កីឡាករជម្រើសជាតិប្រដាល់សកល ទូច ដេវីត បានក្លាយជាបេក្ខភាព ដែលបានឡើងទៅកាន់វគ្គ៨នាក់ចុងក្រោយមុនគេ សម្រាប់ការប្រកួតដណ្ដើមខ្សែក្រវាត់ រដូវកាលទី២ ក្នុងទម្ងន់៦០គីឡូក្រាម នៅលើសង្វៀន PNN បន្ទាប់ពីរូបគេបានផ្តួលកីឡាករជើងចាស់ ឡុង ជិន ឱ្យសន្លប់ត្រឹមទឹកទី៣នោះ។
តាមរយៈការប្រកួតបើកឆាក កាលពីថ្ងៃអាទិត្យ ម្សិលមិញនេះ ឡុង ជិន បានព្យាយាមវាយប្តូរជាមួយ ទូច ដេវីត យ៉ាងរន្ធើន ព្រោះគេក៏ជាជើងខ្លាំងម្នាក់ នៅក្នុងចំណោមបេក្ខភាពទាំង១៦នាក់ ដែលត្រូវបានសម្រិតសម្រាំង ដាក់ឱ្យប្រកួតដណ្តើមខ្សែក្រវាត់ រដូវកាលទី២ ក្នុងកម្មវីធីប្រដាល់ Ganzberg One Strike នេះផងដែរ។
តែទោះបីជាយ៉ាងណា ឡុង ជិន បានបង្ហាញភាពវិលវល់ នៅពេល ទូច ដេវីត បានម៉ាត់ចូលផ្ទៃមុខពេញៗ នៅក្នុងទឹកទី៣នោះ ដោយលោកអាជ្ញាកណ្តាល អូត ពូថង បានរាប់ទៅលើរូបគេ២លើក និងឈានដល់បញ្ឈប់ការប្រកួតតែម្តង បន្ទាប់ពី ឡុង ជិន បានបានដួលទាំងជំហរ ក្រោមកណ្តាប់ដៃធ្ងន់ៗរបស់ ទូច ដេវីត នោះ ហើយតាមលទ្ធផលនេះ ដេវីត នឹងត្រូវឡើងទៅអង្គរចាំនៅវគ្គ៨នាក់ចុងក្រោយមុនគេ ប៉ុន្តែ ឡុង ជិន បានធ្លាក់ចេញពីការប្រកួតនេះហើយ។
តាមរយៈសន្និសីទកាសែត មុនការប្រកួតនេះ បានឱ្យដឹង ការប្រកួតដណ្តើមខ្សែក្រវាត់ ដែលមានប្រាក់រង្វាន់រហូតដល់១ម៉ឺនដុល្លារនេះ PNN និងដៃគូឧបត្ថម្ភធំរបស់ខ្លួន គឺក្រុមហ៊ុនស្រាបៀរ Ganzberg បានសម្រិតសម្រាំងបេក្ខភាពចំនួន៦នាក់ ឱ្យចូលរួមប្រកួតប្រជែងគ្នា ក្នុងនោះមានជើងខ្លាំងក្លិប ប៉ែន កាក់គុនខ្មែរ ព្រឿង សុជាតិ, អ្នកស្នងគុនខ្មែរទឹកដីអង្គរ សេក ចៅជូន, ជម្រើសជាតិប្រដាល់សកល ទូច ដេវីត, ម្ចាស់ខ្សែក្រវាត់ប្រាក់ ឡុង ជិន, ម្ចាស់ខ្សែក្រវាត់មាស ទម្ងន់៥៤ គ.ក្រ របស់ភីអិនអិន រិន ដាវីត, អ្នកលេងទម្ងន់ជើង រឿម វណ្ណៈ។
ចំណែកបេក្ខភាព១០រូបផ្សេងទៀត រួមមាន មនុស្សយន្ត ឯម សុធី, អ្នកប្រយុទ្ធកែងស្រួច វៀត ប៊ុនឌឿន, ខ្លាចាស់ ម៉ន សាម៉េត, ជើងខ្លាំងចាស់វស្សា សៀវ ង៉ុយ, អ្នក ស្នង គុនខ្មែររលកថ្មី ធន់ ផានិត, អ្នកប្រដាល់ចិត្តសឿងក្លិបនាយដ្ឋានអង្គរក្ស អេលីត សាន់, អ្នកលេងទម្ងន់ដៃ លាភ រដ្ឋា, អ្នកប្រដាល់កំពុងឡើងកូដ ផាន់ សុផាត, អ្នកប្រយុទ្ធវ័យក្មេង ឆង ថងសិទ្ធ និងជើងខ្លាំងក្លិបគុជសារសគុនខ្មែរ នៅ ដារ៉ូ។
លោក សោម ឆាយ៉ា អគ្គនាយករង ស្ថានីយ៍ទូរទស្សន៍ PNN បានថ្លែងថា៖«តាមរយៈកម្មវិធីប្រដាល់ ដែល PNN មាននេះ នឹងអាចចូលរួមចំណែកកសាងថ្នាលកីឡាករសម្រាប់ឆ្នាំ២០២៣ ដែលកម្ពុជា ត្រូវធ្វើជាម្ចាស់ផ្ទះការប្រកួតស៊ីហ្គេម ជាលើកដំបូង ក្នុងប្រវត្តិសាស្ត្រ ដោយវិញ្ញាសា គុនខ្មែរ ត្រូវបានដាក់បញ្ចូលក្នុងប្រភេទកីឡាប្រយុទ្ធ ដែលនេះជាសក្ដានុពលដ៏ធំធេងមួយ ក្នុងការប្រកួតប្រជែងដណ្ដើមមេដាយជូនជាតិ ហើយ PNN និង ក្រុមហ៊ុនស្រាបៀរ GANZBERG ប្ដេជ្ញាចិត្តលើកស្ទួយអភិរក្ស និងអភិវឌ្ឍវិស័យកីឡាប្រដាល់គុនខ្មែរ ឱ្យកាន់តែល្បីសុះសាយ នៅលើឆាកអន្តរជាតិ»៕
