធដ៏មុតស្រួច Marcio Marques។
ជាមួយគ្នានេះ ណាហ្គាវើលដ៍ បានប្រកាសពីការចុះកុងត្រាជាមួយខ្សែប្រយុទ្ធ ដាវ នីម កាលពីថ្ងៃព្រហស្បតិ៍ ហើយទន្ទឹងនឹងនេះ ណាហ្គា ក៏បានចុះកិច្ចសន្យា ជាមួយកីឡាករវ័យក្មេង តៅ សិញ ខ្សែការពារ ឆៃ រត័សេរី កីឡាករ ហួត ដានីន និងកីឡាករ ផាត សុខា សម្រាប់ត្រៀមរដូវកាលថ្មីនេះផងដែរ។
ប៉ុន្តែណាហ្គាវើលដ៍ បានបញ្ចប់កិច្ចសន្យាជាមួយកីឡាករ សំអឿន ពិដោ ក្នុងលក្ខខណ្ឌខ្ចីជើង១ឆ្នាំហើយ ក៏បានចែកផ្លូវជាមួយកីឡាករ តាំង សុភ័ក្ត ផងដែរ។ តែទោះបីជាយ៉ាងណា គិតមកដល់ពេលនេះ ណាហ្គាវើលដ៍ នៅមិនទាន់បានប្រកាសតែងតាំងគ្រូបង្វឹកថ្មីជំនួសគ្រូបង្គោល លោក មាស ចាន់ណា ដែលបានបញ្ចប់កិច្ចសន្យា និងកំពុងដឹកនាំក្រុមវិសាខា នៅឡើយទេ៕