សហព័ន្ធកីឡាទូកក្តោងកម្ពុជា ដែលទើបតែទទួលបានជោគជ័យ លើការរៀបចំការប្រកួតជើងឯកអាស៊ីអាគ្នេយ៍ នៅលើទឹកដីខេត្តសៀមរាបនោះ បានសម្រេចផែនការយុទ្ធសាស្រ្តមួយនេះ គឺការបណ្តុះបណ្តាលបានមន្រ្តីជំនាញបច្ចេកទេស ចំនួន២៥នាក់ ដើម្បីឈានទៅរៀបចំការប្រកួតឱ្យបានកាន់តែល្អ ជាពិសសេសការត្រៀមខ្លួន ទៅធ្វើជាម្ចាស់ផ្ទះ ការប្រកួតកីឡាស៊ីហ្គេម ឆ្នាំ២០២៣ នៅកម្ពុជា។
សម្រាប់ការធ្វើជាម្ចាស់ផ្ទះ ការប្រកួតកីឡាទូកក្តោងជ្រើសរើសជើងឯកអាស៊ីអាគ្នេយ៍ ឆ្នាំ២០២១ នៅខេត្តព្រះសីហនុ កាលពីខែធ្នូ ឆ្នាំ២០២១ កន្លងមក សហព័ន្ធកីឡាទូកក្តោងកម្ពុជា បានទទួលបទពិសោធល្អៗ ជាច្រើន តែក៏មានចំណុចខ្វះខាតមួយចំនួនផងដែរ ដែលតម្រូវឱ្យមន្ត្រីបច្ចេកទេសរបស់សហព័ន្ធមួយនេះ ត្រូវសិក្សាស្វែងយល់បន្ថែម ក្រោមការជួយជ្រោមជ្រែងពីសំណាក់ មន្រ្តីបច្ចេកទេសអន្តរជាតិ ដែលមកពីប្រទេសសិង្ហបុរី។
ជាមួយហេតុផលនេះ សហព័ន្ធកីឡាទូកក្តោងកម្ពុជា បានលើកយកវគ្គបណ្តុះបណ្តាលមន្រ្តីបច្ចេកទេសរៀបចំការប្រកួតកីឡាទូកក្តោង «កម្រិតមូលដ្ឋាន» ឆ្នាំ២០២១ ទៅធ្វើនៅខេត្តព្រះសីហនុ ផ្ទាល់តែម្តង ដោយមានសិក្ខាចំនួន២៥នាក់ បានចូលរួម ហើយវគ្គនេះ បានចាប់ផ្តើមកាលពីថ្ងៃទី៧ និងបានបញ្ចប់កាលពីថ្ងៃទី១០ ខែកុម្ភៈ ឆ្នាំ២០២២ ក្រោមគម្រោងថវិការបស់ក្រសួងអប់រំ យុវជន និងកីឡា។
វគ្គបណ្តុះបណ្តាលនេះ ត្រូវបានរៀបចំឡើង ដើម្បីជួយឱ្យ មន្រ្តីបច្ចេកទេសនៃប្រភេទកីឡាទូកក្តោងរបស់កម្ពុជា មានចំណេះជំនាញកាន់តែខ្ពស់ សម្រាប់ត្រៀមការប្រកួតកីឡាស៊ីហ្គេម ឆ្នាំ២០២៣ និងដើម្បីបង្ហាញដល់មហាជន បានឃើញ និងស្វែងយល់អំពីប្រភេទកីឡាទូកក្តោងនេះ ផងដែរ។
លោក សោម សុទ្ធរិទ្ធិពង្ស អគ្គលេខាធិការសហព័ន្ធកីឡាទូកក្តោងកម្ពុជា បានថ្លែងថា៖«មន្រ្តីបច្ចេកទេសរៀបចំការប្រកួត គឺជាក្រុមការងារដ៏សំខាន់មួយ ដែលអាចធ្វើការប្រកួតមួយទទួលបានជោគជ័យ អ៊ីចឹងបើមន្រ្តីបច្ចេកទេសរៀបចំការប្រកួតរបស់កម្ពុជាយើង មានចំណេះជំនាញកម្រិតខ្ពស់ ស្របតាមស្តង់ដារបស់សហព័ន្ធកីឡាទូកក្តោងអន្តរជាតិ នោះគ្រប់ការប្រកួតទាំងថ្នាក់ជាតិ និងអន្តរជាតិ ដែលកម្ពុជា នឹងធ្វើជាម្ចាស់ផ្ទះ នឹងសុទ្ធសឹងតែទទួលបានជោគជ័យ និងគុណភាព នៃការប្រកួតក្នុងកម្រិតខ្ពស់ ជាមិនខាន»។
តាមរយៈការសិក្សាទាំងទ្រឹស្តី និងការអនុវត្តជាក់ស្តែង ចំនួន៤ថ្ងៃកន្លងមកនេះ សិក្ខាកាមជាមន្រ្តីបច្ចេកទេសទាំង២៥រូបនេះ ទទួលបាននូវចំណេះដឹងកម្រិតខ្ពស់ លើការរៀបចំទម្រង់នៃការប្រកួត ការប្រើប្រាស់ទង់សញ្ញា សំឡេងសម្គាល់ និងច្បាប់បញ្ញតិ្តផ្សេងៗ ដោយបានអនុវត្តន៍ផ្ទាល់នៅលើផ្ទៃទឹក ។
តាមការវាយតម្លៃរបស់គ្រូឧទ្ទេស បានឱ្យដឹងថា សិក្ខាកាមទាំង២៥រូបនេះ ទទួលបាននិទេ្ទសល្អចំនួន១៨រូប ស្មើ៧២ភាគរយ និទ្ទេសល្អបង្គួរ ចំនួន៥រូប ស្មើ២០ភាគរយ និងនិទេ្ទសមធ្យមចំនួន២រូប ស្មើ៥ភាគរយ ខណៈពិធីបិទវគ្គ កាលពីថ្ងៃព្រហស្បតិ៍នោះ ត្រូវបានធ្វើឡើង ក្រោមអធិបតីភាព លោក នង ឌីណារ៉ា តំណាងឯកឧត្តមអភិបាល នៃគណៈអភិបាលខេត្តព្រះសីហនុ និងមានការចូលរួមពីសំណាក់ លោក ទុយ ប៊ុនហឿង អនុប្រធាននាយកដ្ឋានអប់រំកាយ និងកីឡា លោក តាំង សុចិត្រគ្រឹស្នា ប្រធានមន្ទីរទេសចរណ៍ខេត្តព្រះសីហនុ លោក ម៉ុក សារឿន អនុប្រធានមន្ទីរអប់រំ យុវជន និងកីឡា និងលោក សោម សុទ្ធរិទ្ធិពង្ស ជាអគ្គលេខាធិការសហព័ន្ធ៕
ក្រោយពីការធ្វើជាម្ចាស់ផ្ទះនៃការប្រកួតកីឡាទូកក្តោងជ្រើសរើសជើងឯកអាស៊ីអាគ្នេយ៍ឆ្នាំ២០២១ នៅសណ្ឋាគារសុខា ខេត្តព្រះសីហនុ កាលពីខែធ្នូ ឆ្នាំ២០២១ ទទួលបានជោគជ័យជាទីមោទន សហព័ន្ធកីឡាទូកក្តោងកម្ពុជា បានទទួលបទពិសោធន៍ល្អៗជាច្រើន និងចំនុចខ្វះខាតមួយចំនួន ដែលតម្រូវអោយមន្ត្រីបច្ចេកទេសរបស់សហព័ន្ធ ត្រូវសិក្សាស្វែងយល់បន្ថែម ក្រោមការជួយជ្រោមជ្រែងពីសំណាក់ មន្រ្តីបច្ចេកទេសអន្តរជាតិ ដែលមកពីប្រទេសសឹង្ហបុរី។
ផ្អែកតាមផែនការសកម្មភាពការងារឆ្នាំ២០២១ ក្រោមគម្រោងថវិការបស់ក្រសួងអប់រំ យុវជន និងកីឡា សហព័ន្ធកីឡាទូកក្តោងកម្ពុជា បានបើកវគ្គបណ្តុះបណ្តាលមន្ត្រីបច្ចេកទេសរៀបចំការប្រកួតកម្រិតមូលដ្ឋាន ដែលបានប្រព្រឹត្តិទៅចាប់ពីថ្ងៃទី០៧ ដល់ថ្ងៃទី១០ ខែកុម្ភៈ ឆ្នាំ២០២២ ដើម្បីអោយប្រភេទកីឡាទូកក្តោងរបស់កម្ពុជា មានមន្រ្តីបច្ចេកទេសមានចំណេះជំនាញកំរិតខ្ពស់ សម្រាប់ត្រៀមការប្រកួតកីឡាស៊ីហ្គេមឆ្នាំ២០២៣ និងដើម្បីបង្ហាញដល់មហាជន បានឃើញ និងស្វែងយល់អំពីប្រភេទកីឡាទូកក្តោងផងដែរ ។
មន្រ្តីបច្ចេកទេសរៀបចំការប្រកួត គឺជាក្រុមការងារដែលសំខាន់មួយ ដែលអាចធ្វើការប្រកួតមួយទទួលបានជោគជ័យ ហើយបើមន្រ្តីបច្ចេកទេសរៀបចំការប្រកួតរបស់កម្ពុជាយើងមានចំនេះជំនាញកំរិតខ្ពស់ស្របតាមស្តង់ដា របស់សហព័ន្ធកីឡាទូកក្តោងអន្តរជាតិ នោះគ្រប់ការប្រកួតទាំងថ្នាក់ជាតិ និងអន្តរជាតិដែលកម្ពុជានឹងធ្វើជាម្ចាស់ផ្ទះ នឹងសុទ្ធសឹងតែទទួលបានជោតជ័យ និងគុណភាពនៃការប្រកួតក្នុងកំរិតខ្ពស់។
ជាលទ្ធផលនៃវគ្គបណ្តុះបណ្តាលមន្ត្រីបច្ចេកទេសរៀបចំការប្រកួតកីឡាទូកក្តោងរយៈពេល ៤ថ្ងៃកន្លងមកនេះ សិក្ខាកាមទាំង ២៥រូប ទទួលបាននូវចំណេះដឹងកំរិតខ្ពស់លើ ការរៀបចំទំរង់នៃការប្រកួត ការប្រើប្រាស់ទង់សញ្ញា សំលេងសំគាល់ និងច្បាប់បញ្ញតិ្តផ្សេងៗ និងបានអនុវត្តន៍ផ្ទាល់នៅលើផ្ទៃទឹក ។
សម្រាប់ការវាយតម្លៃវគ្គសិក្សា សិក្ខាកាមទាំង ២៥រូប ទទួលបាន៖
-និទេ្ទសល្អ ចំនួន ១៨រូប = ៧២ %
-និទ្ទេសល្អបង្គួរ ចំនួន ៥រូប = ២០ %
-និទេ្ទសមធ្យម ចំនួន ២ រូប = ៥ %
