នៅទីបំផុតអ្នកលេងកាំភ្លើងភ្លោះ វ៉ាន់ វឿន បានរកឃើញឱកាសឡើងទៅកាន់ការប្រកួតវគ្គពាក់កណ្តាលផ្តាច់ព្រ័ត្រ ដណ្តើមពានមាស នៅលើសង្វៀនថោន ជាផ្លូវការហើយ បន្ទាប់ពីរូបគេបានយកឈ្នះលើ សេក ចៅជូត នៅក្នុងការប្រកួតកាត់សេចក្តី លើកចុងក្រោយ កាលពីថ្ងៃអាទិត្យ គឺក្នុងពេលដែល អេលីត ចំរើន និង ឈុត សេរីវ៉ាន់ថង បានធ្វើឱ្យអ្នកទស្សនាភាគច្រើន មានការរិះគន់ ទៅលើការប្រកួតបែបមិនទាក់ទាញរបស់ពួកគេ។
សម្រាប់ការប្រកួតជម្រុះលើកទី៣ ប្រចាំពូលBនេះ វ៉ាន់ វឿន និង សេក ចៅជូត បានប្រឹងប្រែងវាយសងគ្នាយ៉ាងខ្លាំង ព្រោះអ្នកឈ្នះ នឹងទទួលបានឱកាស ឡើងទៅប្រកួត នៅវគ្គវបន្ត ឬអ្នកចាញ់ ត្រូវហាលអាវ។ យ៉ាងណាក៏ដោយ តាមរយៈការប្រកួតពេញ៥ទឹកនោះ វ៉ាន់ វឿន ត្រូវបានចៅក្រមទាំង៥រូប សម្រេចឱ្យឈ្នះពិន្ទុជាឯកចន្ទ ៥-០ ដើម្បីបានឡើងទៅកាន់វគ្គពាក់កណ្តាលផ្តាច់ព្រ័ត្រ។
ជាមួយគ្នានេះកីឡាករជម្រើសជាតិ ឈុត សេរីវ៉ាន់ថង ក៏បានរកឃើញជ័យជម្នះយ៉ាងសំខាន់លើគូសត្រូវចាស់ អេលីត ចំរើន ផងដែរ។ បើទោះបីជា វ៉ាន់ថង បានឈ្នះកៅអីឡើងទៅវគ្គបន្ត ដោយស្វ័យប្រវត្តិរួចទៅហើយ ប៉ុន្តែការយកឈ្នះលើ អេលីត ចំរើន លើកនេះ វាជាការសម្រេចការសងសឹកជាលើកដំបូង ទៅលើ ចំរើន ចំពោះការចាញ់២លើកជាប់ៗគ្នា កន្លងមក។
តែទោះបីជាយ៉ាងណា ការប្រកួតរបស់ ឈុត សេរីវ៉ាន់ថង និង អេលីត ចំរើន លើកនេះ មិនទទួលបានការសាទរពីអ្នកទស្សនានោះទេ ព្រោះការប្រកួតបែបថកថយច្រើនពេក មិនសូវហ៊ានវ៉ៃប្តូរគ្នានេះ បាននាំឱ្យអ្នកទស្សនាមួយចំនួន ធ្វើការរិះគន់ថា ជាគូប្រកួតដែលអន់ មិនល្អមើល ឯអ្នកខ្លះទៀត បានលើកឡើងថា ២នាក់នេះ ជាប្រភេទកីឡាវ៉ៃរត់ដូចគ្នា អត់មានការទាក់ទាញ។
ជាមួយនឹងការរិះគន់នេះ ឈុត សេរីវ៉ាន់ថង បាននិយាយសុំទោសក្រោយការប្រកួតថា៖«ខ្ញុំសូមអរគុណដល់ពុកម៉ែ បងប្អូន ដែលតែងតែគាំទ្រដល់ខ្ញុំកន្លងមក ហើយក៏សូមអភ័យទោសដែរ ដែលការប្រកួតនេះ មិនសូវស្រុកគ្នាខ្លាំង ព្រោះអីជាស្នៀតប្រកួត យកឈ្នះរៀងៗខ្លួន។ កាលណាតែមានភាគីសម្រុក ច្បាស់ជាពិបាកហើយ គឺអ្នកចូល ពិបាកជាងអ្នកថយ អ៊ីចឹងសុំសូមអភ័យទោសត្រង់ចំណុចនេះផង»។
តាមរយៈលទ្ធផលនៃការប្រកួតនេះ បានបង្ហាឱ្យដឹង សម្រាប់ការប្រកួតនៅវគ្គពាក់កណ្តាលផ្តាច់ព្រ័ត្រ ខាងមុខនេះ កីឡាករលេង១ប្រចាំពូលB ឈុត សេរីវ៉ាន់ថង ត្រូវជួបអ្នកលេខ២ប្រចាំពូលA វេង សុភ័ក្រ ចំណែក វ៉ាន់ វឿន ត្រូវប្រឈមជាមួយជើងខ្លាំងវ័យក្មេងកំពុងល្អខ្លាំង សូត្រ វាសនា៕
