ខ្សែប្រយុទ្ធជំនាញប្រើជើងឆ្វេង ម៉ាត់ នូរុណ បានជួយឱ្យក្រុមបឹងកេត វិលមករកគន្លងផ្លូវដ៏ល្អវិញ ព្រោះការរកបាន៣គ្រាប់តែម្នាក់ឯងរបស់គេ បានជួយឱ្យក្រុមនាគខៀវមួយនេះ ឆ្លងផុតវគ្គជម្រុះ ដើម្បីឡើងទៅកាន់ការប្រកួតវគ្គផ្តាច់ព្រ័ត្រ នៅក្នុងការប្រកួតជម្រុះព្រឹត្តិការណ៍ Cambodia Airways Cup លើកទី២ រដូវកាល ២០២២ ជាលើកដំបូង។
គេនៅចាំបានថា ក្រុមបឹកកេត ទើបតែទទួលបរាជ័យ ដោយពួកគេបានធ្លាក់ត្រឹមវគ្គជម្រុះ នៅក្នុងការប្រកួតពានបើករដូវកាល ដែលបានធ្វើនៅកីឡដ្ឋានព្រីនស៍ កាលពីពេលថ្មីៗនេះ ប៉ុន្តែការរួមគ្នាយកឈ្នះក្រុមអង្គថាយហ្គឺរ ៣-១ កាលពីម្សិលមិញ វាបានជួយស្រោចស្រង់ស្ថានភាពក្រុមនេះឱ្យប្រសើរវិញ បានមួយកម្រិត ហើយវាក៏ជាពេលដែល បឹងកេត បានបង្ហាញវត្តមានខ្សែបម្រើថ្មីជនជាតិប្រេស៊ីល Alexandra Cardoso និងខ្សែការពារជនជាតិអ៊ីរ៉ង់ Taher Jahanbakksh ផងដែរ ដោយការប្រកួតនេះ គេមានរបួសក្បាល។
ដោយមានការរួមចំណែកយ៉ាងសំខាន់ ពីបម្រើជនជាតិអាហ្គានីស្ថាន Zazai Mustafa ពិសេសខ្សែប្រយុទ្ធនីហ្សេរីយ៉ា Ajayi Opeyemi និងខ្សែប្រយុទ្ធជនជាតិកាមេរូន Abee Hubert នោះ បានជួយឱ្យខ្សែប្រយុទ្ធលេខ១០ ម៉ាត់ នូរុញ អាចរកបាន២គ្រាប់ ជាប់ៗគ្នា នៅនាទី២១ និង២៧ មុនពេលខ្សែប្រយុទ្ធ KWAVENY JOSEF របស់អង្គរថាយហ្គឺ ធ្វើសម្រេចបាន១គ្រាប់ តាមពីក្រោយនៅនាទី៤១។
ឈានចូលដល់វគ្គទី២ ការប្រកួតអូសបន្លាយពេលវេលាដល់នាទី៨៦ ទើបកីឡាករ ម៉ាត់ នូរុណ ដដែលធ្វើសម្រេចបានគ្រាប់ទី៣ (hat-trick) របស់ខ្លួន ដើម្បីជួយឱ្យក្រុមបឹងកេត យកឈ្នះ អង្គរថាយហ្គឺរ ៣-១ ហើយ ម៉ាត់ នូរុណ ក៏ត្រូវបានជ្រើសរើសជាកីឡាករល្អប្រចាំការប្រកួតនេះផងដែរ។
ជាមួយជ័យជម្ននេះ បានជួយឱ្យក្រុមម្ចាស់ផ្ទះ បឹងកេត ត្រូវឡើងទៅជួបក្រុមណាហ្គាវើលដ៍ នៅវគ្គផ្តាច់ព្រ័ត្រ ដែលនឹងត្រូវធ្វើនៅរសៀលម៉ោង ៣:៣០ ថ្ងៃសៅរ៍នេះ ដើម្បីដណ្តើមគ្នាយកពាន ចំណែកក្រុមព្រះខ័នរាជស្វាយរៀង ដែលបានចាញ់ក្រុមណាហ្គាវើលដ៍ ១-០ នោះ ត្រូវប្រកួតដណ្តើមយកលេខ៣ ជាមួយក្រុមចាញ់ដូចគ្នា អង្គរថាយហ្គឺរ នៅថ្ងៃសុក្រ ស្អែកនេះ៕
