ក្លិបបាល់ទាត់បឹងកេត បានចុះកិច្ចសន្យា នាំយកកីឡាករបរទេស គ្រប់៥នាក់ ទៅតាមកូតានៃលីគកំពូលកម្ពុជា បានកំណត់ហើយ ហើយអ្នកទាំង៥នេះ មានសញ្ជាតិខុសៗគ្នា គឺសញ្ជាតិប្រេស៊ីល កាមេរូន នីហ្សេរីយ៉ា អ៊ីរ៉ង់ និងអាហ្គានីស្ថាន។
នៅក្នុងចំណោមអ្នកទាំង៥នេះ គឺមានអ្នកលេងនៅតំណែងការពារ ១នាក់ លេងបម្រើ ២នាក់ និងលេងប្រយុទ្ធ មាន២នាក់ ហើយអ្វីដែលគួរឱ្យចាប់អារម្មណ៍ខ្លាំងនោះ គឺកីឡាករអ៊ីរ៉ងដំបូងគេ ដែលមកប្រកបអាជីពបាល់ទាត់ នៅលីគកំពូលកម្ពុជា បានតាំងចិត្តខ្ពស់ ក្នុងការជួយបឹងកេត ដើម្បីប្រជែងឱ្យបានពាន នៅរដូវកាលនេះ ចំណែក៤នាក់ទៀត សុទ្ធតែមានបទពិសោធល្អដូចគ្នា។
ម្ចាស់អាវលេខ២៥ Alexandra Cardoso ជាបេក្ខភាពទី៥ចុងក្រោយ ដែលក្លិបបឹងកេត ទើបប្រកាសផ្លូវការ កាលពីថ្ងៃអង្គារម្សិលមិញនេះ គឺជាកីឡាករមកពីប្រេស៊ីល ដែលមានតួនាទីជាខ្សែបម្រើ ហេតុនេះគេនឹងលេងនៅតំបន់បម្រើជាមួយកីឡាករអាហ្គានីស្ថាន ធ្លាប់លេងឱ្យក្លិបភ្នំពេញក្រោន និងវិសាខា ឈ្មោះ Zazai Mustafa។
ចំណែកអតីតខ្សែប្រយុទ្ធឆ្នើមរបស់វិសាខា Ajayi Opeyemi ដែលជាជនជាតិនីហ្សេរីយ៉ា និងខ្សែប្រយុទ្ធជនជាតិកាមេរូន Abee Hubert ដែលបានផ្ទេរចេញពីក្លិបអាស៊ីអឺរ៉ុប មកលេងនៅបឹងកេត ក្នុងជើងទី២ នៃការប្រកួតលីគកំពូលកម្ពុជា កាលពីឆ្នាំ២០២១នោះ គឺអ្នកទាំង២នេះ នឹងក្លាយជាដាវញីឈ្មោល ដើម្បីប្រមាញរកគ្រាប់បាល់ឱ្យក្រុមបឹងកេត សម្រាប់ការប្រកួតនៅរដូវកាលថ្មីនេះ។
ជាមួយគ្នានេះ កីឡាករអ៊ីរ៉ង់ដំបូងគេ ដែលមកប្រកបអាជីពនៅកម្ពុជា Taher Jahanbakksh នឹងចាប់ដៃគូជាមួយកីឡាករខ្មែររបស់បឹងកេត ផ្សេងទៀត ក្នុងការលេងនៅតំបន់ការពារ ហើយគេម្នាក់នេះ ធ្លាប់លេងបាល់ទាត់ទាំងពីអាយុ៧ឆ្នាំ មុនពេលវិឌ្ឍខ្លួន បានលេងលីគទី២របស់អ៊ីរ៉ង់ និងលីគកំពូលអ៊ីរ៉ង់។ ជាងនេះទៅទៀត Taher Jahanbakksh ធ្លាប់លេងនៅលីគកំពូលហ្វីលីពីន រហូតដល់៤ឆ្នាំឯណោះ។
សម្រាប់ការមកចូលរួមជាមួយក្រុមបឹងកេត នៅរដូវកាលនេះ Taher Jahanbakksh បានតាំងចិត្តខ្ពស់ថា៖ «ពិតណាស់ខ្ញុំមកទីនេះ គឺដើម្បីឈ្នះបានជាមួយក្រុម។ ខ្ញុំបានដឹងដែរថា បឹងកេត ជាក្រុមដ៏ធំមួយ មានអ្នកគាំទ្រច្រើន។ ខ្ញុំចង់ឈ្នះពានជាមួយក្លិបមួយនេះ ហើយខ្ញុំសង្ឃឹមថា យើងអាចធ្វើបាន ព្រោះយើងមានកីឡាករល្អៗ និងគ្រូបង្វឹកពូកែៗ»។
ម្ចាស់អាវលេខ៥រូបនេះ បានបន្ថែមថា៖ «មែនហើយ យើងត្រៀមខ្លួន ដើម្បីប្រជែងយកជើងឯក ហើយយើងសូមឱ្យអ្នកគាំទ្រ បន្តគាំទ្រដល់ពួកយើង ព្រោះការគាំទ្ររបស់អ្នក ពិតជាធ្វើឱ្យពួកយើង មានកម្លាំង ដើម្បីខិតខំធ្វើឱ្យអស់ពីសមត្ថភាព ដើម្បីក្លាយខ្លួនជាក្រុមមួយ ដ៏មានកម្រិតខ្ពស់ នៅក្នុងប្រទេសកម្ពុជា ហើយសង្ឃឹមថា យើងនឹងធ្វើឱ្យអ្នកទាំងអស់គ្នារីករាយ»៕