ក្រុមបាល់ទាត់ជម្រើសជាតិកម្ពុជាអាយុក្រោម២៣ឆ្នាំ បានបង្ហាញការលេងបានយ៉ាងល្អបំផុត ដើម្បីរួមគ្នាយកឈ្នះលើក្រុមU23ជម្រើសជាតិប្រ៊ុយណេ រហូតដល់ ៦-០ ក្នុងការប្រកួតបើកឆាកក្នុងពូលA នៃពានរង្វាន់ AFF U23 Championship កាលពីយប់ម្សិលមិញ គឺបន្ទាប់ពី ក្រុមហ្វីលីពីន បានតាមស្មើ ទីម័រខាងកើត ២-២។
តាមរយៈការប្រកួត កាលពីយប់ថ្ងៃចន្ទ ម្សិលមិញនេះ គ្រប់គ្នា បានសរសើរគ្រប់មាត់ ពីចង្វាក់លេងបែបយល់ចិត្តគ្នា របស់ក្រុមគោព្រៃវ័យជំទង់កម្ពុជា ហើយគ្រប់គ្នាពិតជារំភើបខ្លាំង នៅពេលក្រុមសំណព្វរបស់ខ្លួន អាចរកបានគ្រាប់បាល់ជាបន្តបន្ទាប់រហូតដល់៦គ្រាប់ និងអាចការពារទីរបស់ខ្លួន មិនឱ្យរបូតគ្រាប់បាល់ សូម្បី១នោះ។
នៅក្នុងការប្រកួតតង់ទី១ ត្រូវបានគេមើលឃើញថា ក្រុមកម្ពុជា ភាគច្រើនលេងបាល់ចេញពីស្លាបទាំងសងគ្នា ដោយក្នុងនោះខ្សែប្រយុទ្ធ សារ ទី បានបង្ហាញទម្រង់លេងលេចធ្លោរខ្លាំង ក្នុងការចាប់ដៃគូជាមួយ ឡេង ណូរ៉ា ខណៈ អ៊ាន ពិសី ជាអ្នករាប់រង់ស្លាបខាងស្តាំ ចំណែក ញាន សុស៊ីដាន បានចល័តលេងយ៉ាងល្អ នៅតំបន់កណ្តាល ជាមួយ មិន រតនៈ ដើម្បីបង្កើតឱកាសឱ្យខ្សែប្រយុទ្ធ សៀង ចន្ធា រកបានគ្រាប់បាល់បើកឆាក តាមរយៈការតែតបញ្ចូលទីយ៉ាងស្អាត នៅនាទីទី១៨ ពីការលោតបាល់ខ្លីរបស់ សុស៊ីដាន។
២នាទីក្រោយមក ញាន សុស៊ីដាន បានទាត់បាល់ផ្តាច់ ដែលភ្លាតចេញពីការប្រជែងគ្នា នៅមុខទីរបស់ក្រុមប្រ៊ុយណេ ហើយនៅនាទី៣២ តាំង ប៊ុនឆៃ បានបញ្ជូនបាល់ពីចម្ងាយ នាំឱ្យ ខ្សែប្រយុទ្ធ សារ ទី អាចរត់ទៅឆក់បាល់នោះ រួចទាត់ដោយបច្ចេកទេស តាមប្រលោះជើងអ្នកចាំទីប្រ៊ុយណេ ចូលទីយ៉ាងល្អបំផុត ដើម្បីជួយឱ្យ កម្ពុជា នាំមុខក្រុមប្រ៊ុយណេ ៣-០ នៅក្នុងតង់ទី១នេះ។
នៅដើមតង់ទី២ អ្នកបចាត់ការទូទៅក្រុមកម្ពុជា លោក Keisuke Honda បានសម្រេច ផ្លាស់ប្តូរ សៀង ចន្ធា និង អ៊ាន ពិសី ចេញ និងដាក់ជំនួសដោយ ណារ៉ុង កក្កដា និង គី រីណា ប៉ុន្តែស្ថានភាព នៅលើទីលានមិនសូវអនុគ្រោះឡើយ ដោយសារតែមានភ្លៀងធ្លាក់ ហើយឈានដល់នាទី៥៥ លោកអាជ្ញាកណ្តាលម៉ាឡេស៊ី Tuan Mohd Yaasin Tuan Mohd Hanafiah សម្រេចពន្យាពេលប្រកួត៣០នាទី គឺរហូតដល់ដល់ម៉ោង៩ និង៦នាទី ទើបការប្រកួតបានចាប់ផ្តើមជាថ្មី។
សម្រាប់ដំណើរការឡើងវិញ ជាមួយការមានទឹកដក់ នៅលើទីលាននេះ ណារ៉ុង កក្កដា ខកឱកាសមាស២គ្រាប់ និង គី រីណា ខក១គ្រាប់ សម្រាប់ការចាប់ផ្តើម៥នាទីដំបូង។ តែទោះបីជាយ៉ាងណា ឈានដល់នាទី៧៣ តាំង ប៊ុនឆៃ បានជួយកម្ពុជាបង្កើនការនាំមុខ ៤-០ ហើយនៅនាទី៨៦ ឡេង ណូរ៉ា បញ្ជូនពីម៉ុមខាងឆ្វេងឱ្យ ស រតនា ស៊ុតបាល់បញ្ចូលទី នាំមុខ ៤-០ បន្ទាប់ពីរូបគេ បានចូលជំនួស មិន រតនៈ ត្រឹម២នាទី។ ឈានដល់នាទី៨៩ ណារ៉ុង កក្កដា រកបានគ្រាប់ទី៦ ក្រោយការតែតទម្លាក់របស់ ស រតនា។
ចំណែកការបក្រកួតគូទីមួយរវាងក្រុម ទីម័រខាងកើត និងហ្វីលីពីន បានបញ្ចប់ក្នុងលទ្ធផលស្មើ ២-២ ហើយតាមរយៈលទ្ធផលនេះ ក្រុមម្ចាស់ផ្ទះកម្ពុជា បានឡើងទៅឈរនៅកំពូលតារាងប្រចាំពូលA នេះ ជាបណ្តោះអាសន្ន ដោយមាន៣ពិន្ទុ និងតាមពីក្រោយដោយក្រុមទីម័រខាងកើត និង ហ្វីលីពីន ដែលមាន១ពិន្ទុ និងក្រុមប្រ៊ុយណេ មានសូន្យពិន្ទុ ជាមួយការរបូតដល់៦គ្រាប់៕